Isaias 30
30
Ang Wala Pulos nga Kasugtanan sa Ehipto
1Ang Ginoo naghambal: “Ang mga nagagahom sa Juda tapos gid, tungod kay nagsupak sila sa akon. Indi akon mga plano ang ila ginsunod, kag naghimo sila sing mga kasugtanan batok sa akon kabubot-on kag ini nagadugang sang ila mga sala. 2Nagdangop sila sa Ehipto sa pagpangayo sing bulig, nga wala magpamangkot sa akon. Luyag nila nga apinan sila sang Ehipto, gani nagsalig sila sa hari sang Ehipto. 3Pero ang hari wala sing gahom sa pagbulig sa ila, kag ang pag-apin sang Ehipto mangin-inyo kalaglagan. 4Bisan nga ang ila mga embahador nag-abot na sa mga siudad sang Zoan kag Hanes nga sakop sang Ehipto, 5ang mga tawo sang Juda magahinulsol nga nagdangop sila sa sinang indi masaligan nga pungsod, isa ka pungsod nga nagpaslaw sa ila sang nagapaabot sila sang bulig.”
6Amo ini ang ginasiling sang Dios nahanungod sang mga kasapatan sa nabagatnan nga desierto: “Ang mga embahador nagapanglakaton sa makatalagam nga pungsod, sa diin may mga leon, may dalitan nga mga man-og kag may nagalupad nga mga dragon. Ginakargahan nila ang ila mga asno kag mga kamelyo sang malahalon nga mga regalo para sa isa ka pungsod nga indi makahatag sa ila sing bulig. 7Ang bulig nga mahatag sang Ehipto wala sing pulos. Gani ginhayuan ko ang Ehipto sing, ‘Ang Dragon nga wala Nagapanghalit.’”
Ang Malinapason nga mga Tawo
8Ang Dios nagsiling sa akon nga isulat sa isa ka libro kon ano ini nga sahi sang mga tawo, agod nga manginsaksi ini batok sa ila sa tanan nga mga panahon. 9Nagapadayon sila sa pagsupak sa Dios, nagabinutig, kag indi magpamati sa mga ginatudlo sang Ginoo. 10Ginasingganan nila ang mga propeta nga maghipos. Nagasiling sila, “Indi kami pagtudloi kon ano ang matarong. Sugiri kami sang luyag namon pamatian. Pabay-i lang kami sang amon mga dalamguhanon. 11Halin kamo kag indi ninyo kami pagbalabagi sa amon dalanon. Indi kami luyag magpamati nahanungod sang inyo Balaan nga Dios sang Israel.”
12Pero amo ini ang ginasiling sang Balaan nga Dios sang Israel: “Wala kamo nagasapak sang akon ginasiling sa inyo kag nagasalig kamo sa palugos kag dinaya. 13Malaut kamo. Kaangay kamo sang mataas nga pader nga may litik halin sa ibabaw paidalom kag sa hinali mapukan kamo. 14Magakalabuka kamo kaangay sang kolon nga nadugmok kag wala gid sing daku nga bahin nga mabutangan sang baga, ukon masandok sang tubig sa bubon.”
15Ang Ginoo nga Gamhanan, ang balaan nga Dios sang Israel, nagasiling sa mga tawo, “Balik kamo kag magsalig sa akon nga may kalinong. Dayon manginmabakod kamo kag malig-on.” Pero indi kamo magpati. 16Sa baylo, nagaplano kamo sa pagpalagyo sa inyo mga kaaway paagi sa pagsakay sa madasig nga mga kabayo. Kag sigi palagyo kamo! Nagahunahuna kamo nga tama gid kadasig ang inyo mga kabayo, pero labing madasig pa ang mga nagalagas sa inyo! 17Ang 1,000 sa inyo magapalagyo kon makita ninyo ang isa ka bilog nga soldado, kag ang lima ka bilog nga kaaway tuman na nga kamo tanan magpalalagyo. Wala sing mabilin sang inyo mga hangaway luas sa isa ka tukon sang inyo bandera sa ibabaw sang bakulod. 18Pero ang Ginoo nagahulat sa pagpakita sang iya kaayo sa inyo. Handa sia sa pagkaluoy sa inyo, tungod kay ang iya ginahimo matarong. Malipayon ang tanan nga nagasalig sa Ginoo.
Ang Dios Magabendisyon sang Iya mga Tawo
19Kamo nga mga tawo nga nagaestar sa Jerusalem indi na maghibi liwat. Ang Ginoo maluloy-on, kag kon magpanawag kamo sa iya sa pagpangayo sing bulig, magasabat sia sa inyo. 20Paagihon kamo sang Ginoo sa mga kabudlayan, pero sia gid manginkaupod ninyo sa pagtudlo sa inyo kag indi na kamo kinahanglan magpangita sa iya. 21Kon magtalang kamo sa dalan sa inyo tuo ukon wala, mabatian ninyo ang iya tingog gikan sa inyo likod nga nagasiling, “Yari ang dalan, diri kamo agi.” 22Dalhon ninyo ang inyo mga diosdios nga nahaklapan sing pilak kag ang inyo mga diosdios nga nahaklapan sing bulawan, kag ihaboy sila kaangay sang basura kag magasinggit kamo, “Palayo kamo sa akon!” 23Kon magtanom kamo sang inyo mga binhi, ang Ginoo magapadala sa inyo sing ulan sa pagpatubo sini, kag magapatubas kamo sing madamo, kag ang inyo mga kahayupan may madamo nga halalbon. 24Ang mga baka kag ang mga asno nga ginaarado sa inyo mga uma magahalab sang labing maayo nga kumpay. 25Sa adlaw nga ang mga pamakod sang inyo mga kaaway maagaw kag ang ila mga tinawo magakalamatay, ang mga tuboran sang tubig magailig halin sa tagsa ka bukid kag tagsa ka bakulod. 26Ang bulan manginmasanag subong sang adlaw, kag ang adlaw magasanag sang pito ka pilo sang sa kinaandan, kaangay sang kasanag sang pito ka adlaw nga gintingob sa isa! Ini tanan mahanabo kon ang Ginoo magbugkos kag mag-ayo sang mga pilas nga iya ginhatag sa iya mga tawo.
Ang Dios Magasilot sang Asiria
27Ang gahom kag himaya sang Ginoo makita sa unhan. Ang kalayo kag aso nagapahayag sang iya kaakig. Sa iya paghambal, ang iya mga pulong nagadabdab subong sang kalayo. 28Nagapadala sia sing hangin sa una niya subong sang baha nga nagaanod sang tanan nga mga butang. Nagalaglag ini sang mga kapungsoran, kag nagatapos ini sang ila malain nga mga plano. 29Pero kamo nga mga tawo sang Dios magakalipay kag magakanta subong sang inyo ginahimo sa gab-i sang piesta nga balaan. Manginmalipayon kamo subong sang mga nagamartsa sa tunog sang plawta sa ila pagkadto sa Templo sang Ginoo, ang mangangapin sang Israel.
30Ipabati sang Ginoo sa tagsatagsa ang iya mahimayaon nga tingog kag ipahayag ang gahom sang iya kaakig. May mga dabdab sang kalayo, kag dinaguob, kag ulan nga yelo nga daw mga bato, kag madamol nga ulan. 31Ang mga taga-Asiria magakahadlok kon mabatian nila ang tingog sang Ginoo kag mabatyagan ang kabug-at sang iya pagsilot. 32Samtang ang Ginoo nagapadayon sa pagbunal sa ila, ang iya mga tawo nagatinukar sang ila mga bombo kag mga arpa. Ang Dios amo gid ang magapakig-away batok sa mga taga-Asiria. 33Sang una pa nga panahon may isa na ka lugar nga gin-aman sa diin ang daku nga kalayo magasunog sa hari sang Asiria. Madalom ini kag malapad, kag mataas ang tinumpukan sang mga kahoy. Ang Ginoo magabuga sing nagadabdab nga kalayo sa pagsunog sini.
Currently Selected:
Isaias 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
