Levitico 4
4
Mga Halad tungod sa mga Sala nga Indi Hungod
1Ang Ginoo nagsugo kay Moises: 2“Singgana ang mga tawo sang Israel nga ang bisan sin-o nga nakasala kag nakalapas sang akon mga sugo sing indi hungod, kinahanglan tumanon niya ang masunod nga mga pagsulondan.
3“Kon ang nakasala amo ang Pinakamataas nga Pari kag tungod sini nadalahig niya ang mga tawo, magahalad sia sang isa ka torite nga baka nga wala sing bisan ano nga depekto kag ihalad niya ini sa akon tungod sang iya sala. 4Pagadalhon niya ang torite nga baka sa pwertahan sang Tolda, itungtong niya ang iya kamot sa ulo sini kag ihawon niya ini didto sa akon atubang. 5Dayon ang Pinakamataas nga Pari magakuha sang dugo sang torite nga baka kag dalhon niya ini sa sulod sang Tolda. 6Itum-oy niya ang iya tudlo sa dugo kag iwisik ini sa atubangan sang balaan nga kurtina sing makapito ka beses. 7Dayon ihamlit niya ang bahin sang dugo sa mga sungaysungay sa mga pamusod sang altar nga ginasunogan sang insyenso sa Tolda. Iula niya ang nabilin nga dugo sa sadsaran sang altar nga ginasunogan sang mga halad, nga yara sa pwertahan sang Tolda. 8Kuhaon niya sa sining torite nga baka ang tanan nga tambok, ang mga sapay sa mga kasudlan, 9ang mga batubato kag ang sapay nga yara sa sini, kag ang labing maayo nga bahin sang atay. 10Ang pari magakuha sini nga sapay kag magasunog sini sa altar nga ginasunogan sang mga halad, subong sang ginahimo niya sa sapay halin sa sapat nga ginaihaw para sa halad sa paghiambit. 11Pero kuhaon niya ang panit sini, ang tanan nga unod, ang ulo, ang mga tiil, ang mga kasudlan, lakip ang mga perpilya, 12kag dalhon niya ini tanan sa gwa sang kampo sa lugar nga matinlo nga ginaulaan sang abo, kag sunogon ini didto sa ibabaw sang nagakalayo nga gatong.
13“Kon ang nakasala amo ang bug-os nga katilingban sang Israel kag nakalapas sila sing indi hungod sang isa sang akon mga sugo, 14sa tapos mahibal-an ini nga sala, ang katilingban magadala sang isa ka torite nga baka subong isa ka halad tungod sa sala. Dalhon nila ini sa Tolda sang akon presensya, 15ang mga pangulo sang katilingban magatungtong sang ila mga kamot sa ulo sini, kag ihawon ini didto. 16Ang Pinakamataas nga Pari magadala sang bahin sang dugo sang torite nga baka sa sulod sang Tolda, 17itum-oy niya ang iya tudlo sa dugo kag iwisik ini sa atubangan sang kurtina sing makapito ka beses. 18Ipalhit niya ang bahin sang dugo sa mga sungaysungay sa mga pamusod sang altar nga ginasunogan sang insyenso sa sulod sang Tolda kag ang nabilin nga dugo iula niya sa sadsaran sang altar nga ginasunogan sang mga halad, nga yara sa pwertahan sang Tolda. 19Dayon kuhaon niya ang tanan nga sapay kag sunogon ini sa altar. 20Ang iya himuon sa sining torite nga baka pareho man sang ginahimo niya sa torite nga baka nga halad tungod sa sala, kag sa sini nga paagi magahalad sia tungod sang sala sang mga tawo, kag akon sila pagapatawaron. 21Dayon dalhon niya ang torite nga baka sa gwa sang kampo kag sunogon ini, subong sang iya pagsunog sang torite nga baka nga ginhalad tungod sang iya kaugalingon nga sala. Amo ini ang halad nga magakuha sang sala sang katilingban.
22“Kon ang nakasala amo ang isa ka pangulo kag nakalapas sia sing indi hungod sang isa sang akon mga sugo, 23sa tapos sia mapatalupangod sang iya sala, magadala sia sing isa ka toro nga kanding nga wala sing bisan ano nga depekto, subong iya halad. 24Itungtong niya ang iya kamot sa ulo sini kag ihawon niya ini sa naaminhan nga kilid sang altar, sa diin ginaihaw ang mga sapat para sa mga halad nga sinunog. Amo ini ang halad sa pagkuha sang sala. 25Itum-oy sang pari ang iya tudlo sa dugo sang sapat, ihamlit niya ini sa mga sungaysungay sa mga pamusod sang altar, kag iula niya ang nabilin nga dugo sini sa sadsaran sang altar. 26Dayon sunogon niya ang tanan nga sapay sini sa altar, subong sang iya pagsunog sang sapay sang mga sapat nga ginaihaw para sa mga halad sa paghiambit. Sa sini nga paagi ang pari magadulot sing halad para sa sala sang pangulo, kag pagapatawaron ko sia.
27“Kon#Num. 15:27-28. ang nakasala amo ang isa ka ordinaryo nga tawo kag nakalapas sia sing indi hungod sang isa sang akon mga sugo, 28sa tapos sia mapatalupangod sang iya sala, magadala sia sang isa ka kanding nga babayi nga wala sing bisan ano nga depekto subong iya halad. 29Itungtong niya ang iya kamot sa ulo sini kag ihawon niya ini sa naaminhan nga kilid sang altar, sa diin ginaihaw ang mga sapat para sa mga halad nga sinunog. 30Itum-oy sang pari ang iya tudlo sa dugo sang sapat, ihamlit ini sa mga sungaysungay sa mga pamusod sang altar, kag iula niya ang nabilin nga dugo sa sadsaran sang altar. 31Dayon kuhaon niya ang tanan nga sapay sini, subong sang pagkuha sang sapay sa tanan nga sapat nga ginaihaw para sa mga halad sa paghiambit, kag sunogon niya ini sa altar subong isa ka mahamot nga dulot sa akon. Sa sini nga paagi ang pari magadulot sing halad para sa sala sang amo nga tawo, kag pagapatawaron ko sia.
32“Kon ang isa ka tawo magdala sing karnero subong isa ka halad tungod sa sala, kinahanglan isa ini ka babayi nga wala sing bisan ano nga depekto. 33Itungtong niya ang iya kamot sa ulo sini kag ihawon ini sa naaminhan nga kilid sang altar, sa diin ginaihaw ang mga sapat para sa mga halad nga sinunog. 34Itum-oy sang pari ang iya tudlo sa dugo sang sapat, ihamlit ini sa mga sungaysungay sa mga pamusod sang altar, kag iula niya ang nabilin nga dugo sa sadsaran sang altar. 35Dayon kuhaon niya ang tanan nga sapay sini, subong sang pagkuha sang sapay sa karnero nga ginaihaw para sa mga halad sa paghiambit, kag sunogon ini sa altar upod sa mga halad nga kalan-on nga gindulot sa akon. Sa sini nga paagi ang pari magadulot sing halad para sa sala sang amo nga tawo, kag pagapatawaron ko sia.
Currently Selected:
Levitico 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
