Bel kag ang Dragon 1
1
Si Daniel kag ang mga Pari ni Bel
1Sang mapatay si Haring Astiahes, ginbuslan sia ni Haring Ciro sang Persia. 2Si Daniel isa sang mga suod nga kaupod ni Ciro, kag ginahangad niya sing labi si Daniel sang sa iban niya nga mga palamangkutan.
3Ang#Isa. 46:1; Jer. 51:44. mga taga-Babilonia may isa ka diosdios nga ginahingalanan kay Bel. Sa tagsa ka adlaw ang mga tawo naghalad sa iya sang dose ka sako sang pinili nga harina, kwarenta ka mga karnero kag singkwenta ka galon nga bino. 4Si Haring Ciro nagpati nga si Bel isa ka dios kag gani ginasimba niya ini adlaw-adlaw. Pero si Daniel nagsimba sang iya kaugalingon nga Dios.
5Sang isa ka adlaw ginpamangkot sang hari si Daniel, “Ngaa nga wala ka nagasimba kay Bel?”
Si Daniel nagsabat, “Wala ako nagasimba sa mga diosdios nga ginbuhat sang tawo. Ginasimba ko ang buhi lamang nga Dios nga nagbuhat sang langit kag sang duta kag Ginoo sang bug-os nga katawhan.”
6Ang hari nagpamangkot, “Kag wala bala ikaw nagapati nga ang amon dios nga si Bel matuod nga buhi? Wala mo bala makita kon daw ano kadamo sang iya makaon kag mainom sa tagsa ka adlaw?”
7Nagkadlaw si Daniel kag nagsabat, “Indi ka magpainto, O Kamahalan. Ining diosdios nga ginatawag mo kay Bel isa lamang ka lunang nga ginputos sang bronsi, wala gid ini sia sing may nakaon ukon may nainom.”
8-10Nangakig ang hari kag iya ginpatawag ang setenta ka mga pari ni Bel. Dayon iya sila ginsilingan, “Ginapaandaman ko kamo nga ipapatay ko kamo kon indi ninyo mapakita sa akon nga si Bel ang nagakaon sang mga ginahalad sa iya. Kon mapamatud-an ninyo nga si Bel ang nagakaon sini, ti ipapatay ko si Daniel nga nagasiling nga si Bel indi isa ka dios.”
Nagpasugot si Daniel sa ginsiling sang hari.
11Dayon tanan sila nag-upod sa hari kag nagkadto sila sa templo ni Bel. Ang mga pari nagsiling sa hari, “Kamahalan, magagwa kami kag ikaw ang magbutang sang mga pagkaon sa lamisa kag sa paghanda sang bino. Sa imo pagpauli, siraduhi ang pwertahan kag silyuhi ini sang imo selyo. 12Sa pagkaaga kon sa imo pagbalik, kon makita mo nga wala nakaon ni Bel ang tanan nga halad, ipapatay kami. Pero kon nakaon niya ang tanan, ipapatay si Daniel nga nagsumbong sing binutig batok sa amon.”
13Wala gid nagpangalisod ang mga pari tungod kay may nabuhat sila nga sekrito nga alagyan sa idalom sang lamisa sa templo sa diin sila nagasulod sa tagsa ka gab-i sa pagkaon sang mga halad.
14Sang malumbos ang mga pari, ginhanda sang hari ang mga pagkaon para kay Bel. Dayon si Daniel nagmando sa iya mga suloguon sa pagsabwag sing abo sa kabug-osan sang salog sa templo. Wala sing may nakakita sini luas lamang sa hari. Pagkatapos, naggwa sila sa templo, ginsiraduhan ang pwertahan, ginsilyuhan sang selyo sang hari kag nagpauli sila.
15Sa sina nga gab-i, sa kinaandan, ang mga pari upod ang ila mga asawa kag mga kabataan nagsulod sa templo paagi sa sekrito nga alagyan kag ila ginkaon ang tanan nga pagkaon kag gin-inom ang tanan nga bino.
16Aga pa sang madason nga adlaw, ang hari kag si Daniel nagkadto sa templo. 17Ang hari nagpamangkot, “Ano, Daniel, naguba bala ang selyo?”
Si Daniel nagsabat, “Wala, Kamahalan.”
18Sang mabuksan ang pwertahan, nakita sang hari nga wala na sing unod ang lamisa kag nagsinggit sia, “Makagagahom ka, O Bel! Ikaw ang matuod nga dios.”
19Pero si Daniel nagkadlaw kag nagsiling sa hari, “Sa wala pa ikaw makasulod, tan-awa ang salog kag sugiri ako kon kay sin-o mga agi sang tiil ang yara dira.”
20Ang hari nagsiling, “Makita ko ang agi sang mga tiil sang mga lalaki, mga babayi kag mga kabataan.” 21Nangakig gid sia sing tuman nga iya ginpadakop ang mga pari, ang katapo sang ila mga panimalay kag ginpaatubang sa iya. Gintudlo nila sa hari ang sekrito nga alagyan nga sa diin nagasulod sila sa tagsa ka gab-i agod magkaon sang mga pagkaon nga nahanda sa ibabaw sang lamisa. 22Gani, ginpapatay sang hari ang mga pari kag ginhatag niya si Bel kay Daniel nga nagdugmok sini kag nagguba sang iya templo.
Si Daniel Nagpatay sang Dragon
23May didto man nga isa ka daku nga dragon nga ginasimba sang mga taga-Babilonia. 24Sang isa ka adlaw, nagsiling ang hari kay Daniel, “Indi ka makasiling sa akon nga ining dios patay. Gani magsimba ka sa iya!”
25Si Daniel nagsabat, “Nagasimba ako sa Ginoo. Sia lamang ang buhi nga Dios. 26Kag kon pahanugotan mo ako, Kamahalan, patyon ko ini nga dragon nga indi ako maggamit sang espada ukon inuglampos.”
Ang hari nagsabat, “Ginapahanugotan ko ikaw.”
27Gani, si Daniel nagkuha sang alkitran, sang tambok kag mga buhok. Iya ini ginsamo kag ginlaga. Naghimo sia sing tinapay gikan sa iya ginsamo kag ginpakaon ini sa dragon. Sang makakaon sini ang dragon, nagdaku nga nagdaku ang tiyan sini kag nabusdik. Si Daniel nagsiling, “Amo ina nga sahi sang butang ang ginasimba ninyo nga mga taga-Babilonia.”
28Sang mabalitaan sang mga taga-Babilonia ang natabo, naghimo sila sang isa ka protesta batok sa hari. Nagsininggit sila, “Ang hari nangin-Judio. Primero, iya ginlaglag si Bel kag ginpapatay ang mga pari, kag karon iya ginpatay ang aton dragon.” 29Nagkadto sila sa hari kag ila sia ginpilit nga ihatag sa ila si Daniel. Ila ginpaandaman ang hari, “Kon magpamalibad ka, patyon namon ikaw upod ang imo panimalay.”
30Sang matalupangdan sang hari nga matuoron nila ang ila mga ginpanghambal, napilitan sia nga ihatag si Daniel sa ila. 31Ang#Dan. 6:16-24. mga tawo naghulog kay Daniel sa buho sang mga leon, sa diin ginpabayaan sia sa sulod sang anom ka adlaw. 32Pito tanan ka mga leon ang yadto didto sa buho kag sa tagsa ka adlaw, ginapakaon ini sila sing duha ka tawo kag duha ka karnero. Pero sa sulod sang anom ka adlaw wala gid sila ginhatagi sing pagkaon agod nga masiguro nila nga pagakaunon gid si Daniel.
Si Daniel Ginluwas gikan sa Buho sang mga Leon
33Sa sadto nga tion, yadto didto sa kadutaan sang Juda ang propeta nga si Habakuk. May linaga sia nga karne nga nalundan sang sinipad nga tinapay. Nagdala sia sini para sa mga tawo nga nagaani sa uma, 34sang ang anghel sang Ginoo naghambal sa iya, “Idul-ong ina nga pagkaon nga imo ginadala kag ihatag kay Daniel nga yara karon sa Babilonia sa buho sang mga leon.”
35Si Habakuk nagsabat, “Sir, wala gid ako nakakadto sa Babilonia kag wala ko man matultoli ang buho sang mga leon.”
36Gani#Ezeq. 8:3. ang anghel nag-uyat sa iya sa buhok kag gindala sia sa Babilonia subong kadasig sang hangin.#1:36 subong kadasig sang hangin: ukon paagi sa gahom sang iya espiritu. Ginbutang sia sang anghel malapit sa buho sang mga leon. 37Si Habakuk nagpanawag, “Daniel, Daniel, ginpadalhan ka sang Dios sang pagkaon. Yari kauna ini.”
38Sang mabatian ni Daniel si Habakuk, nagpangamuyo sia, “O Ginoo, imo ako gindumdom. Wala nimo ginapabayai ang mga nagahigugma sa imo.” 39Dayon nagtindog sia kag ginkaon ang pagkaon, kag dalidali nga ginbalik sang anghel si Habakuk sa iya balay.
40Sa ikapito nga adlaw sa tapos ginhulog si Daniel sa buho sang mga leon, ang hari nagkadto sa buho sa paglalaw sa iya. Sa iya pagsampot, nagsid-ing sia kag iya nakita si Daniel nga nagapungko. 41Nagsinggit ang hari, “O Ginoo nga Dios ni Daniel, daw ano ka makagagahom sa imo. Ikaw lamang ang Dios.” 42Gani iya ginbatak si Daniel gikan sa buho kag ginpahaboy niya ang mga tawo nga naghandom sa pagpatay kay Daniel. Kag ginkaon sila gilayon sang mga leon samtang nagatan-aw ang hari.
Currently Selected:
Bel kag ang Dragon 1: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012