Mga Hebreo 3
3
Si Jesus Labaw pa kay Moises
1Mga kautoran ko nga Cristohanon nga gintawag man sang Dios! Dumdoma ninyo si Jesus nga ginpadala sang Dios nga mangin-Pinakamataas nga Pari sa kaangtanan sang aton ginasiling nga aton ginatuohan. 2Matutom#Num. 12:7. sia sa Dios, nga nagpili sa iya sa paghimo sini nga hilikuton, subong nga si Moises matutom man sa iya hilikuton sa bug-os nga#3:2 bug-os nga: Ang iban nga mga manuskrito wala ini nga pulong. katawhan sang Dios. 3Ang tawo nga nagatukod sang balay ginapasidunggan sing labi pa sang sa balay mismo. Sa amo man nga bagay, si Jesus takos sang labi pa nga kadungganan sang sa kay Moises. 4Matuod gid nga ang tagsa ka balay may nagpatindog nga tawo—kag ang Dios amo ang naghimo sang tanan nga mga butang. 5Si Moises matutom nga alagad sa bug-os nga katawhan sang Dios, kag naghambal sia sang mga butang nga inugsiling sang Dios sa palaabuton. 6Pero si Cristo matutom nga Anak nga gintugyanan sang mga katawhan sang Dios. Kita amo ang iya mga katawhan, kon magpadayon kita nga may kaisog kag pagsalig sa aton ginalauman.
Ang Pahuway para sa mga Tawo sang Dios
7Gani,#Sal. 95:7-11 (LXX). subong nga nagasiling ang Espiritu Santo:
“Kon inyo mabatian ang tingog sang Dios karon nga adlaw,
8indi ninyo pagpatig-aha ang inyo mga tagipusoon subong sang inyo mga katigulangan sang ila pagbato sa Dios,
subong sadtong adlaw sang ila sia gintilawan didto sa desierto.
9Didto ginsulay kag gintilawan nila ako siling sang Dios,
bisan nakita na nila ang binuhatan ko sa sulod sang kwarenta ka tuig.
10Tungod sini, naakig ako sa sadtong mga tawo, kag nagsiling ako,
‘Malinapason sila sa gihapon,
kag indi gid sila magtuman sang akon mga sugo.’
11Naakig ako kag nagpanumpa:
‘Indi gid sila makasulod sa akon lugar nga palahuwayan!’”
12Mga kautoran, mag-andam kamo nga wala sing isa sa inyo nga may malaut kag indi matinuohon nga tagipusoon sa bagay nga magapahilayo sia sa Dios nga buhi. 13Sa baylo, maglinaygayay kamo adlaw-adlaw, samtang ang ginatawag sa kasulatan nga “Karon nga Adlaw” napatuhoy sa aton, agod nga wala sing isa sa inyo nga mapatalang sang sala kag manginmatig-a sing tagipusoon. 14Kay kita tanan nagapakig-ambit upod kay Cristo, kon ginahuptan ta sing malig-on tubtob sa katapusan ang pagsalig nga nangin-aton sa ginsugoran.
15Amo#Sal. 95:7-8 (LXX). ini ang ginasiling sang kasulatan:
“Kon inyo mabatian ang tingog sang Dios karon nga adlaw,
indi ninyo pagpatig-aha ang inyo mga tagipusoon subong sang pagpatig-a sang inyo mga katigulangan
sang ila pagbato sa Dios.”
16Sin-o#Num. 14:1-35. bala ang mga tawo nga nakabati sang tingog sang Dios kag nagbato sa iya? Sila tanan nga ginpangulohan ni Moises sa paggwa sa Ehipto. 17Sin-o bala ang naakigan sang Dios sa sulod sang kwarenta ka tuig? Ang mga tawo nga nagpakasala kag nagkalamatay didto sa desierto. 18Sang nagpanumpa ang Dios nga nagasiling, “Indi sila makasulod sa akon lugar nga palahuwayan”—sin-o bala ang iya ginatumod? Ang mga tawo nga nagbato sa iya. 19Gani aton nakita nga wala sila makasulod sa lugar sang palahuwayan tungod kay wala sila magtuo.
Currently Selected:
Mga Hebreo 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
