Levitico 5
5
Mga Kaso nga Ginakinahanglan ang mga Halad tungod sa Sala
1“Ang mga halad tungod sa sala ginakinahanglan sa masunod nga mga kaso.
“Kon ang isa ka tawo ginpatawag sa pagsaksi sa korte kag indi sia magsugid nahanungod sang iya nakita kag nabatian, may salabton sia tungod sini.
2“Kon ang bisan sin-o makatandog sing indi hungod sang bisan ano nga butang nga mahigko subong sang isa ka patay nga sapat, mangindi-matinlo sia kag nakalapas sa tion nga matalupangdan niya ang iya nahimo.
3“Kon ang bisan sin-o makatandog sing indi hungod sang bisan ano nga mahigko nga naghalin sa iban nga tawo, bisan ano man ini nga butang, nakalapas sia sa tion nga matalupangdan niya ang iya nahimo.
4“Kon ang bisan sin-o nga makatabinas sa pagsumpa sang bisan ano nga butang, nakalapas sia sa tion nga matalupangdan niya ang iya nahimo.
5“Kon ang isa ka tawo nakalapas, kinahanglan magtuad sia sang iya sala 6kag subong silot tungod sang iya sala, dapat magdala sia sa akon sang isa ka karnero ukon kanding nga babayi subong isa ka halad. Ang pari magadulot sang halad tungod sa sala sang sina nga tawo.
7“Kon ang isa ka tawo indi makasarang sa pagdulot sang isa ka karnero ukon kanding, magdala sia sa akon subong bayad sang iya sala sing duha ka mga pating ukon duha ka mga tukmo, ang isa para sa halad tungod sa sala kag ang isa para sa halad nga sinunog. 8Dalhon niya ini sa pari, nga magahalad sing una sang pispis subong halad tungod sa sala. Lubagon niya ang liog agod maligto ini, pero indi ini pag-utason 9kag iwisik ang bahin sang dugo sini sa kilid sang altar. Ang nabilin nga dugo iya iula sa sadsaran sang altar. Amo ini ang halad sa pagkuha sang sala. 10Dayon idulot niya ang ikaduha nga pispis subong isa ka halad nga sinunog, suno sa mga pagsulondan. Sa sini nga paagi ang pari magadulot sing halad para sa sala sang amo nga tawo, kag pagapatawaron ko sia.
11“Kon ang isa ka tawo indi makasarang magdulot sang duha ka mga pating ukon duha ka mga tukmo, magdala sia sing duha ka libra sang pinili nga harina subong isa ka halad tungod sa sala. Indi niya ini pagbutangan sing lana sang olivo ukon insyenso, tungod kay isa ini ka halad tungod sa sala, kag indi isa ka halad nga kalan-on. 12Dalhon niya ini sa pari, nga magakuha sing isa ka hakop sini subong isa ka tanda nga ini tanan nahalad sa akon kag sunogon niya ini sa altar subong isa ka halad nga kalan-on. Isa ini ka halad sa pagkuha sang sala. 13Sa sini nga paagi ang pari magadulot sing halad para sa sala sang amo nga tawo, kag pagapatawaron ko sia. Ang nabilin nga harina iya sang pari subong sang halad nga kalan-on.”
Mga Halad sa Pagbayad
14Ang Ginoo naghatag sining masunod nga mga sugo kay Moises: 15“Kon ang bisan sin-o makasala sing indi hungod paagi sa di-paghatag sang mga balayran nga balaan sa akon, magadala sia subong iya halad nga bayad sa akon sing isa ka karnero ukon kanding nga lalaki nga wala sing bisan ano nga depekto. Pabilihan ini suno sa opisyal nga talaksan. 16Dapat niya bayaran ang wala niya mahatag kag magadugang sia sa pagbayad sing baynte porsiento. Ihatag niya ini sa pari, kag ang pari magadulot sang sapat subong isa ka halad para sa sala sang amo nga tawo, kag pagapatawaron ko sia.
17“Kon ang bisan sin-o makasala sing indi hungod paagi sa paglapas sang bisan ano nga akon sugo, nakalapas sia kag dapat niya bayaran ang silot. 18Kinahanglan magdala sia sa pari sing isa ka karnero ukon kanding nga lalaki nga wala sing bisan ano nga depekto subong iya halad nga bayad. Pabilihan ini suno sa opisyal nga talaksan. Ang pari magadulot sing halad para sa sala nga indi hungod sang amo nga tawo, kag pagapatawaron ko sia. 19Isa ini ka halad nga bayad tungod sa sala nga iya nahimo batok sa akon, ang Ginoo.”
Currently Selected:
Levitico 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
