Habakuk 3
3
Ang Pangamuyo ni Habakuk
1Amo ini ang pangamuyo ni Habakuk nga propeta:
2O Ginoo, nakabati ako sang imo ginhimo
kag napun-an ako sing paghangad.
Karon himua liwat sa amon panahon
ang dalagku nga mga binuhatan nga imo anay ginpanghimo.
Magmaluloy-on ka, bisan sa imo kaakig.
3Ang Dios magaabot liwat halin sa duta sang Edom,
ang balaan nga Dios magaabot halin sa mga kabakuloran sang Paran.
Ang iya pagkahalangdon nagapuno sang mga kalangitan
ang duta puno sang pagdayaw sa iya.
4Nagaabot sia nga may kasilaw sang kilat,
ang kapawa nagaidlab sa iya kamot,
dira natago ang iya gahom.
5Nagapadala sia sing pamalatian sa una niya,
kag nagamando sia sa kamatayon sa pagsunod sa iya.
6Kon magdulog sia, ang duta nagatay-og,
sa iya pagpasiplat ang mga pungsod nagakurog.
Ang walay katubtoban nga mga kabukiran narumpag,
ang nagapadayon nga mga kabakuloran nagsalop,
ang mga kabakuloran nga iya ginlaktan sang una nga panahon.
7Nakita ko nga nahadlok ang mga tawo sang Cusan,
kag ang mga tawo sang Midian nagakurog.
8O Ginoo, mga suba bala ang nagpaakig sa imo?
Dagat bala ang nagpabalingaso sa imo?
Nagsakay ka sa mga panganod,
ang gal-om sang bagyo amo ang imo mga karwahi,
sang naghatag ikaw sing pagdaog sa imo mga tawo.
9Naghanda ka sa paggamit sang imo pana,
handa sa pagbuhi sang imo mga baslay.
Ang imo kilat nagapihak sang duta.
10Sang makita ikaw sang mga kabukiran nagkulurog sila,
ang tubig naula halin sa langit.
Ang tubig sa idalom sang duta nagadaguhob,
kag ang ila balod nagtaas.
11Sa kirab sang imo nagahagunos nga mga baslay
kag sa kasilaw sang imo nagaidlab nga bangkaw
ang adlaw kag bulan nagdulog.
12Sa imo kaakig ginlatas mo ang duta,
sa imo kasingkal ginlinas mo ang mga pungsod.
13Naggwa ka sa pagluwas sang imo mga tawo,
sa pagluwas sang imo pinili nga hari.
Ginlampusan mo ang pangulo sang mga malaut
kag ginpapas sing bug-os ang iya mga sumolunod.
14Ang imo mga baslay nag-igo sang pangulo sang iya mga hangaway
sang mag-abot ini kaangay sang bagyo sa pagpalapta sa amon,
nga nagakalipay sa paghalunhon kaangay sang nagapigos sa tago sang mga imol.
15Ginpatasak mo ang dagat sa imo mga kabayo,
kag ang malapad nga tubig nagbukal.
16Nabatian ko ini tanan, kag nagakurog ako,
ang akon mga bibig nagakurog sa kahadlok.
Ang akon lawas nakuhaan sing kusog,
kag ang akon mga tiil nagakasandad.
Magahipos ako sa paghulat sang pag-abot sang tion
kon ang Dios magsilot sang nagasalakay sa amon.
17Bisan ang higera wala sing bunga
kag wala sing bunga ang ubas,
bisan ang olivo indi magpamunga
kag ang uma wala sing trigo nga patubas,
bisan ang tanan nga mga karnero mapatay
kag wala sing sulod ang mga toril,
18magahugyaw ako kag magakalipay
tungod kay ang Dios akon manluluwas.
19Ang#2 Sam. 22:34; Sal. 18:33. Ginoo nga Gamhanan nagahatag sa akon sing kusog.
Ginapalig-on niya ang akon tiil kaangay sang isa ka usa,
kag ginabantayan niya ako nga indi maano sa mga kabukiran.
Currently Selected:
Habakuk 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
