Mga Salmo 27
27
Pangamuyo sa Pagdayaw#TITULO SA HEBREO: Ni David.
1Ang Ginoo amo ang akon kapawa kag kaluwasan,
wala ako sing bisan sin-o nga kahadlukan.
Ang Ginoo nagaapin sa akon sa tanan nga katalagman,
wala ako sing kahadlukan.
2Kon salakayon ako sang malaut nga mga tawo sa tuyo nga patyon ako,
nagakasandad kag nagakapukan sila.
3Bisan pa ginalibutan ako sang bug-os nga hangaway,
wala ako sing kahadlukan,
bisan pa nga salakayon ako sang mga kaaway,
sa gihapon magasalig ako sa Dios.#27:3 sa gihapon magasalig ako sa Dios: ukonindi ako madulaan sing kaisog.
4Isa lamang ka butang ang akon ginapangayo sa Ginoo,
isa lamang ka butang ang akon naluyagan:
sa pag-estar sa balay sang Ginoo sa bug-os ko nga kabuhi,
sa pagpamalandong didto sang iya kaayo,
kag sa pagpangayo sang iya pagtuytoy.
5Taguon niya ako sa iya palasilungan sa tion sang kinagamo,
iya ako tipigan nga indi maano sa sulod sang iya Templo,
kag iya ako ipahamtang sing malig-on sa ibabaw sang mataas nga igang.
6Gani pagadag-on ko ang akon mga kaaway nga nagalibot sa akon.
Sa daku nga kasadya magadulot ako sing mga halad sa iya Templo,
magakanta kag magadayaw ako sa Ginoo!
7Pamatii ako, O Ginoo, sa akon pagpanawag sa imo!
Kaluoyi kag sabta ako!
8Ang akon tagipusoon nagsiling nga nagsugo ka, “Dali kamo kag magsimba sa akon.”
Nagsabat ako, “Mapalapit ako, O Ginoo.”
9Indi ka magpanago sa akon!
Indi ka magkaakig sa akon,
indi man pagsikwaya ang imo alagad.
Ikaw ang akon bulig,
indi man ako pagbayai kag pagpatumbayai,
O Dios nga akon manluluwas!
10Ang akon amay kag iloy ayhan magabiya sa akon,
pero ikaw, O Ginoo, magasapupo sa akon.
11Tudloi ako, O Ginoo, sang luyag mo nga himuon ko,
kag tuytoyi ako sa dalan nga wala sing katalagman,
tungod kay madamo ang akon mga kaaway.
12Indi ako pagpabay-i sa akon mga kaaway,
nga nagasalakay sa akon sa mga kabutigan kag mga pagpamahog.
13Akon nahibal-an nga magakabuhi ako sa pagtan-aw
sang kaayo sang Ginoo sa sini nga duta sa diin ang iya mga katawhan nagaestar.
14Magsalig sa Ginoo!
Magtuo kag indi magdula sing paglaom.
Magsalig sa Ginoo!
Currently Selected:
Mga Salmo 27: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
