Susana 1
1
Ang Katahom ni Susana Nagbihag sang Duha ka mga Hukom
1Didto sa Babilonia, may nag-estar nga isa ka tawo nga ginahingalanan kay Joaquim 2nga nakapangasawa kay Susana nga anak ni Helkias. Matahom si Susana kag matinuohon sa Ginoo. 3Ang iya mga ginikanan mga Judio nga diosnon, kag ila ginpadaku ang ila anak sa pagkabuhi suno sa Kasugoan ni Moises. 4Ang iya bana nga si Joaquim tama gid ka manggaranon. May malapad kag matahom nga hardin sa palibot sang iya balay, kag sa masunson, ang iban nga mga Judio nagatalabuay didto sa ila pagsinapol tungod kay daku gid ang ila pagtahod kay Joaquim. 5-6Ang tanan nga may mga panumbongon nagakadto man sa balay ni Joaquim sa diin ang duha ka mga hukom nagabista sining mga panumbongon. Ining duha ka mga pangulo sang mga Judio bag-o pa lamang ginbutang sa ila palangakuan. Nahanungod sa ila nga duha, ang Ginoo nagsiling, “May kalautan sa Babilonia; ang mga hukom nakulangan sa ila paghatag sing pagtuytoy sa mga tawo.”
7Kinabatasan ni Susana ang paglakatlakat sa hardin sa tagsa ka udtong adlaw sa tapos makapauli ang tanan agod magpaniaga. 8Ang duha ka mga hukom nabihag gid sa katahom ni Susana kag gani nagpaulihi sila sa pagpauli agod ila makita si Susana. 9Daku gid ang kaluyag nila kay Susana nga sang ulihi nadulaan sila sing gana sa pagpangadi kag sa ila mga tulomanon subong mga hukom. 10Ang tagsa sa ila naghandom kay Susana, pero wala nila ginpabutyag ang ila balatyagon sa isa kag isa 11kay nahuya sila sa pag-ako sang ila handom sa pag-angkon sa iya. 12Gani sa tagsa ka adlaw nagbantay sila sing may kakunyag agod makita nila si Susana.
13Sang isa ka adlaw, nagsinilingay sila, “Tion na ini sa pagpaniaga, dali mapauli na kita.” 14Gani nagbulagay sila sa pagpauli, pero sa wala pa lamang madugay nagbalik sila agod magtan-aw kay Susana, kag sa indi hungod nagsugataay sila. Sa una nga kahigayunan ang tagsa sa ila nagsaysay kon ngaa didto pa sila, pero sang ulihi ila gintuad sa isa kag isa ang ila malaut nga handom kay Susana. Nagpamat-od sila sa paghulat sang tion nga makita nila nga nagaisahanon sia. 15-17Gani nagbantay sila sang nagakaigo nga kahigayunan.
Ang mga Hukom Nagtinguha sa Pagganyat kay Susana
Sang isa ka adlaw, si Susana nga naupdan sang duha niya ka mga suloguon nga babayi, nagkadto sa hardin suno sa iya kinabatasan. Wala na didto sing tawo luas lamang sa duha ka mga hukom nga nagpanago sa pagbantay sa iya. Magin-ot yadto nga adlaw kag gani ginpakamaayo ni Susana ang pagpaligo. Gani iya ginsilingan ang iya mga suloguon, “Dalhi ninyo ako diri sang lana kag agwa para sa akon pagpaligo, kag siraduhi ninyo ang mga pwertahan agod nga indi ako matublag diri.” 18Dayon ginsirahan sang mga suloguon ang mayor nga mga pwertahan kag nag-agi sila sa isa ka diutay nga pwertahan sa pagkuha sang mga butang nga ginsugo sa ila ni Susana. Wala nila matalupangdi ang duha ka mga lalaki.
19Sang makahalin ang mga suloguon, ang duha ka mga hukom naggwa sa ila ginpanaguan kag nagdalagan padulong kay Susana 20kag nagsiling sila, “Sirado ang mga pwertahan kag wala sing may makakita sa aton. Nagabalingaso kami sa pagpakighilawas sa imo, gani ihatag sa amon ang amon ginahandom. 21Kon indi ka magpasugot, magakadto kami sa korte kag magasumpa nga nakita ka namon nga ginpapauli mo ang imo mga suloguon agod nga mag-isahanon ka upod sa isa ka pamatan-on nga lalaki.”
22Naghibubon-ot#Lev. 20:10; Deut. 22:22. si Susana kag nagsiling, “Wala ako sing pasingadtuan. Kon magpasugot ako sa inyo sarang ako mapapatay tungod sa sala nga adulteryo. Kon indi ako magpasugot, inyo ako sa gihapon maangkon. 23Pero mas maayo nga indi ako magpasugot bisan maangkon ninyo ako sang sa magpakasala ako batok sa Ginoo.” 24Dayon nagsinggit sia sa mabaskog nga tingog kag ang duha ka mga hukom nagsinggit man sang mga panumbongon batok sa iya, 25samtang ang isa sa ila nagdalagan sa pagbukas sang mga pwertahan.
26Sang pagkabati sang mga suloguon sa balay sang singgit, gilayon nga nagdalagan sila sa hardin paagi sa kilid nayon nga pwertahan agod ila mahibaluan kon ano ang natabo kay Susana. 27Ang mga hukom nagsugid sang ila istorya kag ang mga suloguon nakibot kag nagbatyag sing kahuya. Halin sadto, wala gid sing may naghambal kaangay sini nahanungod kay Susana.
Ang mga Hukom Nagpanaksi batok kay Susana
28Sang madason nga adlaw sa tapos nga makatipon ang mga tawo sa balay ni Joaquim, nag-abot ang duha ka mga hukom nga nagpamat-od sing lubos sa pagtuman sang ila malaut nga tinutuyo sa pagpapatay kay Susana. 29Sa atubang sang tanan nga mga tawo, nagsiling sila, “Pakadtua diri si Susana nga anak ni Helkias kag asawa ni Joaquim.” 30Sang mag-abot si Susana, kaupod niya ang iya mga ginikanan, mga kabataan kag ang tanan niya nga mga kaparientehan. 31Matahom kag makailila gid kaayo si Susana 32sa bagay nga ang duha ka malaut nga mga hukom nagmando nga kuhaon ang tabon sang iya guya agod nga magkalipay sila sa pagtan-aw sa iya. 33Naghinibi ang mga ginikanan ni Susana kag ang tanan nga yadto didto.
34Dayon nagtindog ang duha ka hukom sa atubang sang mga tawo, gintungtong nila ang ila mga kamot sa ulo ni Susana kag nagsugod sang ila mga panumbongon batok sa iya. 35Naghibi si Susana pero nagtangla sia sa langit tungod kay nagsalig sia sa Ginoo. 36Ang duha ka mga hukom naghatag sining panaksihon: “Nagalakat kami sa hardin sang magsulod ini nga babayi kaupod ang duha niya ka mga suloguon. Ginsiraduhan niya ang mayor nga pwertahan kag iya ginmanduan ang iya mga suloguon sa pagpauli. 37Dayon ang pamatan-on nga lalaki nga nagapanago sa hardin nagkadto sa iya kag naghulid sila nga duha. 38Sa pamusod kami sang hardin, kag sang makita namon ang nagakatabo, nagdalagan kami padulong sa ila 39kag nadakpan gid namon sila. Gindakop namon ang pamatan-on, pero mas makusog sia sang sa amon. Nagdalagan sia kag gin-abrihan ang mga pwertahan kag nagpalagyo, 40pero amon ginhawiran ini nga babayi. Ginpamangkot namon sia kon sin-o yadtong lalaki pero indi sia magsugid. Nagasumpa kami nga matuod ang amon panaksihon.” 41Tungod kay ang duha indi lamang mga pangulo sang komunidad kundi subong man mga hukom, ang mga tawo nagpati sa ila istorya kag ginpamatbatan nila nga patyon si Susana.
Si Daniel Nagluwas kay Susana
42Dayon si Susana nagsinggit sa mabaskog nga tingog, “O walay katapusan nga Dios, wala sing sarang matago sa imo, imo nahibaluan ang tanan sa wala pa ini matabo. 43Yari ako nga palatyon, pero ikaw nakahibalo nga wala ako sing sala, nga ining mga tawo nagabinutig. Ngaa bala nga kinahanglan patyon ako?”
44Nabatian sang Ginoo ang pangamuyo si Susana 45kag ginpadala niya ang pamatan-on nga si Daniel sa paghambal samtang nga ginadala si Susana agod patyon. 46Nagsinggit si Daniel, “Wala ako sing labot sa kamatayon sina nga babayi!”
47Nagbalikid ang tanan sa pagtulok sa iya kag nagpamangkot sila, “Ano ang buot mo silingon?”
48Nagtindog si Daniel sa atubang nila kag nagsiling, “Mga tawo sang Israel, daw ano ka buang sa inyo? Ginkondenar ninyo ining Israelinhon nga babayi nga patyon tungod lamang sa panaksihon nga subong sina? Wala gani ninyo gintinguhai ang pagtukib sang kamatuoran. 49Bistahon liwat ini nga kaso. Ining mga tawo naghatag sang butig nga panaksihon.”
50Gani ang tanan nga mga tawo nagbalik sa gilayon sa lugar diin ginhiwat ang pagbista kag ang mga opisyal nagsiling kay Daniel, “Ang Dios naghatag sa imo sang kaalam nga labaw sa masarangan sang imo edad, gani dali ka sa pag-upod sa amon kag isaysay sa amon ang luyag mo isiling.”
51Si Daniel nagsiling sa ila, “Separaha ninyo ang duha ka mga hukom kay usisaon ko sila sing tag-isaisa.” 52Dayon si Daniel nagtawag sang nahauna nga hukom kag nagsiling, “Ikaw malaut nga tigulang, karon pagasabton mo ang tanan nga mga sala nga imo nabuhat. 53Nagpamatbat#Exo. 23:7. ka sang wala nagakaigo nga mga paghukom. Imo ginsilutan ang mga wala sing sala kag ginhilway mo ang mga may sala walay sapayan nga ang Ginoo nagsiling, ‘Indi pag-ipapatay ang mga wala sing sala.’ 54Karon kon imo nakita sing matuod ang paghulid sang duha, isugid sa akon kon sa idalom sang ano nga kahoy sila nagbuhat sini?”
Ang hukom nagsabat, “Sa idalom sang kahoy nga ang mga duga ginabuhat nga goma.”
55Si Daniel nagsiling, “Maayo! Ina nga pagbinutig pagabayaran mo sang imo kabuhi. Ang anghel sang Ginoo namanduan na sa pagpihak#1:55 PAGPIHAK: Ini nga pulong pareho sang Griego nga pulong nga kon sayuron “diutay nga kahoy nga goma”. sa imo.”
56Dayon ginpalayo ang nahauna nga hukom kag gindala ang ikaduha sa atubang ni Daniel. Si Daniel naghambal sa hukom, “Daw taga-Canaan ka kag indi taga-Judea. Ang katahom sining babayi nagpadulom sang imo paghukom, kag ang kaibog nga lawasnon nagpagarok sang imo panghunahuna. 57Natuman mo ang imo mga handom sa mga babayi sang Israel tungod kay nahadlok sila sa imo, pero yari karon ang babayi sang Juda nga wala nagpasugot sa imo. 58Karon, isugid sa akon kon sa idalom sang ano nga kahoy sila naghulid.”
Nagsabat sia, “Sa idalom sang isa ka daku nga terebinto.”
59Si Daniel nagsiling, “Maayo! Ang imo pagbinutig pagabayaran mo sang imo kabuhi. Ang anghel sang Dios nagahulat nga nagauyat sang espada sa pag-utod#1:59 PAG-UTOD: Ini nga pulong pareho sang Griego nga pulong nga kon sayuron “daku nga terebinto”. sa imo. Dayon madula kamo nga duha.”
60Dayon ang tanan nga mga tawo nagsinggit kag nagdayaw sa Dios nga nagluwas sa ila nga nagasalig sa iya. 61Naakig sila batok sa duha ka mga hukom kay ginpamatud-an ni Daniel nga nagbutig sila sang nagsumpa sila. 62Ang#Deut. 19:16-21. Kasugoan ni Moises nagasiling nga ang tawo nga nagahatag sang binutig nga panaksihon magabaton sang silot nga ginpamatbat sa tawo nga ginsumbong. Gani ang duha ka mga hukom ginpapatay kag naluwas ang kabuhi sang babayi nga wala sing sala sadto nga adlaw. 63Ang mga ginikanan, bana kag tanan nga mga kaparientehan ni Susana nagdayaw sa Dios tungod kay napamatud-an nga binutig ang mga sumbong batok sa iya. 64Sugod sadto nga adlaw, si Daniel ginhangad sang mga tawo sing labi.
Currently Selected:
Susana 1: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012