Mateo 3
3
Ang Pagwali ni Juan nga Manugbautiso
(Mar. 1:1-8; Luc. 3:1-18; Juan 1:19-28)
1Sa sadtong mga adlaw nag-abot si Juan nga manugbautiso nga nagawali sa desierto sang Judea. 2Nagsiling#Mat. 4:17; Mar. 1:15. sia, “Untati ninyo ang pagpakasala, kay ang Ginharian sang langit malapit na!” 3Si Juan#Isa. 40:3 (LXX). amo ang tawo nga gintumod ni Isaias nga propeta sang magsiling sia:
“Nagawali sing mabaskog ang isa ka tawo sa desierto,
‘Amana ninyo ang alagyan para sa Ginoo,
maghimo kamo sing tadlong nga dalan nga iya pagaagyan!’”
4Ang#2 Hari 1:8. bayu ni Juan nahimo sa bulbol sang kamelyo, kag ang iya paha panit. Ang iya kalan-on apan kag dugos sa talon. 5Nagkadto sa iya ang mga tawo nga halin sa Jerusalem, halin sa bug-os nga probinsya sang Judea kag halin sa tanan nga mga lugar sa palibot sang Suba sang Jordan. 6Gintuad nila ang ila mga sala kag ginbautisohan niya sila sa Jordan.
7Sang#Mat. 12:34; 23:33. pagkakita ni Juan nga madamo ang mga Fariseo kag mga Saduceo nga nagpalapit sa iya sa pagpabautiso, nagsiling sia sa ila, “Mga kaliwat sang man-og! Sin-o bala ang nagsiling sa inyo nga makapalagyo kamo sa kaakig sang Dios nga madali na lang mag-abot? 8Pamatud-i ninyo sa inyo mga buhat nga naghinulsol kamo sang inyo mga sala. 9Indi#Juan 8:33. kamo maghunahuna nga makapalagyo kamo sa silot paagi sa pagsiling nga si Abraham amo ang inyo amay. Nagasiling ako sa inyo nga ang Dios makahimo sining mga bato nga mga anak ni Abraham! 10Ang#Mat. 7:19. Dios handa na sa pagwasay sang mga kahoy sa ila mga gamot. Ang tagsa ka kahoy nga indi maayo ang bunga pagatapson kag ihaboy sa kalayo. 11Nagabautiso ako sa inyo sang tubig sa pagpakilala nga naghinulsol kamo, pero ang magaabot nga dason sa akon magabautiso sa inyo sang Espiritu Santo kag sang kalayo. Mas gamhanan pa sia sang sa akon, kag indi gani ako takos bisan pa sa pagbitbit sang iya mga sandalyas. 12Ginauyatan#Klm. Sol. 5:14, 23. na niya ang iya inugpahangin sa pagpain sang tinggas sa upa. Dayon pagatipunon niya ang matinggas nga mga uyas sa iya bodega, pero pagasunogon niya ang upa sa kalayo nga indi gid mapalong.”
Ang Pagbautiso kay Jesus
(Mar. 1:9-11; Luc. 3:21-22)
13Dayon nag-abot si Jesus sa Jordan halin sa Galilea, kag nagkadto sia kay Juan sa pagpabautiso. 14Si Juan indi kuntani magbautiso sa iya nga nagasiling, “Ako ang dapat magpabautiso sa imo, kag ikaw pa karon ang nagpalapit sa akon?”
15Pero si Jesus nagsabat sa iya, “Sa subong, sigi lang. Kay sa sini nga paagi ginatuman ta ang tanan nga ginapaabot sang Dios.” Dayon nagpasugot si Juan.
16Gani ginbautisohan si Jesus. Sa gilayon sang pagtakas niya sa tubig, nag-abri ang langit kag nakita niya ang Espiritu sang Dios nga nagkunsad subong sang isa ka pating kag naghapon sa iya. 17Kag#Gen. 22:2; Sal. 2:7; Isa. 42:1; Mat. 12:18; 17:5; Mar. 1:11; Luc. 9:35. may tingog gikan sa langit nga nagsiling, “Amo ini ang hinigugma ko nga Anak nga akon gid nahamut-an.”
Currently Selected:
Mateo 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
