Isaias 38
38
Ang Pagmasakit kag ang Pag-ayo ni Haring Ezequias
(2 Hari 20:1-11; 2 Cron. 32:24-26)
1Sa sadto man nga tion, si Haring Ezequias nagmasakit kag diutayan lang mapatay. Ang propeta nga si Isaias nga anak ni Amoz nagbisita sa iya kag ginsingganan sia, “Ang Ginoo nagasiling nga ipahamtang mo sing nagakaigo ang tanan nga mga butang tungod kay indi na ikaw mag-ayo. Maghanda ka kay ikaw mapatay.”
2Si Ezequias nag-atubang sa dingding kag nagpangamuyo: 3“Dumdoma, O Ginoo, nga nag-alagad ako sa imo sing matutom kag mainunongon, kag nagtinguha gid ako sa paghimo sang imo luyag nga himuon ko.” Kag nagsugod sia sa paghibi sing tudo gid.
4Dayon ang Ginoo nagsugo kay Isaias 5sa pagbalik kay Ezequias kag singganon sia, “Ako, ang Ginoo, ang Dios sang isa sang imo mga katigulangan nga si David, nakabati sang imo pangamuyo kag nakakita sang imo mga luha; palawigon ko sing kinse pa ka tuig ang imo kabuhi. 6Luwason ko ikaw kag ini nga siudad sang Jerusalem gikan sa hari sang Asiria, kag padayunon ko ang pag-apin sa siudad.”
7Si Isaias nagsiling sa hari, “Ang Ginoo magahatag sa imo sang isa ka tanda sa pagpamatuod nga tumanon niya ang iya saad. 8Sa hagdanan nga ginpatindog ni Haring Acaz, ang Ginoo magapabalik sang landong sing napulo ka halintang.” Kag ang landong nagbalik sing napulo ka halintang.#38:8 Sa hagdanan…napulo ka halintang…halintang: ukon Sa orasan…napulo ka gutlo…gutlo (tan-awa ang 2 Mga Hari 20:9-11).
9Sa tapos nga si Ezequias nag-ayo sa iya balatian, nagsulat sia sining ambahanon sang pagdayaw:
10Naghunahuna ako nga samtang nagahingurosgan pa ako
magakadto ako sa kalibutan sang mga patay
kag indi na maglawig ang akon kabuhi.
11Naghunahuna ako nga sa sining kalibutan sang mga buhi
indi ko makita liwat ang Ginoo,
ukon ang bisan sin-o nga buhi.
12Ang akon kabuhi gin-utod kag natapos,
kaangay sang tolda nga ginguba,
kaangay sang panapton nga gin-utod sa iya tiral.
Naghunahuna ako nga ang Dios nagatapos na sang akon kabuhi.
13Sa bug-os nga gab-i naghibi ako sa kasakit,
nga daw ginbali sang leon ang akon mga tul-an.
Naghunahuna ako nga ang Dios nagatapos na sang akon kabuhi.
14Ang akon tingog nagahungaw kag maluya,
kag nagaugayong ako kaangay sang isa ka pating.
Ang akon mga mata kinapoy sa pagtangla sa langit.
O Ginoo, luwasa ako sa sini nga kabudlayan.
15Ano ang masiling ko? Ang Ginoo naghimo sini.
Naglain ang akon buot kag indi ako makatulog.
16O Ginoo, magakabuhi ako tungod sa imo tungod sa imo lamang,
ayuha ako, kag tugoti nga magkabuhi.
17Ang akon malain nga buot pagabuslan sing paghidait.
Ginluwas#38:17 Ang iban nga dumaan nga mga pagbadbadGinluwas; sa HebreoGinhigugma. mo ang akon kabuhi sa tanan nga mga katalagman,
ginpatawad mo ang tanan ko nga mga sala.
18Wala#Sir. 17:27; Bar. 2:17. sing isa sa kalibutan sang mga patay nga makadayaw sa imo,
ang patay indi makasalig sa imo pagkatutom.
19Ang mga buhi amo ang nagadayaw sa imo,
subong sang pagdayaw ko sa imo karon.
Ang mga ginikanan nagasugid sa ila mga kabataan nahanungod sang imo pagkatutom.
20O Ginoo, gin-ayo mo ako.
Magatukar kami sing mga arpa kag magakanta sa pagdayaw sa imo,
magakanta kami sing pagdayaw sa imo templo samtang nagakabuhi kami.
21Si Isaias nagsiling sa hari nga hampulan niya ang iya hubag sang panit sang higos, agod nga mag-ayo sia. 22Dayon si Haring Ezequias nagpamangkot, “Ano bala ang tanda sa pagpamatuod nga sarang na ako makakadto sa Templo?”
Currently Selected:
Isaias 38: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
