Numeros 25
25
Ang mga Tawo sang Israel sa Peor
1Sang ang mga Israelinhon nagpahamtang sang ila kampo sa Kapatagan sang Akasya, ang mga lalaki nagpakighilawas sa mga babayi nga Moabnon nga yadto didto. 2Ini nga mga babayi nag-agda sa ila sa mga seremonya sa pagdulot sa mga dios sang Moab. Ang mga Israelinhon nagkaon sang mga karne gikan sa sini nga mga dulot kag nagsimba sa dios, 3nga si Baal sang Peor. Gani ang Ginoo naakig sa ila, 4kag nagsiling kay Moises, “Dalha ang tanan nga mga pangulo sang Israel, kag sa pagtuman sa akon, pamatya sila sa udtong adlaw,#25:4 sa udtong adlaw: ukonsa atubang sang mga tawo. agod indi na ako magkaakig sa sini nga mga tawo.” 5Si Moises nagsiling sa mga opisyales, “Ang tagsatagsa sa inyo magpamatay sang tanan nga mga lalaki sa inyo tribo nga nagasimba kay Baal sang Peor.”
6Ang isa ka Israelinhon nagdala sing isa ka babayi nga Midianhon sa sulod sang iya tolda samtang nagatan-aw si Moises kag ang bug-os nga katilingban, sang sila nagalalaw sa pwertahan sang Tolda sang presensya sang Ginoo. 7Sang makita ni Fineas, nga anak nga lalaki ni Eleazar kag apo ni Aaron nga pari, nagtindog sia kag naghalin sa katilingban. Nagkuha sia sing bangkaw, 8ginsunod niya ang lalaki kag babayi sa sulod sang tolda, kag gintuhog niya sila nga duha sang bangkaw. Sa sini nga paagi nag-untat ang pamalatian nga nagalaglag sang Israel, 9pero ang mga tawo nga nagkalamatay na 24,000.
10Ang Ginoo nagsiling kay Moises, 11“Ginpaugdaw ni Fineas ang akon kaakig sa mga tawo sang Israel tungod sang iya ginhimo. Indi sia magtugot sa pagsimba sa iban nga dios luas sa akon, kag amo ini ang kabangdanan nga wala ko sila paglaglaga sa akon kaakig. 12Gani singgana sia nga magahimo ako sing kasugtanan sa iya nga magapadayon sa tanan nga panahon nga palaabuton. 13Sia kag ang iya mga kaliwat manginpermanente nga mga pari, tungod kay wala sia magtugot sang bisan sin-o sa pag-agaw sang akon lugar, kag tungod sang iya ginhimo ginpatawad ang sala sang mga tawo.”
14Ang ngalan sang Israelinhon nga ginpatay upod sa babayi nga Midianhon amo si Zimri nga anak ni Salu, pangulo sang isa ka panimalay sa tribo ni Simeon. 15Ang ngalan sang babayi amo si Cozbi. Si Zur, nga iya amay, pangulo sang isa ka grupo sang mga kabarangayan sang Midianhon.
16Ang Ginoo nagsugo kay Moises, 17“Salakaya ang mga Midianhon kag laglaga sila, 18tungod sang kalautan nga ila ginhimo sa inyo sang gindayaan nila kamo sa Peor, kag tungod kay Cozbi, nga ginpatay sa tion sang pamalatian sa Peor.”
Currently Selected:
Numeros 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
