Mga Taga-Roma 11

Ang Kaluoy sang Dios sa Israel

1Gani,#Fil. 3:5. mamangkot ako: Ginsikway bala sang Dios ang iya kaugalingon nga mga tawo? Wala gid! Ako mismo isa ka Israelinhon, isa ka kaliwat ni Abraham, kag isa ka katapo sang tribo ni Benjamin. 2Wala ginsikway sang Dios ang iya mga tawo nga iya ginpili halin sa ginsugoran. Nakahibalo kamo kon ano ang ginasiling sang kasulatan sa dinalan sa diin si Elias nagpakitluoy sa Dios batok sa Israel: 3“Ginoo,#1 Hari 19:10, 14. ginpamatay nila ang imo mga propeta kag ila ginpangguba ang imo mga altar. Ako na lang ang nabilin kag nagatinguha sila sa pagpatay sa akon.” 4Ano#1 Hari 19:18. bala ang ginsabat sa iya sang Dios? Ang Dios nagsiling sa iya, “May yara pa ako nga 7,000 ka mga tawo nga wala magsimba sa diosdios nga si Baal.” 5Amo man ini karon sa sini nga panahon: tungod sang kaayo sang Dios, may pila pa ka mga pinili sang Dios nga nabilin. 6Ang iya pagpili nasandig sa iya kaayo kag indi nasandig sa ila hinimuan. Kay kon ang pagpili sang Dios nasandig sa ginahimo sang mga tawo, ti, ang iya kaayo indi matuod nga kaayo.

7Ano karon? Ang mga tawo sang Israel wala makakita sang ila ginapangita. Ang nakakita sini amo lamang ang pila ka bilog nga ginpili sang Dios. Ang iban nagpabungol sa pagpanawag sang Dios. 8Ang#Deut. 29:4; Isa. 29:10. kasulatan nagasiling, “Ginpatig-a sang Dios ang ila mga tagipusoon kag mga hunahuna. Tubtob karon, ang ila mga mata indi makakita kag ang ila mga dulonggan indi makabati.” 9Kag si David nagasiling:

“Kabay nga madakop kag masiod sila sa ila mga piesta,

kabay nga mahulog sila kag masilutan!

10Kabay#Sal. 69:22-23 (LXX). nga mabulag ang ila mga mata, agod nga indi sila makakita,

kag sa tanan nga tion magbuloktot sila tungod sang ila mga kabudlayan.”

11Karon, mamangkot ako: Sang pagkasandad sang mga Judio, nahulog bala sila sa ila kalaglagan? Wala gid! Tungod sang ila paglalis, ang kaluwasan nag-abot sa mga Hentil, agod nga magkahisa ang mga Judio sa ila. 12Ang paglalis sang mga Judio nagdala sing bugana nga kaayuhan sa kalibutan, kag ang ila espirituhanon nga kakulangan nagdala sing madamo nga kaayuhan sa mga Hentil. Daw ano pa gid ayhan kadamo nga kaayuhan kon ang tanan nga mga Judio magbalik!

Ang Kaluwasan sang mga Hentil

13Karon nagahambal ako sa inyo nga mga Hentil: tungod gani kay apostol ako sa mga Hentil, magapabugal ako sang akon bulohaton. 14Ayhan sa paglaom nga magakahisa sa akon ang akon mga kasimanwa, kag tungod sini maluwas ang iban sa ila. 15Kay sang ginsikway sila, ang iban nga katawhan sa kalibutan nangin-abyan sang Dios. Ano pa gid ayhan kon mabaton na sila? Manginkabuhi ini para sa mga patay!

16Kon ang nahauna nga bahin sang tinapay nahalad sa Dios, ti, ang bilog nga tinapay iya man sang Dios, kag kon ang mga gamot sang kahoy nahalad sa Dios, ang mga sanga iya man sang Dios. 17Ang iban nga mga sanga sang gintanom nga kahoy nga olivo ginpang-utod kag ang sanga sang kahoy nga olivo sa talon ginsugpon sa iya. Kamo nga mga Hentil kaangay sinang olivo sa talon, kag karon nagaambit na kamo sang kusog kag sang bugana nga kabuhi sang mga Judio. 18Gani, indi ninyo paghikayan ang mga ginpang-utod pareho sang mga sanga. Wala gid kamo sang himpit nga kabangdanan sa inyo pagpabugal. Sanga man lang kamo, kag wala kamo nagasagod sang gamot, kundi ang gamot amo ang nagasagod sa inyo.

19Pero magasiling kamo, “Ang mga sanga gin-utod agod masugpon kita.” 20Matuod ini! Gin-utod sila tungod kay wala sila magtuo, pero kamo inyo yara nagaangot tungod kay nagtuo kamo. Ugaling indi kamo magpabugal nahanungod sini, kundi magkahadlok kamo. 21Kay kon ang Dios wala magpaiway sa pag-utod sang matuodtuod nga mga sanga nga amo ang mga Judio, nagahunahuna bala kamo nga magapaiway sia sa inyo? 22Diri naton makita kon daw ano ang kaayo kag kaid-id sang Dios. Maid-id sia sa mga nahulog, pero maayo sa inyo, kon magpadayon kamo sa iya kaayo. Ugaling kon indi kamo magpadayon, pagautdon man kamo. 23Kag ang mga Judio kon magtuo na sila, igabalik sila sa lugar nga ila natuonan, tungod kay ang Dios sarang makauli sa ila. 24Kamo nga mga Hentil kaangay sang sanga sang kahoy nga olivo sa talon nga gin-utod, kag dayon ginsugpon sa sanga sining gintanom nga kahoy nga olivo, bisan pa nga indi ini kinaandan sa kahoy. Ang mga Judio kaangay sang gintanom nga kahoy. Gani, mas labing mahapos para sa Dios ang pagsugpon sining gin-utod nga mga sanga, sa ginhalinan nila nga kahoy.

Ang Kaluoy sang Dios sa Tanan

25Mga utod, may isa ka tinago nga kamatuoran nga luyag ko nga inyo mahibaluan, agod nga indi kamo maghunahuna nga mga maalam na gid kamo. Amo ini ang kamatuoran: indi magpadayon ang pagkatig-a sang mga tawo sang Israel, kundi nga magapadayon lang ini tubtob nga ang tanan nga mga Hentil magpalapit sa Dios. 26Amo#Isa. 59:20-21 (LXX). ini ang pagkaluwas sang bug-os nga Israel suno sa ginasiling sang kasulatan:

“Magaabot halin sa Sion ang Manluluwas,

kag pagakuhaon niya ang tanan nga kalautan gikan sa mga kaliwat ni Jacob.

27Kag#Isa. 27:9 (LXX). nagsiling ang Dios, magahimo ako sa ila sini nga kasugtanan,

sa akon pagpatawad sang ila mga sala.”

28Ginsikway sang mga Judio ang Maayong Balita, gani nanginkaaway sila sang Dios tungod sa inyo nga mga Hentil. Pero tungod kay mga pinili sila sang Dios, mga abyan sila sang Dios tungod sang ila mga katigulangan. 29Kay ang Dios wala nagabaylo sang iya panghunahuna nahanungod sa iya ginapili kag ginabendisyunan. 30Sang una kamo nga mga Hentil wala magtuman sa Dios, pero karon nabaton ninyo ang kaluoy sang Dios tungod kay ang mga Judio wala magtuman. 31Sa amo man nga bagay, tungod sang kaluoy nga inyo nabaton, ang mga Judio karon wala nagatuman sa Dios, agod nga ila man mabaton karon#11:31 Ang iban nga mga manuskrito wala nagalakip sangkaron. ang kaluoy sang Dios. 32Kay ginhimo sang Dios ang tanan nga mga tawo nga binilanggo sang ila kaugalingon nga pagkadi-matinumanon, agod nga mapakita niya sa ila tanan ang iya kaluoy.

Ang Pagdayaw sa Dios

33Daw#Isa. 55:8; Klm. Sol. 17:1. ano kadamo ang kamanggaran sang Dios! Daw ano kadalom sang iya kaalam kag ihibalo! Sin-o bala ang makasaysay sang iya mga paghukom? Sin-o bala ang makahangop sang iya mga paagi? 34Ang#Isa. 40:13 (LXX). kasulatan nagasiling:

“Sin-o bala ang makahibalo sang hunahuna sang Ginoo?

Sin-o bala ang makalaygay sa iya?

35Sin-o#Job 41:11. bala ang may ginhatag sa Dios,

nga ang Dios dapat magbayad sa iya?”

36Kay#1 Cor. 12:12. ang tanan nga mga butang naghalin sa Dios, kag ini tanan gintuga tungod sa iya kag para sa iya. Sa Dios ang kadungganan nga wala sing katapusan! Kabay pa.

Currently Selected:

Mga Taga-Roma 11: MBBHIL12

Highlight

Copy