Isaias 7
7
Ang Mensahe para kay Haring Acaz
1Sang#2 Hari 16:5; 2 Cron. 28:5-6. si Acaz nga anak ni Jotam kag apo ni Uzias amo ang hari sang Juda, si Rezin nga hari sang Siria upod kay Peca nga anak ni Remalias nga hari sang Israel, naggubat sang Jerusalem, pero wala nila ini maagaw.
2Sang pagkabati sang hari sang Juda nga ang mga hangaway sang Siria yara na sa duta sang Israel, sia kag ang iya mga katawhan hinadlukan gid sa bagay nga nagkulurog sila kaangay sang mga kahoy nga ginauyog sang hangin.
3Ang Ginoo nagsiling kay Isaias, “Dalha ang imo anak nga si Sear-jasub#7:3 SEAR-JASUB: Ining Hebreo nga ngalan nagakahulogan, “Ang pila ka bilog magabalik” (tan-awa ang 10:20-22). kag maglakat ka sa pagsugata kay Haring Acaz. Makita mo sia sa dalan sa diin nagaobra ang mga manughabol, sa punta sang kanal nga ginailigan sang tubig halin sa punong nga naibabaw. 4Singgana sia nga mag-andam, magkalma, kag indi magkahadlok ukon magsalasala. Ang kaakig ni Haring Rezin kag sang iya mga tinawo nga taga-Siria, kag ni Haring Peca wala sing katalagman pareho sang aso halin sa duha ka dungkolan. 5Ang Siria, upod sa Israel kag sang iya hari nagaplano batok sa imo. 6Ang tuyo nila amo ang paggubat sang Juda, sa pagpahadlok sa mga tawo agod mag-upod sa ila, kag dayon himuon nga hari ang anak ni Tabeel.
7“Pero ako, ang Ginoo nga Gamhanan nagasiling nga indi ini matabo. 8Tungod kay ang Damasco kapital lamang nga siudad sang Siria, kag ang Damasco ginagamhan lamang ni Haring Rezin. Nahanungod sa Israel, sa sulod sang sesentay singko ka tuig malaglag ini kag indi na makatindog subong isa ka pungsod. 9Ang Samaria kapital lamang nga siudad sang Israel, kag ang Samaria ginagamhan lamang ni Haring Peca.
“Kon ang inyo pagtuo indi mabakod, indi kamo makapadayon.”
Ang Tanda sang Emanuel
10Ang Ginoo nagpadala sing isa pa gid ka mensahe kay Acaz: 11“Pangayo ka sa Ginoo nga imo Dios sing isa ka tanda. Ayhan magahalin ini sa kadadalman sa kalibutan sang mga patay ukon halin sa langit sa ibabaw.”
12Si Acaz nagsabat, “Indi ako magpangayo sing isa ka tanda. Indi ko pagtilawan ang Ginoo.”
13Tungod sini si Isaias nagsiling, “Karon, mga kaliwat ni Haring David, pamati kamo. Indi maayo para sa inyo ang pagpaugtas sa mga tawo, paugtason man bala ninyo ang Dios? 14Karon#Mat. 1:23. ang Ginoo mismo magahatag sa inyo sang isa ka tanda: Ang isa ka dalaga#7:14 DALAGA: Ang Hebreo nga pulong diri nga ginbadbad “dalaga” indi amo ang pulong para sa “birhen,” kundi ini nga pulong napatuhoy sa isa ka pamatan-on nga babayi nga sarang na makapamana. Ang paggamit sang “birhen” sa Mat. 1:23 nagapakita sang binadbad sa Griego nga Daan nga Kasugtanan nga nahimo mga 500 ka tuig matapos sa panahon ni Isaias. magabusong kag magabata sing isa ka anak nga lalaki kag pagatawgon sia nga ‘Emanuel.’#7:14 EMANUEL: Ini nga ngalan sa Hebreo nagakahulogan “ang Dios kaupod naton.” 15Sa tion nga makahibalo na sia kon ano ang maayo kag malain, magakaon sia sing gatas kag dugos.#7:15 GATAS KAG DUGOS: Ini nga mga pagkaon may kaangtanan sa una nga mga inadlaw sang maragtas sang Israel. 16Bisan sa wala pa mag-abot ina nga tion, ang mga duta sang duha ka mga hari nga nagpahadlok sa inyo pagabayaan.
17“Ang Ginoo magapadala sa imo, sa imo mga tawo, kag sa bug-os nga harianon nga panimalay sing magamo nga mga adlaw nga sobra pa kalain halin sang pagpihak sang ginharian sang Israel sa Juda—ipagubat niya kamo sa hari sang Asiria.
18“Kon mag-abot ina nga tion, ang Ginoo magapanihol subong patimaan sa mga Ehiptohanon sa pag-abot kaangay sang mga langaw gikan sa pinakamalayo nga ginahalinan sang Nilo, kag sa mga Asiriahanon sa pag-abot halin sa ila duta kaangay sang mga putyokan. 19Magahugpa sila sa batuhon nga mga kapatagan kag sa mga kweba sa dalagku nga mga bato, kag tabunan nila ang tanan nga mga kahoy nga magamay kag ang tanan nga mga palahalban.
20“Kon mag-abot ina nga tion, ang Ginoo magasuhol sang isa ka barbero halin sa Eufrates—ang hari sang Asiria!—kag sia magabarbas sang inyo mga bungot, kag magakiskis sang buhok sa inyo mga ulo kag sang mga bulbol sa inyo mga lawas.
21“Kon mag-abot ina nga tion, bisan ang isa ka mangungoma may isa lamang ka bakiya nga baka kag duha ka mga karnero, 22magahatag ini sila sing madamo nga gatas kag indi sia pagkulangon. Ang tanan nga buhi nga nabilin sa duta may gatas kag dugos nga kalan-on.
23“Kon mag-abot ina nga tion, ang labing maayo nga talamnan sang ubas nga may linibo ka mga puno, ang tagsa ka talamnan sang ubas nga nagabili sang 1,000 ka bilog nga pilak, pagalumson sang mga talungon kag mga sapinit. 24Wala sing isa nga mangahas sa pagkadto didto nga wala sing pana. Ang bug-os nga pungsod mapuno sang mga sapinit kag sang mga talungon. 25Ang tanan nga mga kabakuloran nga sang una gintamnan pagatuboan sang mga sapinit kag mga tunok, kag wala sing isa nga mangisog sa pagkadto didto. Manginhalalban ini sang mga baka kag mga karnero.”
Currently Selected:
Isaias 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
