Mga Hebreo 4
4
1Karon, ang Dios nagsaad sa aton nga makasulod kita sa iya lugar nga palahuwayan. Gani maghalong kita, agod nga wala sing isa sa inyo nga masapwan nga indi makasulod sa sinang lugar nga palahuwayan. 2Kay kita nakabati sang Maayong Balita, subong man sa ila. Nabatian nila ang mensahe, pero wala nila ini mapusli, tungod kay sang pagkabati nila sini wala nila ini ginbaton nga may pagtuo. 3Gani#Sal. 95:11. kita nga nagatuo magasulod gid sa lugar nga palahuwayan nga ginsaad sang Dios, subong sang iya ginsiling:
“Naakig ako kag nagpanumpa:
‘Indi gid sila makasulod sa akon lugar nga palahuwayan!’”
Ginsiling ini sang Dios bisan nga natapos na ang iya bulohaton halin sang pagtuga niya sang kalibutan. 4Kay#Gen. 2:2. ginsiling ini sa iban nga bahin sang mga Kasulatan nahanungod sang ikapito nga adlaw: “Ang Dios nagpahuway sa tanan niya nga mga bulohaton sa ikapito nga adlaw.” 5Amo#Sal. 95:11. man gihapon ini nga butang ang ginahambalan: “Indi gid sila makasulod sa akon lugar nga palahuwayan.” 6Yadtong una nga mga nakabati sang Maayong Balita wala makasulod sa sinang lugar nga palahuwayan tungod kay wala sila magtuo, gani may iban nga ginpahanugotan sa pag-agom sini. 7Ginapamatud-an#Sal. 95:7-8 (LXX). ini sang pagtalana sang Dios sang isa pa ka adlaw nga ginatawag “Karon nga Adlaw.” Ginhambal niya ini sang makaligad ang madamo nga mga tinuig paagi kay David, suno sa kasulatan nga ginsambit na:
“Kon inyo mabatian ang tingog sang Dios karon nga adlaw,
indi ninyo pagpatig-aha ang inyo mga tagipusoon.”
8Kay#Deut. 31:7; Jos. 22:4. kon si Josue nakahatag sa mga tawo sing kapahuwayan nga ginsaad sang Dios, wala na kuntani maghambal ang Dios sang ulihi nahanungod sang isa pa ka adlaw sang pagpahuway. 9Kon amo, may nabilin pa nga kapahuwayan para sa mga tawo sang Dios subong sang pagpahuway sang Dios sa ikapito nga adlaw. 10Kay#Gen. 2:2. ang bisan sin-o nga nagasulod sa lugar nga palahuwayan magapahuway gikan sa iya kaugalingon nga mga hilikuton, subong nga ang Dios nagpahuway gikan sa iya mga hilikuton. 11Gani tinguhaon gid naton nga makasulod kita sa lugar nga palahuwayan, agod wala sang bisan sin-o sa aton nga mapaslawan subong sa ila nga mga malalison.
12Kay ang pulong sang Dios buhi kag gamhanan, kag mas matalom pa sang sa espada nga duha sing sulab. Nagadulot ini tubtob sa gin-utlan sang kalag kag espiritu, kag sa ginakitaan sang mga lutalutahan kag utok sa tul-an. Ini nagatungkad sang mga panghunahuna kag mga handom sang tagipusoon sang mga tawo. 13Wala#Klm. Sol. 1:6. gid sing bisan ano nga sarang matago sa Dios. Ang tanan nga mga butang hayag kag bukas sa iya panulok, kag sa iya kita tanan magahatag sing husay nahanungod sang aton kaugalingon.
Si Jesus ang Bantog kag Pinakamataas nga Pari
14Gani magmalig-on kita sa aton ginatuad nga pagtuo. Kay kita may bantog kag Pinakamataas nga Pari nga amo si Jesus, ang Anak sang Dios nga nagsulod sa kalangitan. 15Ang aton Pinakamataas nga Pari nagabatyag man sang aton mga kaluyahon, kay sia man ginsulay sa tanan nga bagay kaangay sa aton, pero wala sia magpakasala. 16Gani indi kita magpang-alang-alang sa pagpalapit sa trono sang Dios, sa diin yara ang gugma. Didto magabaton kita sing kaluoy kag kaayo nga makabulig sa aton sa tion nga ginakinahanglan naton ini.
Currently Selected:
Mga Hebreo 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
