Isaias 28
28
Isa ka Paandam sa Naaminhan nga Ginharian
1Ang ginharian sang Israel tapos gid! Ang iya himaya kaangay sang mga korona nga mga bulak nga nagakalaya sa ulo sang iya hubog nga mga pangulo. Ang ila bugalon nga mga ulo napangagwahan sing maayo, pero didto nagahamyang sila sa tama nga kahulogbon. 2Ang Ginoo may ginaaman nga isa ka tawo nga makusog kag gamhanan nga handa sa pagsalakay sa ila. Isa nga magaabot kaangay sang bagyo nga yelo nga daw bato, kaangay sang madamol nga ulan, kaangay sang nagasagana kag nagapanglambas nga baha, kag magalapaw sa duta. 3Ang bugal sadtong hubog nga mga pangulo pagatasakon. 4Ang nagaamat-amat kadula nga himaya sadtong bugalon nga mga pangulo magakawala kaangay sang nahauna nga mga bunga sang mga higos sa iya panahon, gin-ipo kag ginkaon dayon sa iya pagkaluto.
5Ang adlaw magaabot nga ang Ginoo sang mga hangaway manginkaangay sang isa ka mahimayaon nga korona sang mga bulak para sa iya mga tawo nga nagkalabilin nga buhi. 6Magahatag sia sing husto nga panghunahuna sa mga hukom, kag kaisog sa mga nagatabog sa mga kaaway nga nagasalakay sa mga pwerta sang siudad.
Si Isaias kag ang Hubog nga mga Propeta sang Juda
7Bisan ang mga propeta kag ang mga pari tama ka hubog kag nagadulingduling sila. Nag-inom sila sing madamo nga mga bino kag makahulobog nga ilimnon sa bagay nga nagakasandad sila sa ila pagsalasala. Ang mga propeta tama ka hubog nga indi makahangop sang mga palanan-awon nga ginapadala sang Dios, kag ang mga pari tama ka hubog sa pagpamat-od sang mga kaso nga ginadala sa ila. 8Ang mga lamisa sa diin sila nagalingkod puno sang mga suka, kag wala gid sing matinlo nga bahin nga nabilin.
9Nagareklamo sila nahanungod sa akon, “Sin-o bala ang ginatudloan sina nga tawo? Sin-o bala ang nagakinahanglan sang iya mensahe? Maayo lang ina sa mga lapsag nga bag-o lang malutas! 10Nagatinguha sia sa pagtudlo sa aton, letra por letra, linya por linya, leksyon por leksyon.”
11Kon#1 Cor. 14:21. indi kamo magpamati sa akon, ti, ang Dios magagamit sang mga dumoluong nga nagahambal sang iban nga mga linggwahe sa pagtudlo sa inyo sang leksyon. 12Nagahatag sia sing pahuway kag paglipay sa inyo tanan pero indi kamo magpamati sa iya. 13Amo ina nga ang Ginoo magatudlo sa inyo letra por letra, linya por linya, leksyon por leksyon. Dayon masandad kamo sa tagsa ninyo ka pagtikang. Mabali kamo, madakpan kag mabihag.
Isa ka Pamusod nga Bato para sa Sion
14Karon kamo nga bugalon nga mga tawo nga nagagahom sa mga pumoluyo diri sa Jerusalem, pamati kamo sa ginasiling sang Ginoo. 15Nagapabugal#Klm. Sol. 1:16; Sir. 14:12. kamo nga nakahimo kamo sing kasugtanan sa kamatayon, kag nagapakighisugot kamo sa kalibutan sang mga patay. Napat-od ninyo nga indi kamo maano kon mag-abot ang kalalat-an, tungod kay nagasalig kamo sa mga kabutigan kag pagdaya nga magaapin sa inyo. 16Karon,#Sal. 118:22-23; Rom. 9:33; 10:11; 1 Ped. 2:6. amo ini ang ginasiling sang Ginoo nga Gamhanan: “Nagapahamtang ako sang isa ka sadsaran sa Sion nga malig-on kag mabakod. Nagabutang ako sa sini sang malig-on nga pamusod nga bato nga nasulatan sini nga mga pulong, ‘Ang pagtuo nga malig-on mapainulobon.’ 17Ang pagkamatarong amo ang talaksan sini nga sadsaran, kag ang pagkamaminatud-on amo ang iya tunton.”
Ang bagyo nga yelo nga daw mga bato magasilhig sang tanan nga mga kabutigan nga inyo ginasaligan, kag ang baha magalaglag sang inyo palanaguan. 18Ang inyo kasugtanan sa kamatayon dulaon, kag ang ginkaisahan ninyo upod sa kalibutan sang mga patay indi na pagpadayunon. Kon ang kalaglagan mag-abot magahalaplay kamo. 19Magabatibati ini sa inyo adlaw-adlaw nga wala sing untat. Pagaantuson ninyo ini sa adlaw kag gab-i. Sa tagsa ka bag-o nga mensahe halin sa Dios magahatag sa inyo sang bag-o nga kakugmat! 20Manginkaangay kamo sang isa ka tawo sa hulobaton, nga nagahigda sa katre nga kabos, nga indi makauntay, nga may habol nga makitid nga indi niya mapangalumbot. 21Ang#2 Sam. 5:20; 1 Cron. 14:11; Jos. 10:10-12. Ginoo magapakig-away subong sang iya ginhimo sa Bukid sang Perasim kag sa kapatagan sang Gabaon, agod matuman niya ang iya ginaplano nga himuon, bisan nga daw makatilingala ini, sa pagtapos sang iya misteryoso nga hilikuton.
22Indi ninyo pagkadlawi ang ginapaandam ko sa inyo! Kon magkadlaw kamo, mabudlayan kamo sa pagpalagyo. Nabatian ko ang pamat-od sang Ginoong Dios sang mga hangaway sa paglaglag sang bug-os nga pungsod.
Ang Kaalam sang Dios
23Pamatii kag talupangda ang akon ginasiling sa inyo. 24Wala sing mangungoma nga nagapadayon sa pag-arado sang iya mga uma kag nagaaman sini para tamnan. 25Sa tapos maaman niya ang duta, ginatamnan niya sang mga binhi nga inugpanakot subong sang sibuyas kag luy-a. Nagatanom sia sang trigo kag sebada sa inidas, kag sa higad sang iya mga uma ginatamnan niya sang iban nga mga binhi. 26Kahibalo sia magpahito sang iya obra, tungod kay ang Dios nagtudlo sa iya. 27Wala sia nagagamit sing dalagku nga inugsuk-ad sa pagsipi sang sibuyas kag sa pagkali sang luy-a, sa baylo nagagamit sia sang nagakabagay nga inugsuk-ad. 28Wala niya ginapierde ang uyas sang trigo paagi sa padayon nga paglinas sini. Kahibalo sia maggamit sang karo sa paglinas sang trigo nga indi maano ang uyas. 29Ini tanan nga kaalam naghalin sa Ginoo sang mga hangaway. Ang mga plano nga ginahimo sang Dios maayo gid, kag magamadinalag-on ini sa gihapon.
Currently Selected:
Isaias 28: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
