Levitico 14
14
Pagpaninlo sa Tapos Mag-ayo ang Makalalaton nga mga Balatian sa Panit
1Ang Ginoo naghatag kay Moises 2sining#Mat. 8:4; Mar. 1:44; Luc. 5:14; 17:14. masunod: “Amo ini ang mga pagsulondan nahanungod sa pagpaninlo sa tapos ang isa ka tawo mag-ayo sa makalalaton nga balatian sa panit. Sa adlaw nga ipahibalo sia nga matinlo, dalhon sia sa pari, 3kag ang pari magadala sa iya sa gwa sang kampo kag magausisa sa iya. Kon ang balatian nag-ayo, 4ang pari magapakuha sang duha ka mga pispis nga matinlo, upod ang isa ka pidaso sang kahoy nga sedro, isa ka pula nga higot nga nahimo sa panapton, kag isa ka sanga sang kahoy nga isopo. 5Dayon ang pari magasugo nga ihawon ang isa sang mga pispis sa ibabaw sang yahong nga nahimo sa lunang, nga may unod nga tubig halin sa tuboran. 6Kuhaon niya ang isa ka pispis kag itum-oy ini upod sa kahoy nga sedro, sa mapula nga higot nga nahimo sa panapton, kag sa isopo, sa dugo sang pispis nga gin-ihaw. 7Iya iwisik ang dugo sing makapito sa tawo nga pagatinluan sa iya balatian sa panit kag dayon ipahibalo nga sia matinlo. Buy-an niya ang buhi nga pispis sa wayang. 8Ang tawo magalaba sang iya mga bayu, magakiskis sang tanan niya nga buhok kag magapaligo sia. Dayon manginmatinlo sia. Sarang sia makasulod sa kampo, pero kinahanglan magaestar sia sa gwa sang iya tolda sa sulod sang pito ka adlaw. 9Sa ikapito nga adlaw, iya liwat kiskisan ang iya ulo, ang iya bungot, ang iya mga kilay, kag ang tanan nga bulbol sa iya lawas. Pagalabhan niya ang iya mga bayu kag magapaligo sia, dayon manginmatinlo sia.
10“Sa ikawalo nga adlaw magadala sia sing duha ka mga kordero nga lalaki kag isa ka kordero nga babayi nga isa ka tuig ang edad, nga wala sing bisan ano nga mga depekto, lima ka libra sang pinili nga harina nga nasamuan sing lana sang olivo, kag isa ka tasa nga lana sang olivo. 11Ang pari magadala sang amo nga tawo kag sang sini nga mga halad sa pwertahan sang Tolda sang akon presensya. 12Dayon ang pari magakuha sang isa ka kordero kag idulot ini subong nga halad nga bayad upod sa isa ka tasa nga lana. Ihalad niya ini subong isa ka pinasahi nga dulot sa Ginoo para sa pari. 13Ihawon niya ang kordero sa balaan nga duog nga ginaihawan sang mga sapat para sa mga halad tungod sa sala kag mga halad nga sinunog. Kinahanglan himuon niya ini tungod kay ang halad nga bayad, kaangay sang halad tungod sa sala, iya sang pari kag tama ka balaan. 14Ang pari magakuha sang bahin sang dugo sang kordero kag ihamlit ini sa labit sang tuo nga dulonggan, sa kumalagko sang tuo nga kamot, kag sa kumalagko sang tuo nga tiil sang tawo nga igapahibalo nga matinlo. 15Ang pari magakuha sang bahin sang lana sang olivo kag ibubo ini sa palad sang iya wala nga kamot, 16itum-oy niya sa sini ang isa ka tudlo sang iya tuo nga kamot, kag iwisik sing makapito ang iban sini didto sa akon atubang. 17Magakuha sia sang bahin sang lana nga yara sa iya palad kag sang bahin sang dugo sang kordero kag ihamlit niya ini sa labit sang tuo nga dulonggan, sa kumalagko sang tuo nga kamot, kag sa kumalagko sang tuo nga tiil sang tawo nga igapahibalo nga matinlo. 18Ibutang niya ang nabilin nga lana nga yara sa iya palad sa ulo sang amo nga tawo. Sa sini nga paagi himuon niya ang tulomanon sang pagpaninlo.
19“Dayon ang pari magadulot sang halad tungod sa sala kag magahimo sang tulomanon sa pagpaninlo. Sa tapos sini, ihawon niya ang sapat para sa halad nga sinunog 20kag ihalad ini sa altar upod sa halad nga kalan-on. Sa sini nga paagi ang pari magahimo sang tulomanon sa pagpaninlo, kag ang amo nga tawo manginmatinlo.
21“Kon ang tawo imol kag indi sia makasarang sini nga mga dulot, magadala sia para sa iya pagpaninlo sing isa lamang ka bilog nga kordero subong iya halad nga bayad, isa ka pinasahi nga dulot sa akon para sa pari. Magadala sia sing duha lamang ka libra sang pinili nga harina nga nasamuan sing lana sang olivo para sa halad nga kalan-on kag isa ka tasa nga lana sang olivo. 22Magadala man sia sing duha ka bilog nga pating ukon duha ka mga tukmo, ang isa para sa halad tungod sa sala kag ang isa para sa halad nga sinunog. 23Sa ikawalo nga adlaw sang iya pagpaninlo, dalhon niya ini sa pari sa pwertahan sang Tolda. 24Ang pari magakuha sang kordero kag sang lana sang olivo kag ihalad niya ini subong isa ka pinasahi nga dulot sa akon para sa pari. 25Ihawon niya ang kordero kag magakuha sing dugo kag ihamlit ini sa labit sang tuo nga dulonggan sang tawo, sa kumalagko sang iya tuo nga kamot, kag sa kumalagko sang iya tuo nga tiil. 26Ang pari magabubo sing lana sa palad sang iya wala nga kamot 27kag paagi sa isa ka tudlo sang iya tuo nga kamot iwisik niya sing makapito ang iban sini didto sa akon atubang. 28Ibutang niya ang iban sang lana sa amo nga mga lugar nga iya ginabutangan sang dugo: sa labit sang tuo nga dulonggan sang tawo, sa kumalagko sang iya tuo nga kamot, kag sa kumalagko sang iya tuo nga tiil. 29Ibutang niya ang nabilin nga lana nga yara sa iya palad sa ulo sang tawo kag sa sini nga paagi himuon niya ang tulomanon sa pagpaninlo. 30Dayon magadulot sia sang isa sang mga pating ukon tukmo 31subong nga halad para sa sala kag ang isa subong nga halad nga sinunog upod sa halad nga kalan-on. Sa sini nga paagi himuon sang pari ang tulomanon sang pagpaninlo. 32Amo ini ang kasugoan para sa tawo nga may makalalaton nga balatian sa panit, pero indi makasarang sang kinaandan nga mga halad nga ginakinahanglan para sa iya pagpaninlo.”
Mansa sang Balatian sa mga Pamalay
33Ang Ginoo naghatag kay Moises kag kay Aaron 34sang masunod nga mga pagsulondan: “Kon nahanungod sang mga pamalay nga may mansa sang balatian nga nagalapta, (ini pagahimuon sa tapos makasulod ang mga tawo sang Israel sa duta sang Canaan nga ginhatag ko sa ila subong ila panublion) 35ang bisan sin-o nga makakita sing mansa sang balatian nga ginpadala ko sa iya balay, kinahanglan maglakat kag sugiran niya ang pari nahanungod sini. 36Ang pari magasugo nga panguhaon ang tanan nga mga pagkabutang sa sulod sang balay sa wala pa sia magkadto sa pag-usisa sang mansa sa balatian, kay kon indi, ang tanan nga pagkabutang sa sulod sang balay pagakabigon nga di-matinlo. Dayon magakadto sia sa balay 37kag usisaon niya ang mansa sang balatian. Kon may yara nga buloberde ukon mapulapula nga mga luhobluhob nga daw sa nagaut-ot sang dingding, 38bayaan niya ang balay kag pasirhan ini sa sulod sang pito ka adlaw. 39Sa ikapito nga adlaw magabalik sia kag iya liwat ini usisaon. Kon ang mansa sang balatian naglapta, 40magasugo sia nga ang mga bato sa diin makita ang mansa sang balatian pagakuhaon kag ihaboy sa di-matinlo nga lugar sa gwa sang siudad. 41Sa tapos sini, iya pakiskisan ang tanan nga dingding sa sulod sang balay kag ang tanan nga ginkiskis ihaboy sa di-matinlo nga lugar sa gwa sang siudad. 42Dayon magakuha sila sing bag-o nga mga bato nga ila igailis sa mga bato nga ginpanguha, kag bag-o nga lunang ang pagagamiton sa pagkapol sang mga dingding.
43“Kon ang mansa sang balatian makita liwat sa balay sa tapos mapanguha ang mga bato, kag ang balay nakiskisan na kag nakapulan, 44pagakadtuan ini sang pari kag tan-awon. Kon naglapta ini, ang balay di-matinlo. 45Kinahanglan gub-on ini, kag ang iya mga bato, mga kahoy, kag ang mga ginkapol sini pagadalhon sa gwa sang siudad sa di-matinlo nga lugar. 46Ang bisan sin-o nga magsulod sa amo nga balay samtang sirado ini mangindi-matinlo tubtob sa gab-i. 47Ang bisan sin-o nga maghigda ukon magkaon sa amo nga balay kinahanglan maglaba sang iya mga bayu.
48“Pero, kon sa pagtan-aw sang pari, ang mansa sang balatian indi na makita liwat sa tapos makapulan ang amo nga balay, igapahibalo niya nga matinlo ang balay, tungod kay nakuha na sang bug-os ang mansa sang balatian. 49Agod manginmatinlo ang balay, magakuha sia sing duha ka bilog nga pispis, kahoy nga sedro, mapula nga higot nga nahimo sa panapton, kag isa ka sanga sang kahoy nga isopo. 50Ihawon niya ang isa ka pispis sa ibabaw sang yahong nga nahimo sa lunang, nga may unod nga tubig halin sa tuboran. 51Dayon kuhaon niya ang kahoy nga sedro, ang isopo, ang pula nga higot nga nahimo sa panapton, kag ang buhi nga pispis kag itum-oy ini sa dugo sang pispis nga gin-ihaw nga may tubig nga tab-ang. Kag wisikan niya ang balay sing makapito. 52Sa sini nga paagi pagatinluan niya ang balay paagi sa dugo sang pispis, sa tab-ang nga tubig, sa buhi nga pispis, sa kahoy nga sedro, sa isopo, kag sa pula nga higot nga nahimo sa panapton. 53Dayon paluparon niya ang buhi nga pispis sa gwa sang siudad pakadto sa kawayangan. Sa sini nga paagi himuon niya ang tulomanon sa pagpaninlo sang balay, kag manginmatinlo ini.”
54Amo ini ang mga kasugoan nahanungod sa makalalaton nga mga balatian sa panit: 55-56sa mga arikis, mga hubag, ukon mga pagpalanghabal; kag mansa sang balatian sa mga bayu ukon mga pamalay. 57Ini nga mga kasugoan nagahatag sing kinatuhay kon ano ang di-matinlo kag ang matinlo.
Currently Selected:
Levitico 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
