Mateo 9

Gin-ayo ni Jesus ang Isa ka Paralitiko

(Mar. 2:1-12; Luc. 5:17-26)

1Nagsakay si Jesus sa sakayan pabalik sa tabok sang linaw, kag nag-abot sia sa iya ginaestaran nga banwa,#9:1 SA IYA GINAESTARAN NGA BANWA: Capernaum (tan-awa ang 4:13). 2sa diin may mga tawo nga nagdala sa iya sing isa ka paralitiko nga nagahigda sa iya higdaan. Sang nakita ni Jesus kon daw ano kadako sang ila pagtuo nagsiling sia sa paralitiko, “Anak, magpakabakod ka! Ang imo mga sala ginapatawad.”

3Dayon may mga manunodlo sang Kasugoan didto nga nagsiling sa ila kaugalingon, “Ini nga tawo nagahambal batok sa Dios!”

4Si Jesus nga nakahibalo sang ila ginapanghunahuna nagsiling, “Ngaa bala nagapanghunahuna kamo sing malain nga mga butang? 5Diin bala sini ang mas mahapos isiling, ‘Ang imo mga sala ginapatawad,’ ukon ang pagsiling, ‘Bangon ka kag maglakat?’ 6Karon pamatud-an ko sa inyo nga ang Anak sang Tawo may gahom sa duta sa pagpatawad sang mga sala.” Gani nagsiling sia sa paralitiko, “Bangon ka, dalha ang imo higdaan kag magpauli!”

7Ang paralitiko nagbangon kag nagpauli. 8Sang pagkakita sini sang mga tawo, hinadlukan sila kag gindayaw nila ang Dios tungod sang awtoridad nga iya ginhatag sa mga tawo.

Gintawag ni Jesus si Mateo

(Mar. 2:13-17; Luc. 5:27-32)

9Naghalin si Jesus sa sadto nga lugar, kag sang nagalakat sia nakita niya ang isa ka manugsukot sang buhis nga ginhingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.”

Nagtindog si Mateo kag nagsunod sa iya.

10Sang#Luc. 15:1-2. nagakaon si Jesus sa balay ni Mateo,#9:10 sa balay ni Mateo: ukonsa iya (kay Jesus) balay. madamo nga mga manugsukot sang buhis kag iban nga mga makasasala ang nag-abot kag nag-upod sa iya kag sa iya mga gintuton-an sa pagkaon. 11May mga Fariseo nga nakakita sini kag nagpamangkot sila sa iya mga gintuton-an, “Ngaa bala nga ang inyo manunodlo nagakaon upod sa mga manugsukot sang buhis kag sa iban pa nga mga makasasala?”

12Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbulong, kundi ang mga masakiton lang. 13Lakat#Mat. 12:7; Os. 6:6. kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon luyag, kundi ang pagkamaluloy-on.’ Kay wala ako mag-abot sa pagtawag sang matarong nga mga tawo kundi sang mga makasasala.”

Ang Pamangkot Nahanungod sa Pagpuasa

(Mar. 2:18-22; Luc. 5:33-39)

14Dayon ang mga sumolunod ni Juan nga manugbautiso nagkadto kay Jesus nga nagapamangkot, “Ngaa bala nga kami kag ang mga Fariseo nagapuasa sing masunson, pero ang imo mga gintuton-an wala gid nagapuasa?”

15Si Jesus nagsabat, “Magakasubo bala ang mga inagda sa kasal samtang ang nobyo kaupod pa nila? Pero magaabot ang adlaw nga ang nobyo pagakuhaon sa ila kag amo na ina ang ila pagpuasa.

16“Wala sing bisan sin-o nga nagatukap sing bag-o nga panapton sa daan nga bayu kay ang bag-o nga panapton magakulo kag magagisi sang bayu, kag ang iya gisi magadaku pa gid. 17Wala man sing bisan sin-o nga nagasulod sang bag-o nga bino sa daan nga sulodlan nga panit, kay kon himuon niya ini ang panit nga sulodlan sang bino mabusdik, kag ang bino mauyang kag ang sulodlan nga panit indi na mapuslan. Sa baylo sini, ginasulod ang bag-o nga bino sa bag-o nga sulodlan nga panit, kag ini sila magadugay.”

Ang Anak nga Babayi sang Isa ka Pangulo nga Judio kag ang Babayi nga Nagtandog sang Kunop ni Jesus

(Mar. 5:21-43; Luc. 8:40-56)

18Sang si Jesus nagahambal sini sa ila, may isa ka pangulo nga Judio nga nagpalapit sa iya, nagluhod sa iya atubang kag nagsiling, “Ang akon anak nga babayi bag-o gid lang mapatay, pero kadtoi kag tanduga kag mabuhi sia liwat.”

19Gani si Jesus nagtindog kag nagsunod sa iya, kag nag-upod man ang iya mga gintuton-an.

20May isa ka babayi nga nagaantos tungod sang pagpanggwa sang madamo nga dugo sa iya sa sulod sang dose ka tuig. Nagpalapit sa likod nayon ni Jesus kag gintandog ang sidsid sang iya kunop. 21Ang babayi nagsiling sa iya kaugalingon, “Kon matandog ko lang ang iya kunop magaayo ako.”

22Nagliso si Jesus kag nakita niya ang babayi kag nagsiling, “Anak, magpakabakod ka! Ang imo pagtuo nag-ayo sa imo.” Sa gilayon nag-ayo ang babayi.

23Dayon nagsulod si Jesus sa balay sang pangulo nga Judio. Sang nakita niya ang mga musikero para sa lubong kag ang mga tawo nga nagaginahod, 24nagsiling sia, “Gwa kamo anay tanan! Ang bata indi patay, kundi nagakatulog lang!” Kag nagkadlaw sila sa pagyaguta sa iya. 25Sang nakagwa na ang mga tawo, si Jesus nagsulod sa kwarto sang bata kag gin-uyatan niya sia sa kamot, kag nagbangon sia. 26Ang balita nahanungod sini naglapnag sa bug-os nga bahin sang sadto nga banwa.

Gin-ayo ni Jesus ang Duha ka Bulag

27Naghalin si Jesus sa sadto nga lugar, kag sang nagalakat sia, may duha ka bulag nga nagsunod sa iya nga nagasinggit, “Kaluoyi kami, Anak ni David!”

28Sang makasulod na si Jesus sa isa ka balay nagpalapit sa iya ang duha ka tawo nga bulag kag iya sila ginpamangkot, “Nagatuo bala kamo nga ako makasarang sa pag-ayo sa inyo?”

Nagsabat sila, “Huo, Sir!”

29Dayon gintandog ni Jesus ang ila mga mata kag nagsiling, “Tungod sang inyo pagtuo, magaayo ang inyo mga mata!” 30Kag makakita na sila. Si Jesus nagpaandam gid sa ila, “Indi kamo magpanugid sini bisan kay sin-o!”

31Pero naglakat sila kag nagpanugid sang balita nahanungod kay Jesus sa bug-os nga bahin sang sadto nga banwa.

Gin-ayo ni Jesus ang Isa ka Apa

32Sang nagapauli ang duha ka bulag nga gin-ayo ni Jesus, may iban nga mga tawo nga nagdala sa kay Jesus sang isa ka tawo nga indi makahambal tungod kay ginagamhan sia sing demonyo. 33Sang matabog na ni Jesus ang demonyo, naghambal ang apa kag natingala ang tanan nga nagasiling, “Wala pa gid kami sing may nakita nga subong sini sa Israel!”

34Pero#Mat. 10:25; 12:24; Mar. 3:22; Luc. 11:15. ang mga Fariseo nagsiling, “Ang prinsipe sang mga demonyo amo ang naghatag sa iya sang gahom sa pagtabog sang mga demonyo.”

Naluoy si Jesus sa mga Tawo

35Dayon#Mat. 4:23; Mar. 1:39; Luc. 4:44. si Jesus naglibot sa tanan nga mga kabanwahanan kag mga kabarangayan. Nagpanudlo sia sa ila mga sinagoga, nagwali sang Maayong Balita nahanungod sang paghari sang Dios, kag nagpang-ayo sang mga tawo sa ila tanan nga mga masakit kag balatian. 36Sang#Num. 27:17; 1 Hari 22:17; 2 Cron. 18:16; Ezeq. 34:5; Mar. 6:34. makita niya ang madamo nga mga tawo, naluoy gid sia sa ila tungod kay nagapalibog kag nagatalangtalang sila kaangay sang mga karnero nga wala sing manugbantay. 37Gani#Luc. 10:2. nagsiling sia sa iya mga gintuton-an, “Malapad ang alanyon, ugaling diutay lang ang mangangani. 38Magpangamuyo kamo sa tag-iya sang alanyon, agod magpadala sia sang dugang nga mga mangangani sa pagtipon sang iya patubas.”

Currently Selected:

Mateo 9: MBBHIL12

Highlight

Copy

Compare