Bugna 14
14
Ang Kordero kag ang Iya mga Tawo
1Dayon#Ezeq. 9:4; Bug. 7:3. nagtan-aw ako, kag nakita ko ang Kordero nga nagatindog didto sa Bukid sang Sion. Upod sa iya amo ang 144,000 ka mga tawo nga may ngalan sang Kordero kag sang iya Amay nga nasulat sa ila mga agtang. 2Kag nakabati ako sing isa ka tingog halin sa langit nga ang gahod sini daw daganas sang isa ka daku nga busay, kag daw matunog nga daguob. Ang tingog nga akon nabatian daw tukar sang mga manug-arpa nga nagakutingkuting sang ila mga arpa. 3Ang 144,000 ka mga tawo nagtindog nga nagaatubang sa trono, sa apat ka buhi nga mga tinuga kag sa mga katigulangan. Nagkanta sila sang bag-o nga ambahanon nga wala sing may makahibalo, kundi sila lamang nga gintubos halin sa duta. 4Sila amo ang mga tawo nga wala magdagta sang ila kaugalingon kay wala sila magpakighilawas sa mga babayi. Tungod sini sila mga birhen. Nagasunod sila sa Kordero bisan diin sia magkadto. Gintubos sila halin sa nabilin nga mga tawo kag sila ang nahauna nga ginhalad sa Dios kag sa Kordero. 5Wala#Sof. 3:13. gid sila nagbutig kay wala sila sing kasawayan.
Ang Tatlo ka mga Anghel
6Dayon nakita ko ang isa pa gid ka anghel nga nagalupad sing mataas sa kahawaan, nga may mensahe sang wala sing katapusan nga Maayong Balita, nga iwali sa tanan nga mga tawo sa duta, sa tagsa ka rasa, tribo, linggwahe, kag pungsod. 7Nagsiling sia sa mabaskog nga tingog, “Pasidunggi ninyo ang Dios kag dayawa ang iya pagkagamhanan! Kay nag-abot na ang tion nga iya pagahukman ang tanan nga mga tawo. Simbaha ninyo sia nga nagtuga sang langit, duta, dagat, kag sang mga tuboran sang tubig!”
8Ang#Isa. 21:9; Jer. 51:8; Bug. 18:2. ikaduha nga anghel nagsunod sa nahauna nga nagasiling, “Napukan sia! Ang daku nga Babilonia napukan! Ginpainom niya ang tanan nga mga katawhan sang maisog nga bino sang iya pagpakighilawas!”
9Ang ikatlo nga anghel nagsunod sa duha nga nahauna kag nagasiling sa mabaskog nga tingog, “Ang bisan sin-o nga nagasimba sa sapat kag sa iya imahen, kag nagabaton sang marka sa iya agtang ukon sa iya kamot, 10magainom#Isa. 51:17; Gen. 19:24; Ezeq. 38:22. man sang bino nga amo ang kaakig sang Dios, nga iya gintigis nga wala sing simbog sa kupa sang iya kaakig! Ang tanan nga nagahimo sini pagapaantuson sa kalayo kag asupre sa atubang sang balaan nga mga anghel kag sang Kordero. 11Ang#Isa. 34:10. aso sang kalayo nga nagapaantos sa ila nagatub-ok nga wala sing katubtoban. Wala sing kapahuwayan sa adlaw kag sa gab-i sa mga nagasimba sa sapat kag sa iya imahen, ang bisan sin-o nga may marka sang iya ngalan.”
12Nagakinahanglan ini sing pagbatas sa bahin sang mga tumoluo, nga nagatuman sang mga sugo sang Dios kag mga matutom kay Jesus.
13Dayon nabatian ko ang isa ka tingog halin sa langit nga nagasiling, “Isulat ining masunod: Malipayon ang mga katawhan nga sugod karon nagakalamatay sa pag-alagad sa Ginoo!”
Nagsabat ang Espiritu, “Huo, matuod gid, maagom nila ang kapahuwayan sa ila pagpangabudlay, tungod kay pagadalhon nila ang mga balos sang ila pag-alagad.”
Ang Pag-ani sang Duta
14Dayon#Dan. 7:13. nagtan-aw ako, kag may nakita ako nga puti nga panganod, kag sa panganod may nagapungko nga daw isa ka tawo, nga may korona nga bulawan sa iya ulo, kag may matalom nga garab sa iya kamot. 15Dayon#Joel 3:13. may isa pa gid ka anghel nga naggwa halin sa templo kag nagsinggit sing mabaskog sa nagapungko sa panganod, “Gamita ang imo garab kag mag-ani, tungod kay ang nagakaigo nga tion nag-abot na. Ang duta alanyon na!” 16Dayon ang nagapungko sa panganod naghabyog sang iya garab sa duta, kag ang alanyon sa duta gintipon.
17Dayon nakita ko ang isa naman ka anghel nga naggwa sa templo sa langit, kag may matalom man sia nga garab.
18Dayon ang isa pa gid ka anghel nga gintugyanan sang kalayo naggwa sa altar. Nagsinggit sia sing mabaskog sa anghel nga may matalom nga garab, “Gamita ang imo garab, kag gutraba ang mga pinungpong sang ubas sa talamnan sang ubas sa duta, tungod kay ang mga ubas luto na!” 19Gani ginhabyog sang anghel ang iya garab sa duta, gingutrab ang mga pinungpong sang ubas sa balagon, kag ginpanghaboy ini sa pulogaan sang daku nga kaakig sang Dios. 20Ang#Isa. 63:3; Pan. 1:15; Bug. 19:15. mga ubas ginpuga sa pulogaan sa gwa sang siudad, kag ang dugo nagbaha halin sa pulogaan sang ubas sing 300 ka kilometro ang kalawigon, kag mga isa ka dupa ang kadalumon.
Currently Selected:
Bugna 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
