Levitico 13
13
Mga Kasugoan Nahanungod sa mga Balatian sa Panit nga Makalalaton
1Ang Ginoo naghatag kay Moises kag kay Aaron sini nga mga pagsulondan: 2“Ang bisan sin-o nga may katol sa panit, isa ka hubag ukon pagpalanghabal nga mahimo nga isa ka balatian nga makalalaton, pagadalhon sia sa pari nga kaliwat ni Aaron. 3Ang pari magausisa sang amo nga balatian, kag kon ang mga bulbol sa sini nagputi kag daw lambot gid ini sa unod, makalalaton ini nga balatian sa panit. Sa tapos mausisa sang pari ang amo nga tawo, ipahibalo niya sia nga di-matinlo. 4Pero kon ang pagpalanghabal maputi kag indi man lambot sa unod sa palibot sini kag ang mga bulbol wala man magputi, pagapainon sang pari ang amo nga tawo sa sulod sang pito ka adlaw. 5Ang pari magausisa liwat sa iya sa ikapito nga adlaw kag kon sa iya hunahuna ang balatian amo man gihapon kag wala man maglapta, iya naman sia painon sa sulod sang pito pa gid ka adlaw. 6Ang pari magausisa naman sa iya sa ikapito nga adlaw kag kon ang balatian nagkupos na kag wala man maglapta, ipahibalo niya sia nga matinlo, palanghabal lamang ini. Ang tawo magalaba sang iya mga bayu kag manginmatinlo sia. 7Pero kon ang balatian maglapta sa tapos sia mausisa sang pari kag mapahibalo nga matinlo sia, kinahanglan mag-atubang sia liwat sa pari. 8Pagausisaon sia liwat sang pari, kag kon nagalapta ini, ipahibalo niya sia nga di-matinlo, isa ini ka balatian sa panit nga makalalaton.
9“Kon ang bisan sin-o may balatian sa panit nga makalalaton, pagadalhon sia sa pari, 10nga amo ang magausisa sa iya. Kon may lamuti sa iya panit kag tungod sini nagaputi ang mga bulbol kag puno ini sing nana, 11isa ini ka balatian nga nagaliwatliwat. Ang pari magapahibalo nga sia di-matinlo, indi na kinahanglan nga painon pa sia, tungod kay maathag na nga di-matinlo sia. 12Kon ang balatian sa panit naglapta na kag naglikop na ini halin sa iya ulo tubtob sa iya dapadapa, 13pagausisaon sia liwat sang pari. Kon masapwan niya nga naglikop na ini sa bug-os nga lawas, ipahibalo niya nga ang tawo matinlo. Kon ang iya bug-os nga panit nagpalamuti, matinlo na sia. 14Pero sa tion nga magpakita ang nagabuad-ad nga unod, di-matinlo sia. 15Ang pari magausisa liwat sa iya, kag kon makita niya ang nagabuad-ad nga unod, ipahibalo niya nga sia di-matinlo. Ang nagabuad-ad nga unod nagakahulogan nga makalalaton ini nga balatian sa panit, kag ang tawo di-matinlo. 16Pero kon ang palanghabal magkupos kag magpalamuti ini liwat, ang tawo magakadto sa pari, 17nga magausisa liwat sa iya. Kon ang palanghabal nagputi, matinlo sia kag ang pari magapahibalo nga sia matinlo.
18“Kon ang bisan sin-o may hubag nga nag-ayo 19kag sa ulihi may nagtubo nga lamuti ukon nagpalamula sa lugar sang hubag, magakadto sia sa pari. 20Pagausisaon sia sang pari, kag kon nagalambot gid ini sa unod kag ang mga bulbol sa sini nga bahin nagputi, ipahibalo niya nga sia di-matinlo. Ini nga balatian sa panit makalalaton nga nagsugod sa isa ka hubag. 21Pero kon makita sang pari nga nagausisa nga ang mga bulbol wala magputi kag hapaw man lang ini sa panit, kag nagkupos na ini, pagapainon sia sang pari sa sulod sang pito ka adlaw. 22Kon maglapta ini, ang pari magapahibalo nga sia di-matinlo, kay may balatian sia nga makalalaton. 23Pero kon wala man ini magbaylo kag wala man maglapta, pinalian lamang ini sang hubag, kag ang pari magapahibalo nga sia matinlo.
24“Kon may isa ka tawo nga napaso, kag ang iya unod nagpalamuti ukon nagpulapula, 25pagausisaon sia sang pari. Kon ang mga bulbol sa sini nga bahin nagputi kag daw lambot gid ini sa unod, isa ini ka balatian sa panit nga makalalaton nga nagsugod sa paso kag ang pari magapahibalo nga sia di-matinlo. 26Pero kon ang mga bulbol sa sini nga bahin wala magputi kag hapaw man lang ini kag nagakupos na, pagapainon sia sang pari sa sulod sang pito ka adlaw. 27Pagausisaon sia liwat sang pari sa ikapito nga adlaw, kag kon nagalapta ini, isa ini ka balatian sa panit nga makalalaton, kag ang pari magapahibalo nga sia di-matinlo. 28Pero kon wala man ini magbaylo kag wala man maglapta, kag nagkupos na, isa lamang ini ka hubag. Ang pari magapahibalo nga sia matinlo, tungod kay isa lamang ini ka pinalian sang paso.
29“Kon ang isa ka lalaki ukon babayi may palanghabal sa ulo ukon sa sag-ang, 30ang pari magausisa sini. Kon nagalambot ini sa unod kag ang mga buhok sa sini nga bahin nagadalag kag nagalaka, isa ini ka balatian sa panit nga makalalaton, kag ang pari magapahibalo nga sia di-matinlo. 31Kon sa pag-usisa sa iya sang pari, masapwan nga hapaw man lang ini, pero wala pa sing maayo nga buhok nga nagatubo sa sini, pagapainon sia sang pari sa sulod sang pito ka adlaw. 32Pagausisaon liwat ini sang pari sa ikapito nga adlaw, kag kon wala ini maglapta kag wala man sing nagadalag nga mga buhok sa sini nga bahin, kag kon daw hapaw man lang ini, 33pagakiskisan sang amo nga tawo ang iya ulo luas lang sa palibot nga bahin nga nagapalanghabal. Dayon pagapainon sia sang pari sa sulod naman sang pito ka adlaw. 34Sa ikapito nga adlaw ang pari magausisa liwat sang iya balatian, kag kon wala ini maglapta, kag kon daw hapaw man lang ini, ipahibalo niya sia nga matinlo. Ang tawo magalaba sang iya mga bayu, kag manginmatinlo sia. 35Pero kon ang balatian maglapta sa tapos mapahibalo nga sia matinlo, 36ang pari magausisa liwat sa iya. Kon ang balatian naglapta, indi na kinahanglan nga magpangita pa sia sang mga buhok nga nagadalag, kay maathag gid nga di-matinlo sia. 37Pero, kon sa panghunahuna sang pari, ang balatian wala maglapta kag ang maayo nga mga buhok nagatubo na sa sini, ang balatian nag-ayo na, kag ang pari magapahibalo nga sia matinlo.
38“Kon ang isa ka lalaki ukon babayi may nagapalamuti sa iya panit, 39ang pari magausisa sa iya. Kon ang pagpalamuti malubog, isa lamang ini ka katikati nga nagbuswang sa panit, kag ang amo nga tawo matinlo.
40-41“Kon ang buhok sang isa ka tawo nagakaunot sa iya alimpudwan ukon sa atubangan nga bahin sang iya ulo, wala ini nagakahulogan nga ang amo nga tawo di-matinlo. 42Pero kon sa kalbo nga bahin sang ulo makita ang nagapalamuti kag nagapalamula nga hubag, isa ini ka balatian sa panit nga makalalaton. 43Pagausisaon sia sang pari, kag kon may yara nga hubag nga mapulapula ukon nagapalamuti, 44ang pari magapahibalo nga di-matinlo sia, tungod sang makalalaton nga balatian sa iya ulo.
45“Ang tawo nga may makalalaton nga balatian sa panit dapat magsuksok sang gisi nga mga bayu, kag pabay-an niya ang iya buhok nga wala mahusay, tabunan niya ang naubos nga bahin sang iya guya, kag magsinggit, ‘Di-matinlo ako, di-matinlo ako!’ 46Magapabilin sia nga di-matinlo tubtob nga wala pa sia mag-ayo sa iya balatian kag kinahanglan mag-estar sia sa gwa sang kampo nga malayo sa iban nga mga tawo.
Mga Kasugoan Nahanungod sang Mansa sang Balatian
47“Kon may yara nga mansa sang balatian#13:47 MANSA SANG BALATIAN: Sa Hebreo, angkpulong para sa “balatian sa panit nga makalalaton” kag ang “mansa sang balatian” pareho. sa bayu, bisan delana man ukon lino, 48ukon bisan ano nga lino ukon delana nga panapton, ukon sa panit ukon sa bisan ano nga nahimo sa panit sang sapat, 49kon ang mansa buloberde ukon mapulapula, nagalapta ini nga mansa sang balatian, kag kinahanglan ipakita ini sa pari. 50Ang pari magausisa sini kag magatago sing pain sini sa sulod sang pito ka adlaw. 51Usisaon niya ini liwat sa ikapito nga adlaw, kag kon ang mansa sang balatian naglapta, ang butang nga namansahan di-matinlo. 52Pagasunogon ini sang pari, tungod kay ini isa ka mansa sang balatian nga nagalapta kag kinahanglan ini sunogon.
53“Pero kon sa pag-usisa sang pari, makita niya nga ang mansa sang balatian wala maglapta sa amo nga butang, 54pahugasan niya ini kag ipatago sing pain sa sulod sang pito naman ka adlaw. 55Dayon iya ini usisaon, kag kon ang mansa sang balatian wala magbaylo ang kolor, bisan wala ini maglapta, sa gihapon di-matinlo ini, kinahanglan sunogon mo ini, bisan ang iya mansa yara sa atubangan ukon sa likod man. 56Pero kon sa pag-usisa sini liwat sang pari, ang mansa sang balatian napanas, iya ini gision sa panapton ukon sa panit. 57Dayon, kon sa liwat makita ang mansa sang balatian kag nagalapta ini, ang tag-iya magasunog sini nga butang. 58Kon labhan niya ini nga butang kag ang mansa mapanas, labhan niya ini liwat, kag manginmatinlo ini.”
59Gani, amo ini ang kasugoan nahanungod sang mansa sang balatian sa bayu, bisan delana ini ukon lino, ukon sa lino ukon sa delana nga panapton, ukon sa bisan ano nga butang nga nahimo sa panit. Ini nga kasugoan nagatugot sa inyo sa paghibalo kon ining mga butang matinlo ukon di-matinlo.
Currently Selected:
Levitico 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
