Isaias 16
16
Wala sing Paglaom ang Kahimtangan sang Moab
1Halin sa siudad sang Sela sa desierto, ang mga tawo sang Moab nagapadala sing isa ka kordero subong nga dulot sa nagagahom sa Jerusalem. 2Nagahulat sila sa mga pangpang sang Suba sang Arnon, kag nagapakadto pakari subong sang mga pispis nga gintabog halin sa ila mga pugad.
3Nagasiling sila sa mga tawo sang Juda, “Tudloi kami kon ano ang amon himuon. Apini kami kaangay sang isa ka kahoy nga nagahatag sing handong sa init sang udtong adlaw, kag papahuwaya kami sa inyo handong. Nagpalagyo kami, tagoa kami sa lugar nga wala sing may makakita sa amon. 4Paestara kami sa inyo duta. Apini kami sa luyag maglaglag sa amon.”
Ang pagpigos kag ang kalaglagan magauntat, kag ang nagalaglag sang pungsod mawala. 5Dayon ang isa sang mga kaliwat ni David manginhari, kag magagahom sia sa mga tawo nga may katutom kag paghigugma. Maabtik sia sa paghimo sing matarong kag tinguhaon niya nga ang hustisya matuman.
6Ang mga tawo sang Juda nagasiling, “Nabatian namon kon daw ano ka bugalon ang mga tawo sang Moab. Nahibaluan namon nga hambog sila kag matinaastaason, pero ang ila pagpabugal wala sing pulos.”
7Ang mga tawo sang Moab magahibi tungod sang mga kabudlayan nga ila ginaantos. Tanan sila magahibi kon ila madumdoman ang manamit nga pagkaon nga ila ginkaon sa siudad sang Kir-heres. Magapangalisod sila. 8Ang mga ulomhan malapit sa Hesbon kag ang mga talamnan sang ubas sa Sibma nalaglag, yadtong mga talamnan sang ubas nga ang iya bino nagpahubog anay sang mga pangulo sang mga kapungsoran. Sang una ang mga talamnan sang ubas naglambot tubtob sa siudad sang Jazer, pakadto sa desierto sa sidlangan kag sa nakatundan tubtob sa pihak nga bahin sang Patay nga Dagat. 9Karon nagahibi ako tungod sang mga talamnan sang ubas sang Sibma subong sang akon paghibi para sa Jazer. Ang akon mga luha nagatulo tungod sa Hesbon kag Eleale, tungod kay wala sing ani agod magkasadya ang mga tawo. 10Wala sing isa nga malipayon karon sa duta nga maayo kag mapatubason. Wala sing isa nga nagasinggit ukon nagakanta sa mga talamnan sang ubas. Wala sing isa nga nagalinas sang ubas agod himuon nga bino, ang sininggit sang kalipay natapos na.#16:10 Ang isa ka dumaan nga pagbadbadang sininggit sang kalipay natapos na; sa Hebreogintapos ko ang sininggit sang kalipay. 11Nagapanghayhay ako tungod sa kasubo para sa Moab kag sa kasakit tungod sa Kir-heres. 12Ang mga tawo sang Moab ginakapuyan sing balikbalik sa ila mga altar sa bukid kag sa ila mga templo sa pagpangamuyo, pero indi gid ini makabulig sa ila.
13Amo ini ang mensahe nga ginhatag anay sang Ginoo nahanungod sa Moab. 14Kag karon ang Ginoo nagasiling, “Sa sulod sang tatlo ka tuig, ang madamo nga manggad sang Moab madula. Nahanungod sa iya madamo nga mga tawo, pila lamang ka bilog ang mabilin nga buhi, kag manginmaluya sila.”
Currently Selected:
Isaias 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
