Mga Salmo 25
25
Pangamuyo agod Tuytoyan kag Apinan#TITULO SA HEBREO: Ni David.
1Sa imo, O Ginoo, nagapangamuyo ako,
2Dios ko, sa imo nagasalig ako.
Luwasa ako sa kahuloy-an sang pagkalutos,
indi pag-itugot nga kadlawan ako sang akon mga kaaway!
3Indi malutos ang mga nagasalig sa imo,
kundi yadtong madali magbato sa imo.
4Tudloi ako sang imo mga dalanon, O Ginoo,
ipakilala man ini sa akon.
5Tudloi ako sa pagkabuhi suno sa imo kamatuoran,
kay ikaw ang akon Dios nga nagaluwas sa akon.
Sa tanan nga tion nagasalig ako sa imo.
6O Ginoo, dumdoma man ang imo kaayo kag mapinadayunon nga gugma,
nga imo ginpakita halin pa gid sang una.
7Patawara man ang akon mga sala kag mga kasaypanan sang akon pagkapamatan-on,
tungod sang imo mapinadayunon nga gugma kag kaayo,
dumdoma ako, O Ginoo!
8Tungod kay ang Ginoo matarong kag maayo,
ginatudloan niya ang mga makasasala sang dalan nga ila pagaagyan.
9Ginatuytuyan niya ang mapainuboson sa matarong nga dalan,
kag iya sila ginatudloan sang iya kabubot-on.
10Sa gugma kag katutom iya ginatuytuyan
ang tanan nga nagatuman sang iya kasugtanan kag sang iya mga sugo.
11Tumana ang imo ginsaad, O Ginoo, kag patawara ang akon mga sala,
kay tama ini kadamo.
12Ang mga nagakahadlok sa Ginoo
pagatudloan niya sang dalan nga dapat nila agyan.
13Magamainuswagon sila sa gihapon,
kag ang ila kaanakan magapanag-iya sang duta.
14Ang Ginoo abyan sang tanan nga nagatuman sa iya,
kag ginapalig-on niya sa ila ang iya kasugtanan.
15Sa tanan nga tion nagapabulig ako sa Ginoo,
kag iya ako ginaluwas sa katalagman.
16Tamda ako, O Ginoo, kag kaluoyi ako,
tungod kay isahanon lang ako kag maluya.
17Kuhaa man ang akon mga palaligban,
kag luwasa ako sa tanan nga mga kagamo.
18Talupangda ang akon kalisod kag pag-antos,
kag patawara ang tanan ko nga mga sala.
19Tan-awa bala ang tanan ko nga mga kaaway,
tan-awa kon daw ano ang ila pagdumot sa akon!
20Apini kag luwasa ako,
ipahilayo sa akon ang kalutosan.
Nagadangop ako sa imo agod apinan.
21Kabay nga ang akon kaayo kag pagkamasaligan magtipig sa akon,
tungod kay nagasalig ako sa imo.
22Sa tanan nila nga kalisdanan,
luwasa ang imo mga tawo nga Israelinhon, O Dios!
Currently Selected:
Mga Salmo 25: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
