Mga Salmo 88
88
Pagpangayo sing Bulig#TITULO SA HEBREO: Salmo sang barangay ni Core; ambahanon. Binalaybay ni Heman nga Ezranhon.
1O Ginoo Dios nga akon manluluwas, nagapanawag ako sa imo sa bug-os nga adlaw,
kag sa kagab-ihon nagapalapit ako sa imo atubang.
2Pamatii ang akon pangamuyo,
pamatii ang akon pagpangayo sing bulig!
3Madamo gid nga mga kalisdanan ang nag-abot sa akon
sa bagay nga daw mapatay na gid ako.
4Kaangay ako sang iban nga tagumatayon,
nadula ang tanan ko nga kusog.#88:4 nadula ang tanan ko nga kusog: ukonwala sing bulig para sa akon.
5Ginbayaan ako upod sa mga patay,
kaangay ako sang ginpatay nga nagahamyang sa ila mga lulobngan,
nga imo ginkalimtan sing bug-os
nga indi mo na gid matabangan.
6Ginhaboy mo ako sa kadadalman sang lulobngan,
didto sa labing madulom kag labing madalom nga buho.
7Ang imo kaakig mabug-at nga nagapilpil sa akon,
kag kaangay sang mga balod nga naglugdang sa akon.
8Ginbuot mo nga sikwayon ako sang akon mga abyan,
ginhimo mo ako nga kangil-aran sa ila.
Nakibon ako kag indi makapalagyo,
9ang akon mga mata nagapalanghuyos tungod sa pag-antos.
O Ginoo, adlaw-adlaw nagapanawag ako sa imo,
kag nagabayaw ako sang akon mga kamot sa imo sa pangamuyo.
10Nagahimo ka bala sing mga milagro para sa mga patay?
Nagabangon bala sila kag nagadayaw sa imo?
11Ginapabutyag bala ang imo mapinadayunon nga gugma sa lulobngan,
ukon ang imo pagkamatutom sa lugar sang kalaglagan?
12Makita bala ang imo mga milagro sa sadto nga lugar sang kadudulman,
ukon ang imo kaayo sa duta sang mga nagkalamatay?
13O Ginoo, nagapanawag ako sa imo sa pagpangayo sing bulig,
agaaga nagapangamuyo ako sa imo.
14Ngaa bala ginasikway mo ako, O Ginoo?
Ngaa bala nagapanago ka sa akon?
15Halin sang pamatan-on pa ako nag-antos ako nga yara sa bibi sang kamatayon,
nakapoy na gid ako sa kabug-at sang imo mga silot.
16Ang imo nagabalingaso nga kaakig nagligsa sa akon,
ang imo makahaladlok nga mga pagsalakay nagalaglag sa akon.
17Sa bug-os nga adlaw ginlikupan nila ako subong sang baha,
ginakibon nila ako.
18Ginbuot mo nga sikwayon ako bisan pa sang akon suod nga mga abyan,
ang akon lamang kaupod amo ang kadudulman.
Currently Selected:
Mga Salmo 88: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
