Mga Panalambiton 4
4
Ang Jerusalem sa Tapos Mapukan Ini
1Ang aton nagabadlak nga bulawan naglus-aw;
ang mga bato sang Templo naglalapta sa mga dalan.
2Ang mga lalaki nga pamatan-on sang Sion malahalon subong sang bulawan,
pero karon ginakabig sila kaangay sang mga kolon.
3Bisan ang iloy nga lobo magabatiti sang iya mga tutoy,
pero ang akon mga tawo kaangay sang mga ostrit nga mapintas sa ila mga buto.
4Ginapabay-an nila ang ila mga lapsag nga mapatay sa gutom kag kauhaw;
ang mga kabataan nagapangayo sing pagkaon kag wala sing isa nga nagahatag sa ila.
5Ang mga tawo nga nagkaon anay sing manamit nga mga pagkaon nagakalamatay sa gutom sa mga dalan.
Yadtong ginpadaku sa patuyang nagaukay sa basurahan para may kaunon.
6Ang#Gen. 19:24. akon mga tawo ginsilutan labaw pa sang sa mga pumoluyo sang Sodoma,
nga napukan gilayon sa mga kamot sang Dios.
7Ang aton mga prinsipe#4:7 prinsipe: ukonNazareo. wala madagtai kag putli subong sang yelo,
mapasik kag mabakod nga maayo sing lawas.
8Karon nagahamyang sila nga wala makilala sa mga kalsada, patay sila nga nagapalanggit-om ang ila mga guya.
Ang ila panit subong kamala sang kahoy, nagapilit sa ila mga tul-an.
9Yadtong nagkalamatay sa inaway mas maayo pa sang sa nagkalamatay sang ulihi,
nga nagkalamatay sang amat-amat tungod sa gutom kag wala sing kalan-on agod nga mabuhi.
10Ang#Deut. 28:57; Ezeq. 5:10. kalalat-an nga nag-abot sa akon mga tawo nagdala sing kahadlok,
ang mapinalanggaon nga mga iloy naglaga sang ila kaugalingon nga mga kabataan para kaunon.
11Ginbuy-an sang Ginoo ang iya nagabalingaso nga kaakig,
nagpamakot sia sang kalayo sa Sion nga nag-upos sini.
12Wala sing isa bisan diin, bisan ang mga pangulo sang iban nga mga pungsod,
nga nagpati nga ang bisan sin-o nga manuggubat makasulod sa mga pwerta sang Jerusalem.
13Pero natabo ini tungod kay ang iya mga propeta kag mga pari nagpakasala,
kag nanginkabangdanan sang kamatayon sang mga tawo nga wala sing sala.
14Ang iya mga pangulo nagdalangdalang sa mga dalan kaangay sang bulag nga mga tawo,
nabulit sila sang dugo kag wala sing bisan isa nga magtandog sa ila.
15Ang mga tawo nagsinggit, “Palayo kamo! Nadagtaan kamo! Indi magtandog sa akon!”
Gani nagtalangtalang sila halin sa isa ka pungsod pakadto sa isa, nga wala sing isa nga nag-abiabi sa ila.
16Ang Ginoo wala na nagkabalaka sa ila; sia mismo ang nagpaalaplaag sa ila.
Wala sia nagsapak sa aton mga pari kag mga pangulo.
17Nagpaabot kami nga nagpaabot tubtob nga wala na sing bulig nga nag-abot.
Naghulat kami sing bulig gikan sa isa ka pungsod nga wala sing sarang mabulig.
18Ang kaaway nagabantay sa amon, indi gani kami makalakat sa mga dalan.
Ang amon mga inadlaw tapos na. Ang katapusan nag-abot na.
19Ginlagas nila kami sing mas madasig pa sang sa mga agila nga nagasulip halin sa langit.
Ginsunod nila kami sa mga bukid, gindakop nila kami sing kibot sa desierto.
20Gindakop nila ang ginahalinan sang amon kabuhi, ang hari nga ginpili sang Ginoo,
nga amon ginsaligan nga magaapin sa amon sa tagsa ka manuggubat.
21Magkadlaw kamo, mga tawo sang Edom kag Uz, magkalipay kamo samtang mahimo pa ninyo ini.
Ang kalalat-an magaabot man sa inyo; kamo man magadulingduling sa kahubog kag magahublas sang inyo kaugalingon.
22Ang Sion nagbayad sang iya sala, indi na kita pag-ipadala liwat sang Ginoo subong mga bihag.
Pero ikaw, Edom, pagasilutan ka sang Ginoo; sia magapakita sang imo mga sala.
Currently Selected:
Mga Panalambiton 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
