Josue 7
7
Ang Sala ni Acan
1Ang ginsugo sang Ginoo sa Israel nga indi magkuha sa Jerico sang bisan ano nga dapat laglagon wala gintuman. Ang isa ka tawo nga ginhingalanan kay Acan wala magtuman sina nga sugo, gani ang Ginoo nagbalingaso sa kaakig sa mga Israelinhon. Si Acan, anak nga lalaki ni Carmi kag apo ni Zabdi, kag katapo sang barangay ni Zera nga bahin sang tribo ni Juda.
2Karon si Josue nagpadala sing mga tawo halin sa Jerico pakadto sa Ay, isa ka siudad sa sidlangan sang Betel, nga malapit sa Betaben. Ginsugo niya sila sa pagkadto kag sa pagtan-aw sang duta. Gani ang mga tawo naglakat kag nagpang-espiya sa Ay. 3Sang makabalik sila kay Josue, nagsugid sila nga nagasiling, “Indi na kinahanglan nga ang tanan magkadto. Padala ka lang sing mga 2,000 ukon 3,000 ka mga lalaki sa pagsalakay sa Ay. Indi na pag-ipadala ang tanan nga hangaway sa pagpakig-away didto. Indi man ato daku nga siudad.” 4Gani mga 3,000 ka mga Israelinhon ang naghimo sang pagsalakay, pero ginpaisol sila sang mga taga-Ay. 5Ginlagas sang mga taga-Ay ang mga Israelinhon halin sa pwerta sang siudad tubtob sa ginakuhaan sang dalagku nga mga bato, kag ginpamatay ang mga trayntay sais sa ila sa dulhogan sang bukid. Dayon ang mga Israelinhon nadulaan sing kaisog kag hinadlukan sila.
6Gingisi ni Josue kag sang mga pangulo sang Israel ang ila mga bayu sa kasubo, naghapa sila sa duta sa atubangan sang Kaban sang Kasugtanan sang Ginoo, kag nagpabilin didto tubtob sa gab-i, nga nasabwagan sang yab-ok ang ila mga ulo sa pagpakita sang ila kasubo. 7Kag si Josue nagsiling, “O Ginoo nga Gamhanan, ngaa nga gindala pa nimo kami diri sa tabok sang Jordan? Sa pagtugyan bala sa amon sa mga Amornon? Sa paglaglag bala sa amon? Ngaa wala na lang kami magpabilin didto sa pihak sang Jordan? 8Ano bala ang akon masiling, O Ginoo, karon nga ang Israel nag-isol sa kaaway? 9Ang mga Canaanhon kag ang tagsatagsa sa pungsod makabati sini, pagalibutan nila kag pamatyon kami tanan! Kag ano bala ang imo himuon sa pag-apin sang imo dungog?”
10Ang Ginoo nagsiling kay Josue, “Bangon ka! Ngaa bala nagahapa ka sa duta sing subong sini? 11Ang mga tawo sang Israel nakasala! Ginlapas nila ang kasugtanan nga ginsugo ko nga ila tumanon. May ginkuha sila nga mga butang nga dapat pagalaglagon. Ginkawat nila ini, nagbutig sila nahanungod sini, kag ginsimpon nila ini sa ila mga pagkabutang. 12Tungod sini ang mga Israelinhon indi makabato sa ila mga kaaway. Nagpalagyo sila sa ila mga kaaway, tungod kay sila mismo gintugyan nga pagalaglagon! Indi na ako mag-upod sa inyo, luas lamang kon laglagon ninyo ang mga butang nga akon ginsugo sa inyo nga indi pagkuhaon! 13Tindog ka! Pakabalaana ang mga tawo, kag ihanda sila sa pag-atubang sa akon. Singgana sila nga maghanda buas, tungod kay ako, ang Ginoong Dios sang Israel, nagasiling sini: ‘O mga tawo sang Israel, may mga pagkabutang nga yara sa inyo, nga ginsugo ko nga inyo laglagon! Indi kamo makabato sa inyo mga kaaway tubtob makuha ini nga mga butang sa inyo!’ 14Gani buas sa aga, paatubangon kamo, suno sa inyo tribo. Ang tribo nga pilion ko, magapalapit suno sa kabarangayan. Ang barangay nga pilion ko magpalapit suno sa tagsa ka panimalay. Ang panimalay nga pilion ko magpalapit suno sa tagsa ka tawo. 15Ang tawo nga madakpan nga may iya sini nga pagkabutang pagasunogon, upod sa iya panimalay kag sang tanan niya nga pagkabutang. Nakahimo sia sing tama kalaut nga butang sa Israel kag ginlapas niya ang kasugtanan nga ginhimo sang akon mga tawo upod sa akon!”
16Si Josue nagbangon sing aga pa gid, kag gindala niya sa atubangan ang bug-os nga Israel suno sa kada tribo. Napilian ang tribo ni Juda. 17Gindala niya sa atubangan ang tribo ni Juda suno sa kada barangay, kag napilian ang barangay ni Zera. Dayon gindala niya sa atubangan ang barangay ni Zera suno sa kada panimalay, kag napilian ang panimalay ni Zabdi. 18Gani gindala niya ang panimalay ni Zabdi sa atubangan suno sa kada tawo, kag napilian si Acan. Si Acan anak ni Carmi, kag apo ni Zabdi, kag katapo sang barangay ni Zera nga bahin sang tribo ni Juda. 19Kag si Josue nagsiling kay Acan, “Anak ko, magsugid ka sing matuod sa atubang sang Ginoo, ang Dios sang Israel, kag magtuad ka. Karon sugiri ako kon ano ang imo ginhimo. Indi ini pagtagutagoa sa akon.”
20Kag si Acan nagsabat, “Huo, nakasala ako batok sa Ginoo, ang Dios sang Israel, kag amo ini ang akon ginhimo. 21Sa amon naagaw nga mga pagkabutang, nakita ko ang isa ka matahom nga kunop nga nahimo sa Babilonia, pilak nga nagabug-at sing mga duha ka kilo kag tunga, kag isa ka barita nga bulawan nga nagabug-at sing mga tunga sa kilo. Naibog gid ako sa sini sa bagay nga ginkuha ko ini. Ginlubong ko ini sa sulod sang akon tolda, kag ang pilak yara sa idalom gid.”
22Gani nagpadala si Josue sing mga tawo nga nagdalagan pakadto sa tolda ni Acan, kag nakita nila nga nalubong didto ini nga mga pagkabutang nga dapat pagalaglagon kag ang pilak yara sa idalom. 23Ginpagwa nila ini sa tolda, kag gindala nila ini kay Josue kag sa tanan nga mga Israelinhon, kag ginbutang ini sa atubang sang Ginoo. 24Si Josue kag ang tanan nga mga tawo sang Israel nagkuha kay Acan, ang pilak, ang kunop, ang barita nga bulawan, ang iya mga anak nga lalaki kag babayi, ang iya mga baka, mga asno, mga karnero ang iya tolda kag ang tanan niya nga pagkabutang, kag gindala sila pakadto sa lugar nga ginatawag Kapatagan sang Kahul-anan. 25Kag si Josue nagsiling, “Ngaa man gindala mo ini nga mga kahul-anan sa amon? Karon ang Ginoo magadala sing kahul-anan sa imo!” Gani si Acan ginpatay sang tanan nga tawo paagi sa pagbato. Ginbato man nila ang iya panimalay kag ginsunog ang ila mga pagkabutang. 26Gintabunan nila sia sang daku nga tinumpukan sang mga bato nga ara pa didto tubtob sa sini nga adlaw. Gani yadto nga lugar ginatawag tubtob sini nga adlaw nga Kapatagan sang Kahul-anan.
Dayon nagtahaw ang kaakig sang Ginoo.
Currently Selected:
Josue 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
