Levitico 26
26
Ang mga Kaayuhan sang Pagtuman
(Deut. 7:12-24; 28:1-14)
1Ang#Lev. 19:4; Exo. 20:4; Deut. 5:8; 16:21-22; 27:1. Ginoo nagsiling: “Indi kamo maghimo sing mga diosdios ukon magpatindog sing mga estatwa, mga haligi nga bato, ukon mga bato nga ginkortihan agod simbahon. Ako amo ang Ginoo nga inyo Dios. 2Sauloga ninyo ang akon mga piesta kag tahura ninyo ang lugar sa diin ako ginasimba. Ako amo ang Ginoo.
3“Kon#Deut. 11:13-15; 28:1-14. magkabuhi kamo suno sa akon mga kasugoan kag magtuman sang akon mga sugo, 4padalhan ko kamo sing ulan sa nagakaigo nga panahon, agod ang duta magapatubas sing mga kalan-on kag ang mga kahoy magapamunga. 5Ang inyo mga patubas manginbugana sa bagay nga magaani pa kamo sing mga uhay samtang panahon na sa pagpamupo sing mga ubas, kag magapadayon kamo sa pagpamupo sing mga ubas samtang panahon na sa pagsab-og sing mga uyas. Magakaon kamo sang tanan nga luyag ninyo kaunon, kag magaestar kamo nga wala sing katalagman sa inyo duta.
6“Paluntaron ko ang kalinong sa inyo duta, kag sarang kamo makatulog nga wala sing kulbaan bisan sin-o. Panguhaon ko ang tanan nga makatalagam nga mga sapat sa duta, kag manginwala na sing inaway didto. 7Magadaog kamo batok sa inyo mga kaaway, 8ang lima sa inyo makalutos sang 100, kag ang 100 sarang makalutos sang 10,000. 9Bendisyunan ko kamo kag hatagan sing madamo nga mga anak, tumanon ko ang akon bahin sang kasugtanan nga akon ginhimo sa inyo. 10Ang inyo mga patubas manginmadamo sa bagay nga indi ini maubos sa sulod sang isa ka tuig, kag bisan pa ang nabilin sang daan nga patubas inyo ihaboy agod may butangan kamo sang bag-o. 11Magaestar ako upod sa inyo sa akon balaan nga Tolda kag indi na gid ako magsikway sa inyo. 12Ako#2 Cor. 6:16. magaupod sa inyo, ako mangin-inyo Dios, kag kamo mangin-akon mga tawo. 13Ako, ang Ginoo nga inyo Dios, nagpagwa sa inyo sa Ehipto agod mangin-indi na kamo mga ulipon. Ginguba ko ang gahom nga naghugakom sa inyo kag ginpalakat ko kamo nga may kahilwayan kag dignidad.”
Silot tungod sang Di-pagtuman
(Deut. 28:15-68)
14Ang#Deut. 28:15-68. Ginoo nagsiling: “Kon indi kamo magtuman sang akon mga sugo, pagasilutan ko kamo. 15Kon indi kamo magtuman sang akon mga kasugoan kag mga sugo kag lapason ninyo ang kasugtanan nga akon ginhimo sa inyo, 16silutan ko kamo. Mapadala ako sa inyo sing mga kalalat-an—mga balatian nga indi mag-ayo kag mga hilanat nga magabulag sa inyo kag magapakag-as sa inyo. Magatanom kamo, pero indi ini makabulig sa inyo, tungod kay ang inyo mga kaaway magalutos sa inyo kag magakaon sang inyo gintanom. 17Manginbatok ako sa inyo, agod malutos kamo, kag ang mga nagadumot sa inyo magagahom sa inyo, pagakugmaton kamo sa bagay nga magadalagan kamo bisan wala sing may nagalagas sa inyo.
18“Kon sa tapos sini tanan indi pa gihapon kamo magtuman sa akon, dugangan ko ang pagsilot sa inyo sing pito ka pilo. 19Sumpuon ko ang inyo batinggilan nga pagpabugal, wala sing ulan nga magaabot, kag ang inyo duta magamala kag manginsubong ini katig-a sang salsalon. 20Ang tanan ninyo nga pagpangabudlay manginwala sing pulos sa inyo, tungod kay ang inyo duta indi magpatubas sing mga kalan-on kag ang mga kahoy indi magpamunga.
21“Kon magpadayon pa gid kamo sa pagsumpong sa akon kag indi magtuman sa akon, dugangan ko liwat sing pito ka pilo ang inyo silot. 22Magapadala ako sa inyo sing makatalagam nga mga sapat, kag pamatyon nila ang inyo mga anak, laglagon nila ang inyo mga kabakahan, kag diutay lang ang mabilin sa inyo sa bagay nga ang inyo mga dalan manginmamingaw.
23“Kon sa tapos sini tanan nga silot indi pa kamo gihapon magpamati sa akon, kundi magpadayon sa pagsumpong sa akon, 24dayon manginbatok ako sa inyo kag silutan ko kamo sing pito ka pilo kabug-at sang sa nahauna. 25Magapadala ako sang inaway sa inyo sa pagsilot sa inyo tungod sang inyo paglapas sang aton kasugtanan, kag kon magtipon kamo sa inyo mga siudad agod indi kamo maano, magapadala ako sa inyo sing mga balatian nga indi mag-ayo, kag mapilitan kamo sa pag-ampo sa inyo mga kaaway. 26Indi ko kamo paghatagan sing kalan-on, agod nga ang napulo ka mga babayi magakinahanglan lamang sang isa ka lulutoan sang tanan nga tinapay nga yara sa ila; ila ini ipanagtag, kag kon makaon na ninyo ini tanan, gutom man kamo gihapon.
27“Kon sa tapos sini tanan magapadayon gihapon kamo sa pagsumpong sa akon kag indi magtuman sa akon, 28dayon sa akon kaakig manginbatok ako sa inyo kag sa liwat silutan ko kamo sing pito ka pilo kabug-at sang sa nahauna. 29Mangintama gid ang inyo kagutom sa bagay nga kaunon ninyo ang inyo kaugalingon nga mga anak. 30Gub-on ko ang mga lugar nga inyo ginasimbahan sa mga bakulod, gub-on ko ang inyo mga altar nga ginasunogan sang insyenso, kag ihaboy ko ang inyo mga bangkay sa ibabaw sang inyo napukan nga mga diosdios. Sa akon bug-os nga kaakig, 31gub-on ko ang inyo mga siudad, laglagon ko ang mga lugar nga inyo ginasimbahan, kag indi ko pagbatunon ang inyo mga halad. 32Laglagon ko sing bug-os ang inyo duta sa bagay nga ang mga kaaway nga magaagaw makibot sang kalaglagan sini. 33Magadala ako sing inaway sa inyo kag paalaplaagon ko kamo sa iban nga mga pungsod. Ang inyo duta manginmamingaw, kag ang inyo mga siudad magapabilin nga nalaglag. 34-35Dayon ang duta makaangkon sang bug-os nga kapahuwayan nga wala ninyo ginhatag sa sini; magapabilin ini nga pinatumbayaan kag makapahuway ini samtang yara kamo sa duta sang inyo mga kaaway subong mga bihag.
36“Pakugmaton ko gid kamo nga mga ginbihag sa bagay nga sa huni lamang sang dahon nga ginahuyop sang hangin magapalagyo na kamo. Magadalagan kamo subong nga daw ginalagas kamo sa inaway kag mapukan kamo bisan nga wala sing kaaway nga malapit sa inyo. 37Magakadusmo kamo sa isa kag isa, bisan nga wala sing may nagalagas sa inyo kag indi kamo makasarang sa pagpakig-away sa bisan sin-o nga kaaway. 38Magakalamatay kamo sa tion nga kamo ginbihag, kag halunhonon kamo sang duta sang inyo mga kaaway. 39Ang pila ka bilog sa inyo nga mabilin sa duta sang inyo mga kaaway magakag-as, tungod sang inyo kaugalingon nga sala kag sang sala sang inyo mga katigulangan.
40“Pero ang inyo mga kaliwat magakilala sang ila mga sala kag sang mga sala sang ila mga katigulangan, nga nagsumpong kag nagrebelde batok sa akon, 41nga nanginkabangdanan sang akon pagsumpong sa ila kag ginpadala ko sila sa duta sang ila mga kaaway subong mga bihag. Sa ulihi, kon ang inyo mga kaliwat magpaubos kag mabayaran nila ang silot tungod sang ila sala kag pagrebelde, 42dumdomon#Gen. 28:13-14; Gen. 26:3-4; Gen. 17:7-8. ko ang akon kasugtanan kay Jacob kag kay Isaac kag kay Abraham, kag bag-uhon ko liwat ang akon saad sa paghatag sang duta sa akon mga tawo. 43Pero sa wala pa ini, kinahanglan nga makuha sa duta ang mga pumoluyo, agod nga makapahuway sing bug-os ang duta, kag kinahanglan bayaran nila sing bug-os ang silot tungod sang ila paglapas sang akon mga kasugoan kag mga sugo. 44Pero bisan yara pa sila sa duta sang ila mga kaaway indi ko sila pagpatumbayaan sing bug-os ukon laglagon sila, kay magatapos ini sang akon kasugtanan sa ila. Ako amo ang Ginoo nga ila Dios. 45Bag-uhon ko liwat ang kasugtanan nga akon ginhimo sa ila mga katigulangan sang ginpakita ko ang akon gahom sa tanan nga kapungsoran paagi sa akon pagpagwa sang akon mga tawo sa Ehipto, agod nga ako, ang Ginoo, mangin-ila Dios.”
46Ini tanan amo ang mga kasugoan kag mga sugo nga ginhatag sang Ginoo para sa mga tawo sang Israel paagi kay Moises sa Bukid sang Sinai.
Currently Selected:
Levitico 26: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
