Levitico 20
20
Mga Silot tungod sang Pagkadi-matinumanon
1Ginsugo sang Ginoo si Moises 2nga singganon ang mga tawo sang Israel: “Ang bisan sin-o sa inyo ukon ang bisan sin-o nga dumoluong nga nagaestar upod sa inyo nga nagahatag sang bisan sin-o sang iya mga anak nga gamiton sa pagsimba sa dios nga si Moloc pagabatuhon sang bug-os nga katilingban tubtob mapatay. 3Ang bisan sin-o nga magahatag sang isa sang iya mga anak kay Moloc kag magdagta sang akon balaan nga Tolda kag magpakahuya sang akon balaan nga ngalan, ako magasumpong sa iya kag indi ko na sia pagkabigon nga isa sang akon mga tawo. 4Pero kon ang katilingban wala nagasapak sang iya ginhimo kag wala magpatay sa iya, 5ako mismo ang magasumpong sang amo nga tawo kag sang iya bug-os nga panimalay kag batok sa tanan nga nagabuylog sa iya sa pagkadi-matutom sa akon kag nagasimba kay Moloc. Indi ko na sila pagkabigon nga akon mga tawo.
6“Kon ang bisan sin-o magpangayo sing laygay sa mga tawo nga nagapakig-angot sa espiritu sang mga patay, ako magasumpong sa iya kag indi ko na sia pagkabigon nga isa sang akon mga tawo. 7Tipigi ang inyo kaugalingon sa pagkabalaan, tungod kay ako ang Ginoo nga inyo Dios. 8Tumana ninyo ang akon mga kasugoan, tungod kay ako, ang Ginoo, nga nagpakabalaan sa inyo.
9“Ang#Exo. 21:17; Mat. 15:4; Mar. 7:10. bisan sin-o nga nagapakamalaut sang iya amay ukon iya iloy pagapatyon, sia ang may salabton sang iya kamatayon.
10“Kon#Exo. 20:14; Lev. 18:20; Deut. 5:18. ang isa ka tawo magpanginbabayi sa asawa sang iya isigkatawo, sia kag ang babayi kinahanglan patyon. 11Ang#Lev. 18:8; Deut. 22:30; 27:20. tawo nga nagapakighirop sa isa sang mga asawa sang iya amay nagapakahuya sang iya amay, gani sia kag ang babayi pagapatyon. Sila ang may salabton sang ila kamatayon. 12Kon#Lev. 18:15. ang isa ka tawo nagapakighirop sa iya umagad nga babayi, sila nga duha pagapatyon. Naghimo sila sing kalautan kag sila ang may salabton sang ila kamatayon. 13Kon#Lev. 18:22. ang isa ka lalaki nagapakighilawas sa kapareho niya nga lalaki, nakahimo sila sang makangilil-ad nga butang kag sila nga duha pagapatyon. Sila ang may salabton sang ila kamatayon. 14Kon#Lev. 18:17; Deut. 27:23. ang isa ka tawo magpangasawa sang isa ka babayi kag sang iloy sang babayi, sila nga tatlo pagasunogon tubtob mapatay, tungod sang makahuloya nga butang nga ila ginhimo. Ini nga butang indi dapat pagapahanugotan sa tunga ninyo. 15Kon#Exo. 22:19; Lev. 18:23; Deut. 27:21. ang isa ka tawo nagapakighilawas sa isa ka sapat, sia kag ang sapat pagapatyon. 16Kon ang isa ka babayi magtinguha sa pagpakighilawas sa isa ka sapat sia kag ang sapat pagapatyon. Sila ang may salabton sang ila kamatayon.
17“Kon#Lev. 18:9; Deut. 27:22. ang isa ka lalaki magpangasawa sang iya utod nga babayi ukon babayi nga utod niya sa amay ukon utod niya sa iloy, pagapakahuy-an sila sa atubangan sang mga tawo kag tabugon sa gwa sang katilingban. Nagpakighirop sia sa iya utod nga babayi kag kinahanglan silutan sia tungod sini. 18Kon#Lev. 18:19. ang isa ka tawo nakapakighirop sa isa ka babayi nga yara ang iya pamulanon, sila nga duha tabugon sa gwa sang katilingban, tungod kay ginlapas nila ang mga pagsulondan nahanungod sang tulomanon sa pagkadi-matinlo.
19“Kon#Lev. 18:12-14. ang isa ka tawo nakapakighirop sa iya tiya, sila nga duha kinahanglan silutan tungod sang ila kalautan nga ginhimo. 20Kon ang isa ka tawo nakapakighirop sa asawa sang iya tiyo, ginapakahuy-an niya ang iya tiyo, gani sia kag ang babayi kinahanglan magbayad sang silot; dapat sila mapatay nga wala sang mga kaliwat. 21Kon#Lev. 18:16. ang isa ka tawo magpangasawa sang asawa sang iya utod samtang ini buhi pa, mapatay sila nga wala sing anak. Nakahimo sia sang di-matinlo nga butang kag ginpakahuy-an niya ang iya utod nga lalaki.
22“Tumana ninyo ang tanan ko nga mga kasugoan kag mga sugo, agod nga indi ko kamo pagtabugon sa duta sang Canaan sa diin ko kamo ginadala. 23Indi ninyo pagsundon ang mga batasan sang mga tawo nga nagaestar didto; ginatabog ko pa gwa yadto nga mga tawo agod makasulod kamo sa amo nga duta. Ginakangil-aran ko ang tanan nga mga kalautan nga ila ginahimo. 24Pero ginsaad ko sa inyo ining maayo kag mapatubason nga duta nga mangin-inyo palanublion, kag igahatag ko ini sa inyo. Ako amo ang Ginoo nga inyo Dios kag ginpain ko kamo sa iban nga mga kapungsoran. 25Gani butangi ninyo sing maathag nga kinatuhay ang mga sapat kag mga pispis nga matinlo kag ang di-matinlo. Indi kamo magkaon sang di-matinlo nga mga sapat ukon mga pispis. Ginpakilala ko nga di-matinlo ini, kag kon magkaon kamo sini mangindi-matinlo kamo. 26Magmanginbalaan kamo, kag kinahanglan mangin-akon lamang kamo, tungod kay ako amo ang Ginoo kag ako balaan. Ginpain ko kamo sa iban nga mga kapungsoran agod mangin-akon lamang kamo.
27“Ang bisan sin-o nga lalaki ukon babayi nga nagapakig-angot sa mga espiritu sang patay nga mga tawo pagabatuhon tubtob mapatay; ang bisan sin-o nga tawo nga maghimo sini amo ang may salabton sang iya kamatayon.”
Currently Selected:
Levitico 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
