Mga Panalambiton 3
3
Pagsilot, Paghinulsol, kag Paglaom
1Ako ang nakahibalo kon daw ano ang pagsilot sang Dios.
2Gintabog niya ako sa mangitungito nga kadudulman
3kag ginbunal niya ako nga wala sing untat kag kaluoy.
4Sang untatan niya ako, pilason ako kag bali ang akon mga tul-an.
5Ginbilanggo niya ako sa kasubo kag kasakit.
6Ginpilit niya ako sa pag-estar sa wala untat nga kadudulman sang kamatayon.
7Ginkadenahan niya ako, isa ako ka binilanggo nga wala sang paglaom nga makapalagyo.
8Nagsinggit ako sing mabaskog sa pagpangayo sing bulig, pero ang Dios wala magpamati.
9Nagapiangpiang ako sa akon paglakat, ang bato nga mga pader nagabalabag sa akon bisan diin ako magliso.
10Naghulat sia sa akon kaangay sang isa ka uso; naglumpat sia sa akon kaangay sang isa ka leon.
11Ginlagas niya ako tubtob sa masiot nga lugar, gingus-ab niya ako kag ginbayaan.
12Ginbingat niya ang iya pana kag ginpuntariya ang mga baslay sa akon.
13Gin-igo niya ako sang iya mga baslay.
14Ang mga tawo nagkadlaw sa akon sa bug-os nga adlaw; nanginkaladlawan ako sa ila tanan.
15Puro mapait nga kasakitan kag pag-antos ang iya nga ginpakaon kag ginpainom sa akon.
16Ginnusnos niya ang akon guya sa duta, kag ginbingaw ang akon mga ngipon sa dalagku nga mga bato.
17Nalipatan ko kon ano ang maayong lawas kag paghidait kag kalipay.
18Indi na ako maglawig sa pagkabuhi; ang akon paglaom sa Ginoo wala na.
19Ang pagpanumdom sang akon kasakit, sang akon pagdalangdalang, mapait kag hilo.
20Nagapanumdom ako sing masunson sini, kag nagpalangluya ang akon espiritu.
21Pero ang paglaom nagabalik kon madumdoman ko ining isa ka butang:
22Ang gugma kag kaluoy sang Ginoo nagapadayon sa gihapon,
23bag-o kaangay sang kaagahon, pat-od kaangay sang pagbutlak sang adlaw.
24Ang Ginoo amo ang tanan sa akon, kag gani nagalaom ako sa iya.
25Ang Ginoo maayo sa tagsatagsa nga nagasalig sa iya,
26gani labing maayo para sa aton ang maghulat sing mapailubon, sa paghulat sa iya sa pagluwas sa aton,
27kag labing maayo ang pagtuon sining pagpailob sa aton pagkapamatan-on.
28Kon mag-antos kita dapat magpungko kita sing isahanon nga may pagpailob;
29indi kita magreklamo, kay may yara pa nga paglaom.
30Bisan ginbunal kag gin-insultohan, batunon naton ini tanan.
31Ang Ginoo maluloy-on, kag indi sia magsikway sa aton sa walay katubtoban.
32Nagapadala sia sing kasubo sa aton, pero ang iya gugma sa aton pat-ud kag malig-on.
33Wala sia nagakalipay sa paghatag sa aton sing kasubo ukon kasakit.
34Ang Ginoo nakahibalo kon ginatasak kita sa bilangguan;
35nakahibalo sia kon wala ginahatag sa aton ang katarungan nga iya ginahatag sa aton.
36Nakahibalo sia kon ang katarungan ginalubag sa hukmanan.
37Ang kabubot-on sang Ginoo amo lamang ang ginpatuman sa gihapon.#3:37 Ang…gihapon: ukonWala sing matabo nga isa ka butang kon indi kabubot-on sang Ginoo.
38Ang maayo kag malain nagakatabo sa iya mando.
39Ngaa bala magreklamo kita, kon ginasilutan kita tungod sa aton sala?#3:39 Ngaa…sala: ukonNgaa bala magreklamo kita kon ginasilutan tungod sa sala samtang nga nagakabuhi pa kita?
40Usisaon ta ang aton mga pagginawi kag magbalik sa Ginoo.
41Buksan naton ang aton mga tagipusoon sa Dios sang langit, kag magpangamuyo,
42“Nagpakasala kami, kag nagbato, kag ikaw, O Ginoo, wala magpatawad sa amon.
43“Ginlagas mo kami kag ginpamatay, ang imo kaluoy gintabunan sang imo kaakig,
44sang isa ka madamol nga gal-om sang kaakig nga ang amon mga pangamuyo indi makalambot sa imo.
45Ginhimo mo kami nga halabuyan sang sagbot sang kalibutan.
46“Gin-insultohan kag ginyaguta kami sang tanan namon nga mga kaaway.
47Nakaagi kami sa kalalat-an kag kalaglagan; nagkabuhi kami sa katalagman kag kahadlok.
48Kaangay sang suba, ang akon mga luha nagailig sa akon mga mata, tungod sang kalaglagan sang akon mga tawo.
49“Kaangay sang sapa, ang akon mga luha magailig nga wala sing untat,
50tubtob magtamod ang Ginoo gikan sa langit kag makita niya kami.
51Ang nadangatan sang mga kababayin-an sang akon siudad nagbuong sang akon tagipusoon.
52“Kaangay sang isa ka pispis nasiod ako sang mga kaaway nga wala sing kabangdanan sa pagdumot sa akon.
53Ginhaboy nila ako nga buhi sa buho, kag gintabunan nila ini sing bato.
54Ang tubig nag-amat-amat lapaw sa akon, kag naghunahuna ako nga ang kamatayon malapit na.
55“Gikan sa kadadalman sang buho, O Ginoo, nagpanawag ako sa imo,
56kag sang nagpakitluoy ako nga pamatian mo ang akon pagpanawag, nabatian mo ako.
57Nagsabat ikaw sa akon, kag ginsingganan mo ako nga indi magkahadlok.
58“O Ginoo, nag-abot ikaw sa paghilway sa akon, kag ginluwas mo ang akon kabuhi.
59Maghukom ka pabor sa akon, nahibal-an mo ang mga sayop nga ginhimo batok sa akon.
60Nahibal-an mo kon daw ano ang pagdumot sang akon mga kaaway sa akon, kag ang ila pagplano batok sa akon.
61“O Ginoo, nabatian mo ang ila pagyaguta sa akon, nahibal-an mo ang tanan nila nga mga pagplano batok sa akon.
62Sa bilog nga adlaw nagahambal sila nahanungod sa akon kag nagahimo sang ila mga plano.
63Halin sa aga tubtob sa gab-i nagayaguta sila sa akon.
64“Siluti sila sang ila nahimo, O Ginoo.
65Pakamalauta sila, kag pun-a sila sang kasubo!
66Lagsa sila kag papasa sila sa duta!”
Currently Selected:
Mga Panalambiton 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
