Isaias 35
35
Ang Dalan sang Pagkabalaan
1Ang desierto magakasadya,
kag ang mga bulak magapamukadkad sa kigas nga duta.
2Ang desierto magaamba kag magasinggit sa kalipay,
manginmatahom ini subong sang mga Kabukiran sang Libano
kag manginmapatubason subong sang mga kaumhan sang Carmel kag Saron.
Ang tagsatagsa makakita sang himaya sang Ginoo,
sang iya pagkahalangdon kag sang iya gahom.
3Pabaskuga#Heb. 12:12. ang mga kamot nga nagapalangluya,
kag ang mga tuhod nga nagakurog sa kaluyahon.
4Singgana ang tagsatagsa nga nagapakaluya,
“Magpakabakod kamo kag indi magkahadlok!
Ang Dios magaabot sa pagluwas sa inyo,
magaabot sia sa pagtimalos sa inyo mga kaaway.”
5Ang#Mat. 11:5; Luc. 7:22. bulag makakita,
kag ang bungol makabati.
6Ang lupog magatumbo kag magasaot,
kag ang apa magasinggit sa kalipay.
Ang mga tuboran sang tubig magailig sa desierto,
7ang mga nagakalayo nga balas mangin-isa ka linaw,
kag ang mamala nga duta mapuno sing mga tuboran.
Sa diin ang talunon nga mga ido nagaestar anay,
ang mga bagaas kag ang mga tabun-ak magatubo.
8May malapad nga dalan didto,
nga ginatawag “Ang Dalan sang Pagkabalaan.”
Wala sing makasasala nga makaagi sa sini nga dalan,
wala sing mga buangbuang nga makapatalang sang mga nagaagi didto.
9Wala sing mga leon didto,
wala sing mapintas nga mga sapat nga magaagi sa sini nga dalan.
Ang mga ginluwas sang Ginoo
magapauli paagi sa sini nga dalan.
10Magaabot sila sa Jerusalem nga nagakasadya,
nagakanta kag nagasinggit sa kalipay.
Nagakasadya sila sa walay katapusan,
kay nahilway na sila sa kasubo kag kalisod.
Currently Selected:
Isaias 35: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
