Levitico 25
25
Ang Ikapito nga Tuig
(Deut. 15:1-11)
1Ang#Exo. 23:10-11. Ginoo naghambal kay Moises sa Bukid sang Sinai kag nagsugo sa iya: 2“Ihatag ang masunod nga mga pagsulondan sa mga tawo sang Israel. Kon makasulod kamo sa duta nga ginahatag ko sa inyo, pahuwayan ninyo ang duta sa tagsa ka ikapito nga tuig sa pagpasidungog sa akon. 3Magtanom kamo sa inyo mga uma, mag-utod sing sanga sang inyo mga ubas, kag mag-ani sang mga patubas sa sulod sang anom ka tuig. 4Pero sa ikapito nga tuig amo ang isa ka tuig sang bug-os nga pagpahuway para sa duta, isa ka tuig nga ginhalad sa akon. Indi pagtamni ang inyo mga uma ukon pag-utdi sing sanga ang inyo mga ubas. 5Indi ninyo pag-anihon ang mga uhay nga nagatubo sa iya lang kaugalingon nga wala ninyo gintanom, ukon magpamupo sang mga bunga sang ubas nga wala ninyo mautdan, isa ini ka tuig sang bug-os nga pagpahuway para sa duta. 6Sa sina nga tuig bisan ang duta nga wala matamni, magahatag ini sing kalan-on para sa inyo, sa inyo mga ulipon, sa inyo mga sinuholan nga mga tawo, sa mga dumoluong nga nagaestar upod sa inyo, 7sa inyo mga hayop, kag sa mga sapat nga talunon nga yara sa inyo mga uma. Ang tagsa ka butang nga mapatubas sang duta nga wala matamni sarang makaon.
Ang Tuig sang Pagbalik
8“Mag-isip kamo sing pito ka ikapito nga tuig, nga ang kabug-osan kwarentay nwebe ka tuig. 9Dayon, sa ika-10 nga adlaw sang ikapito nga bulan, ang Adlaw sang Pagtubos, magpadala kamo sing mga tawo sa pagpatunog sang trumpeta sa bug-os nga duta. 10Sa sini nga paagi painon ninyo ang ika-50 nga tuig kag ipahibalo ninyo ang kahilwayan sa tanan nga mga pumoluyo sang duta. Sa sini nga tuig ang tanan nga mga pagkabutang nga ginbaligya pagaiuli sa nahauna nga tag-iya ukon sa iya mga kaliwat, kag ang bisan sin-o nga ginbaligya subong isa ka ulipon magabalik na sa iya panimalay. 11Indi ninyo pagtamni ang inyo mga uma ukon mag-ani sang uhay nga nagtubo sa iya lang kaugalingon ukon magpamupo sang mga bunga sang ubas nga wala ninyo mautdi ang mga sanga. 12Ang bug-os nga tuig manginbalaan para sa inyo, magakaon lamang kamo sang patubas sang mga kaumhan nga wala ninyo gintanom.
13“Sa sini nga tuig ang tanan nga mga pagkabutang nga ginbaligya pagaiuli sa nahauna nga tag-iya. 14Gani kon magbaligya kamo sing duta sa inyo kapareho nga Israelinhon ukon magbakal kamo sing duta sa iya, indi kamo magdinayaay. 15Ang bili sang pagkabutang ipaigo ninyo suno sa kadamuon sang tinuig nga ang duta makapatubas sa wala pa ang madason nga Tuig sang Pagbalik. 16Kon may madamo pa nga mga tinuig, ang bili sang duta mahal, pero kon pila na lamang ka tuig, ang bili barato, tungod kay ang ginabaligya amo lamang ang kadamuon sang mapatubas sang amo nga duta. 17Indi kamo magdaya sa inyo kapareho nga Israelinhon, kundi magkahadlok kamo sa akon ang Ginoo nga inyo Dios.
Palaligban sang Ikapito nga Tuig
18“Tumana ninyo ang tanan ko nga mga kasugoan kag mga sugo agod mag-estar kamo nga wala sing katalagman sa duta. 19Ang duta magapatubas, kag indi kamo mawad-an sang tanan nga luyag ninyo kaunon kag magaestar kamo nga wala sing katalagman.
20“Pero ayhan may magapamangkot, ‘Ano ang aton nga kaunon sa ikapito nga tuig, nga wala man sing uma nga gintamnan kag wala sing patubas nga gin-ani?’ 21Ako ang magabendisyon sang duta sa ikaanom nga tuig agod magapatubas ini sing tuman nga kalan-on para sa duha ka tuig. 22Kon magtanom kamo sa inyo mga kaumhan sa ikawalo nga tuig, ang inyo pagakaunon amo man ang inyo patubas sa ikaanom nga tuig, kag indi kamo pagkulangon sang inyo mga kalan-on tubtob sa pag-ani sang patubas sang inyo gintanom sina nga tuig.
Ang Pagbalik sang Pagkabutang
23“Ang inyo duta indi dapat ibaligya sing dayon, tungod kay indi kamo ang tag-iya sini, akon ini kag kaangay kamo sang mga dumoluong nga ginatugotan sa paggamit sini.
24“Kon ang duta nabaligya, kinahanglan pagakilalahon ang kinamatarong sang nahauna nga tag-iya sa pagbakal sini liwat. 25Kon ang isa ka Israelinhon mag-imol kag mapilitan sia sa pagbaligya sang iya duta, ang iya pinakamalapit nga pariente amo ang dapat magawad sini. 26Ang isa ka tawo nga wala sing pariente nga makagawad sini, ayhan magauswag sa ulihi, kag sarang na niya ini magawad para sa iya kaugalingon. 27Sa sina nga kahimtangan, kinahanglan bayaran niya ang tawo nga nagbakal sini sang bili nga nagakaigo sa nabilin nga mga tinuig tubtob sa madason nga Tuig sang Pagbalik, dayon mabawi niya ang iya duta. 28Pero kon kulang ang iya kwarta sa paggawad sang duta, magapabilin ini sa kamot sang tawo nga nagbakal sini tubtob sa madason nga Tuig sang Pagbalik. Sa sina nga tuig iuli ini sa nahauna nga tag-iya.
29“Kon ang isa ka tawo magbaligya sing isa ka balay sa sulod sang siudad nga nalibutan sing pader, may kinamatarong sia sa paggawad sini sa sulod sang isa ka tuig sugod sa adlaw nga ginbaligya ini. 30Pero kon indi niya magawad ini sa sulod sang isa ka tuig, wala na sia sing kinamatarong sa pagbakal sini liwat, kag ang balay manginpagkabutang nga permanente sang nagbakal kag sang iya mga kaliwat, indi ini pag-iuli sa Tuig sang Pagbalik. 31Pero ang mga balay sa mga barangay nga wala sing pader pagakabigon kaangay sang mga kaumhan, ang nahauna nga tag-iya may kinamatarong sa paggawad sini, kag kinahanglan iuli ini sa Tuig sang Pagbalik. 32Pero ang mga Levita may kinamatarong sa paggawad sang ila pagkabutang sa bisan ano nga panahon sa mga banwa sang mga Levita. 33Kon ang isa ka balay sa sulod sang banwa nga ginbaligya sang isa ka Levita kag wala maggawad, kinahanglan iuli ini sa Tuig sang Pagbalik, tungod kay ang mga balay sang mga Levita sa mga banwa ila permanente nga pagkabutang sa tunga sang mga tawo sang Israel. 34Pero ang duta nga palahalban sa palibot sang mga banwa sang mga Levita indi gid pag-ibaligya, ila ini pagkabutang nga wala sing katapusan.
Pagpahulam sa mga Imol
35“Kon#Deut. 15:7-8. ang imo kapareho nga Israelinhon nga nagaestar malapit sa imo mangin-imol kag ginakulang sa iya pangabuhi, kinahanglan buligan mo sia subong sang imo pagbulig sa isa ka sinuholan nga tawo kag pangayaw agod makapadayon sia sa pag-estar malapit sa imo. 36Indi#Exo. 21:2-6; Deut. 15:12-18. mo sia pagsukton sang saka, kundi magkahadlok ka sa Dios kag pabayai ang imo kapareho nga Israelinhon sa pagkabuhi malapit sa imo. 37Indi#Exo. 22:25; Deut. 23:19-20. sia pagpabayara sang saka sa kwarta nga imo ginpahulam sa iya kag indi ka maganansya sa imo pagbaligya sa iya sing kalan-on. 38Ako amo ang Ginoo nga inyo Dios, nga nagpagwa sa inyo sa Ehipto agod ihatag sa inyo ang duta sang Canaan kag ako mangin-inyo Dios.
Ang Paghilway sang mga Ulipon
39“Kon ang imo kapareho nga Israelinhon nga nagaestar malapit sa imo imol na gid kaayo, sa bagay nga ginabaligya niya ang iya kaugalingon sa imo subong isa ka ulipon, indi mo sia pagpaobrahon sang obra sang isa ka ulipon. 40Magapabilin sia sa imo subong isa ka sinuholan nga tawo kag pangayaw nga magaalagad sa imo tubtob sa madason nga Tuig sang Pagbalik. 41Sa sina nga tion, sia kag ang iya mga anak magahalin sa imo kag magabalik sa iya panimalay kag sa pagkabutang sang iya mga katigulangan. 42Ang mga tawo sang Israel akon nga ulipon kag ginpagwa ko sila sa Ehipto, indi dapat sila ibaligya subong mga ulipon. 43Indi mo sila pagpintasan, kundi magkahadlok ka sa akon. 44Kon nagakinahanglan ka sing mga ulipon, mabakal nimo sila sa mga pungsod sa imo palibot. 45Sarang ka man makabakal sang mga anak sang mga dumoluong nga nagaestar sa palibot mo. Ina nga mga kabataan nga natawo sa imo duta mahimo nga mangin-imo pagkabutang, 46kag sarang mo sila mabilin subong panublion sang imo mga anak nga lalaki, nga dapat nila alagaron tubtob nagakabuhi sila. Pero indi mo gid pagpintasan ang bisan sin-o sang imo kapareho nga Israelinhon.
47“Abi kon ang isa ka dumoluong ukon pangayaw nga tawo nga nagaestar upod sa imo magmanggaranon, samtang ang isa ka kapareho mo nga Israelinhon mag-imol kag ibaligya niya ang iya kaugalingon subong isa ka ulipon sa sina nga dumoluong ukon pangayaw nga tawo ukon sa katapo sang iya panimalay. 48Sa tapos sia mabaligya, may kinamatarong sia sa gihapon agod gawaron. Ang isa sang iya mga utod nga lalaki 49ukon ang iya tiyo ukon ang iya pakaisa ukon ang isa sang iya malapit nga pariente sarang makagawad sa iya, ukon sia mismo, kon may kwarta na sia nga natipon, sarang makagawad sang iya kaugalingon nga kahilwayan. 50Kinahanglan hambalon niya ang nagbakal sa iya, kag isipon nila ang mga tinuig halin sang pagbaligya niya sang iya kaugalingon tubtob sa madason nga Tuig sang Pagbalik, kag ipaigo ang bili sang paghilway sa iya suno sa sweldo nga ginabayad sa isa ka sinuholan nga tawo. 51-52Kinahanglan bayaran niya ang bahin sang bili sang pagbakal sa iya suno sa tinuig nga nabilin, 53subong nga daw ginasuholan sia sa kada tuig. Indi sia dapat pagpintasan sang iya agalon. 54Kon indi sia mahilway sa bisan ano sini nga mga paagi, sia kag ang iya mga anak kinahanglan hilwayon sa madason nga Tuig sang Pagbalik. 55Ang bisan sin-o nga Israelinhon indi mahimo nga mangin-ulipon sing dayon, tungod kay mga tawo sang Israel akon mga ulipon; ginpagwa ko sila sa Ehipto, kag ako ang Ginoo nga ila Dios.”
Currently Selected:
Levitico 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
