Josue 8
8
Ang Pag-agaw kag Paglaglag sang Ay
1Ang Ginoo nagsiling kay Josue, “Indi ka magkahadlok ukon madulaan sing paglaom. Dalha ang tanan nga mga hangaway upod sa imo kag magtaklad sa pagsalakay sang Ay. Padag-on ko ikaw batok sa hari sang Ay, kag ang iya mga tawo, siudad, kag duta mangin-inyo. 2Pagahimuon mo man sa Ay, kag sa hari sini, ang imo ginhimo sa Jerico kag sa hari sini, pero sa sini nga tion sarang mo na makuha ang ila mga pagkabutang kag kasapatan para sa inyo kaugalingon. Maghanda kamo sang kibot nga pagsalakay sa siudad paagi sa likod nga bahin sini.”
3Gani si Josue kag ang tanan nga mga hangaway naghanda sa pagtaklad sa pagsalakay sang Ay. Nagpili si Josue sing 30,000 ka maisog nga hangaway kag ginpalakat sila sa kagab-ihon. 4Kag nagmando sia sa ila: “Panago kamo sa nalikod nga bahin sang siudad pero indi kamo magpalayo sing tama gid sa siudad, kundi maghanda sa pagsalakay. 5Ako kag ang akon mga tinawo magapadulong sa siudad. Kon maggwa sila sa pag-away batok sa amon, magapalagyo kami sa ila subong sang ginhimo namon sang nagligad nga pag-away. 6Pagalagson nila kami tubtob mapapalayo namon sila sa siudad. Magahunahuna sila nga nagapalagyo kami sa ila subong sang ginhimo namon sang una. 7Dayon magagwa kamo sa inyo ginapanaguan, kag agawa ninyo ang siudad. Ang Ginoo nga inyo Dios magahatag sini sa inyo. 8Sa tapos ninyo maagaw ang siudad, sunoga ninyo ini, suno sa ginsugo sang Ginoo. Amo ini ang mando sa inyo.” 9Gani ginpalakat sila ni Josue, kag nagkadto sila sa ila palanaguan kag naghulat didto, sa nakatundan sang Ay, sa gintung-an sang Ay kag Betel. Si Josue nagpabilin sa kampo sadto nga gab-i.
10Sang pagkaaga, aga pa gid nagbangon si Josue kag ginpatawag niya ang mga hangaway sing tingob. Dayon sia kag ang mga pangulo sang Israel nag-una sa mga tawo pakadto sa Ay. 11Ang mga soldado nga kaupod niya nagpadulong sa atubangan nga pwerta sang siudad, kag nagpatindog sang ila kampo sa naaminhan nga bahin, nga may kapatagan nga nagaulot sa ila kag sa Ay. 12Ginmanduan ni Josue ang mga 5,000 ka mga soldado sa pagpanago sa nakatundan sang siudad, sa gintung-an sang Ay kag Betel. 13Amo ini ang pagpahamtang sang mga soldado para sa inaway: ang madamo nga mga hangaway yara sa naaminhan sang siudad, kag ang iban sa nakatundan. Si Josue nagpabilin sa sadto nga gab-i sa kapatagan. 14Sang makita sang hari sang Ay ang mga tinawo ni Josue, sa gilayon naghulag sia. Sia kag ang tanan niya nga mga tinawo naggwa pakadto sa Kapatagan sang Jordan sa pagpakig-away batok sa mga Israelinhon sa lugar nga ila man gin-awayan sang una. Wala niya mahibal-i nga pagasalakayon sia halin sa nalikod nga bahin sang siudad. 15Si Josue kag ang iya mga tawo nagpakunokuno sa pagpalagyo, kag nagdalagan palayo pakadto sa desierto. 16Ang tanan nga mga tawo sa siudad ginpangtawag sing tingob sa paglagas sa ila, kag samtang ginalagas nila si Josue, nagaamat sila palayo sa siudad. 17Ang tanan nga mga tawo sa Ay#8:17 Ang isa ka dumaan nga pagbadbadAy; sa HebreoAy kag Betel. naglagas sang mga Israelinhon. Ang siudad ginbayaan nga bukas ang pwerta, kag wala gid sing may nabilin sa pag-apin sini.
18Dayon ang Ginoo nagsiling kay Josue, “Ipuntariya ang imo bangkaw sa Ay, tungod kay ihatag ko ini sa inyo.” Ginhimo ni Josue ang ginsiling sa iya, 19kag sang mabayaw niya ang iya kamot, ang mga tawo nga nagpalanago nagtindog gilayon, nagdalagan pasulod sa siudad, kag gin-agaw ini. Ila dayon ginsunog ang siudad. 20Sang magbalikid ang mga tawo sang Ay, nakita nila ang aso nga nagatub-ok pa langit. Wala na sila sing mapalagyuhan, tungod kay ang mga Israelinhon nga nagdalagan pakadto sa desierto nagbalik sa pagpakig-away batok sa ila. 21Sang makita ni Josue kag sang iya mga tawo nga naagaw na sang iya mga kaupdanan ang siudad kag nasunog na ini, nagbalik sila kag ginpamatay nila ang mga tawo sang Ay. 22Ang mga Israelinhon sa siudad naggwa kag nagpakig-away batok sa mga tawo sang Ay. Ginlibutan gid sila sang mga Israelinhon, kag ginpamatay sila tanan. Wala sing may nakapalagyo ukon nabilin nga buhi, 23luas lamang sa hari sang Ay. Gindakop nila sia kag gindala kay Josue.
24Ginpamatay sang mga Israelinhon ang tagsa ka kaaway didto sa desierto diin sila ginlagas nila. Dayon nagbalik sila pakadto sa Ay, kag ginpamatay ang tanan nga yadto didto. 25Ang tanan nga mga pumoluyo sang Ay nga napatay sa sadto nga adlaw, 12,000 ka mga lalaki kag babayi. 26Padayon nga ginpuntariya ni Josue ang iya bangkaw sa Ay, kag wala niya ini ginbutang tubtob nga ang tanan nga mga tawo didto napamatay. 27Ginpanguha sang mga Israelinhon para sa ila kaugalingon ang mga kahayupan kag mga pagkabutang nga ila naagaw sa siudad suno sa ginsiling sang Ginoo kay Josue. 28Ginsunog ni Josue ang Ay, kag ginbayaan nga nalaglag sing bug-os tubtob sini nga adlaw. 29Ginbitay niya sa kahoy ang hari, kag ginbilin sia didto tubtob sa hapon. Sang pagtunod sang adlaw nagsugo si Josue nga kuhaon ang iya bangkay, kag ila ini ginhaboy sa pwerta sang siudad. Gintampukan nila ini sang isa ka daku nga tinumpok nga mga bato, nga tubtob sini nga adlaw yadto pa didto.
Ang Kasugoan Ginbasa sa Bukid sang Ebal
30Dayon#Deut. 27:2-8. nagpatindog si Josue sing altar sa Ginoo nga Dios sang Israel sa Bukid sang Ebal. 31Ginhimo#Exo. 20:25. niya ini suno sa mga sugo nga ginhatag ni Moises nga alagad sang Ginoo, sa mga Israelinhon, suno sa ginasiling sa Kasugoan ni Moises: “ang altar nga nahimo sa mga bato nga wala makaagi kihad sang mga gamit nga salsalon.” Nagdulot sila sa sini nga altar sing mga halad nga sinunog para sa Ginoo, kag nagdulot man sila sing mga halad sa paghiambit. 32Samtang nagatan-aw didto ang mga Israelinhon, ginkopya ni Josue sa mga bato sang altar ang Kasugoan nga ginsulat ni Moises. 33Ang#Deut. 11:29; 27:11-14. tanan nga mga Israelinhon kaupod sang ila mga pangulo, mga opisyales, kag mga hukom, subong man sang mga dumoluong nga kaupod nila, nagtindog sa magtimbang nga kilid sang Kaban sang Kasugtanan sang Ginoo nga nagaatubang sa mga pari nga Levinhon nga nagdala sini. Ang katunga sang mga tawo nagtindog nga nagatalikod sa Bukid sang Gerizim kag ang katunga nagatindog nga nagatalikod sa Bukid sang Ebal. Si Moises nga alagad sang Ginoo nagsugo sa ila sadto anay sa paghimo sini kon mag-abot na ang tion nga sila magabaton sang pakamaayo sang mga pari. 34Dayon ginbasa ni Josue sing mabaskog ang bug-os nga Kasugoan, lakip ang mga pagbendisyon kag ang mga pagpakamalaut subong sang nasulat sa Libro sang Kasugoan. 35Ang tagsa ka sugo ni Moises ginbasa ni Josue sa bug-os nga katilingban nga nagalakip sang mga babayi, kabataan kag mga dumoluong nga nagaestar kaupod nila.
Currently Selected:
Josue 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
