Isaias 34
34
Ang Dios Magasilot sang Iya mga Kaaway
1Dali kamo, mga tawo sang tanan nga mga kapungsoran! Tipon kamo kag magpamati. Ang bug-os nga duta, kag ang tanan nga nagaestar sa sini, magpalapit kag magpamati. 2Ang Ginoo naakig sa tanan nga mga kapungsoran kag sa ila mga hangaway. Ginhukman niya sila nga laglagon. 3Ang ila mga bangkay indi pag-ilubong, kundi magahamyang didto nga magakadunot kag magabaho, kag ang mga bukid magapula sang dugo. 4Ang#Mat. 24:29; Mar. 13:25; Luc. 21:26; Bug. 6:13-14. adlaw, bulan kag mga bituon magakaladugmok subong sang yab-ok. Ang langit madula kaangay sang tulon-an nga ginlukot, kag ang mga bituon magakalahulog kaangay sang mga dahon nga nagakadagas gikan sa balagon sang ubas ukon kahoy nga higera.
5Ang#Isa. 63:1-6; Jer. 49:7-22; Ezeq. 25:12-14; 35:1-5; Amos 1:11-12; Abd. 1-14; Mal. 1:2-5. Ginoo nag-aman sang iya espada sa langit, kag karon patup-an niya ang Edom, ang mga tawo nga iya ginhukman nga pagalaglagon. 6Ang iya espada mabulit sang ila mga dugo kag sapay, kaangay sang dugo kag sapay sang mga kordero kag mga kanding nga ginahalad. Ang Ginoo magadulot sining halad sa siudad sang Bozra, himuon niya ang madamo nga mga pagpamatay sa duta sang Edom. 7Ang mga tawo magakalapukan kaangay sang simaron nga mga baka kag torite nga mga baka, kag ang duta magasanaw sang dugo kag malatom sing sapay. 8Amo ini ang tion nga ang Ginoo magaluwas sang Sion kag magatimalos sa iya mga kaaway.
9Ang mga suba sang Edom mangin-aspalto, kag ang duta mangin-asupre. Ang bug-os nga duta magadabdab subong sang aspalto. 10Magadabdab#Bug. 14:11; 19:3. ini sa adlaw kag gab-i, kag ang aso magatub-ok gikan sini sa wala sing katapusan. Ang duta pagabayaan sa tanan nga panahon, kag wala na gid sing may magaagi sa sini liwat. 11Pero ang dapay kag ang porcupino nagapanag-iya sini, ang mga bukaw kag ang mga uwak amo ang magaestar diri. Ang Ginoo magahimo sini liwat nga wala sing kahusayan, subong sang wala pa ang pagtuga. 12Wala sing hari nga magagahom sang pungsod, kag wala na sing mga pangulo. 13Ang mga talungon kag mga sapinit magatubo sa tanan nga mga palasyo kag mga banwa nga nalibutan sing mga pader, kag ang talunon nga mga ido kag mga bukaw magaestar sa sini. 14Ang mga sapat nga talunon magatilipon didto kag ang mga demonyo magatawag sa isa kag isa. Ang daku nga mga sapat sa kagab-ihon#34:14 DAKU NGA MGA SAPAT SA KAGAB-IHON: Babayi nga mga demonyo nga ginapatihan nag-estar sa mamingaw nga mga lugar. magakadto didto nga nagapangita sing lugar nga mapahuwayan. 15Ang mga bukaw magahimo sang ila mga pugad, magaitlog, magabuto, kag magasagod sa ila didto. Ang mga dapay magatipon didto, nga nagaparisparis.
16Usisaa sa libro sang Ginoo kag basaha kon ano ang iya ginasiling. Wala sing isa sining mga tinuga nga madula, kag wala sing isa nga wala sing pares. Amo ini ang mando sang Ginoo, sia gid ang magatipon sa ila. 17Ang Ginoo amo ang magapartida sa ila sang duta kag magahatag sa tagsatagsa sang ila parti. Magaestar sila sa duta sa tanan nga mga panahon, kag mangin-ila ini sa tanan nila nga mga kaliwatan.
Currently Selected:
Isaias 34: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
