Ezequiel 7
7
Malapit na ang Katapusan para sa Israel
1Ang Ginoo naghambal sa akon. 2Nagsiling sia, “Tawo nga mamalatyon, ako, ang Ginoo nga Gamhanan nagasiling sa duta sang Israel: Amo na ini ang katapusan sang bug-os nga duta!
3“Israel, ang katapusan nag-abot na. Matilawan mo ang akon kaakig, kay hukman ko ikaw tungod sang imo ginhimo. Pabayaron ko ikaw tungod sang mga kangil-aran nga imo ginhimo. 4Indi ako magpatawad ukon magkaluoy sa imo. Silutan ko ikaw tungod sang mga kangil-aran nga imo ginhimo, agod makilala mo nga ako amo ang Ginoo.”
5Amo ini ang ginasiling sang Ginoo nga Gamhanan: “Magadinasundason lang ang mga kalalat-an nga magaabot sa imo. 6Tapos na. Amo na ini ang katapusan. Tapos na ikaw. 7Amo na ini ang katapusan ninyo nga nagaestar sa duta. Malapit na ang tion nga wala na sing mga pagsaulog sa mga altar sa kabukiran, kundi kinagubot lamang.
8“Karon sa indi madugay matilawan ninyo ang akon nagabalingaso nga kaakig. Ginahukman ko kamo tungod sang inyo ginhimo. Pabayaron ko kamo tungod sang tanan nga kangil-aran nga inyo ginhimo. 9Indi ako magpatawad sa inyo ukon magkaluoy sa inyo. Silutan ko kamo tungod sang mga kangil-aran nga inyo ginhimo, agod makilala ninyo nga ako amo ang Ginoo, kag ako ang nagasilot sa inyo.”
10Ang adlaw sang kalalat-an yari na. Ang kinagamo nagadamo. Ang bugal nagapangibabaw. 11Ang kinagamo nagapatubas sang madamo pa nga kalautan. Wala gid sang may mabilin sa ila, sang ila manggad, sang ila pagkahalangdon ukon sang ila kadungganan.
12Ang tion nag-abot na. Ang adlaw malapit na nga wala sing pulos ang pagbakal kag ang pagbaligya, tungod kay ang kaakig sang Ginoo magatupa nga wala sing may ginapili sa tagsatagsa. 13Tubtob mapatay ang isa ka negosyante indi gid sia makabawi sang iya pierde tungod kay ang kaakig sang Ginoo yara sa tagsatagsa. Ang mga malaut indi mabuhi. 14Ginapatunog nila ang trumpeta, kag ang tanan nagahanda. Pero wala sing isa nga nagakadto sa inaway, kay ang kaakig sang Ginoo magatupa sa tagsatagsa, nga wala sang may pinilian.
Ang Silot tungod sang mga Sala sang Israel
15May inaway sa mga kalsada, kag pamalatian kag gutom sa mga pamalay. Ang bisan sin-o nga yara sa uma mapatay sa inaway, kag ang bisan sin-o nga yara sa siudad mapatay sa balatian kag gutom. 16Ang iban magapalagyo sa mga kabukiran kaangay sang nakibot nga mga pating gikan sa kabakuloran pero magapanghayhay sila tungod sang ila mga sala. 17Ang mga kamot sang tagsatagsa magapalamuypoy, kag ang ila mga tuhod magakulurog. 18Magabayu sila sing sako, kag ang bug-os nila nga lawas magakulurog. Ang ila mga ulo pagakiskisan, kag sila tanan mahuy-an. 19Ihaboy nila ang ila mga bulawan kag pilak sa mga kalsada kaangay sang basura, tungod kay wala sing pilak ukon bulawan nga makaluwas sa ila kon iula sang Ginoo ang iya kaakig sa ila. Indi nila ini magamit sa pagbusog sang ila mga handom ukon sa pagpuno sang ila mga tiyan. Ang bulawan kag pilak amo ang nagdala sa ila sa pagpakasala. 20Sang una nagpabugal sila sang ila matahom nga mga alahas, pero gingamit nila ini sa paghimo sang ila makangilil-ad nga mga diosdios. Gani ginhimo sang Ginoo nga kangil-aran nila ang ila mga manggad.
21Ang Ginoo nagasiling, “Ipaagaw ko ang ila mga pagkabutang sa mga dumoluong kag ang mga malaut nga mga tawo magakuha sang tanan nila nga manggad kag magadagta sini. 22Pabay-an ko lang kon ang akon ginapakamahal nga Templo ginahigkuan, kon sudlon ini sang mga makawat kag dagtaan.
23“Bisan diin may kinagamo. Bisan diin sa bug-os nga pungsod may pinatyanay, kag ang mga siudad puno sing kinagamo. 24Dalhon ko diri ang labing malaut nga mga pungsod kag ipaagaw ko sa ila ang inyo mga balay. Ang inyo gamhanan nga mga tawo madulaan sing kaisog, kon tugotan ko ang mga pungsod sa pagdagta sang mga lugar nga inyo ginasimbahan. 25Magaabot ang mga kalisdanan. Magapangita kamo sing kalinong pero indi ninyo ini makita. 26Magadinasundason ang mga kalalat-an kag magaalagisod lang ang malain nga mga balita. Magapakitluoy kamo sa mga propeta nga sugiran nila kamo sang ila nakita nga magakahanabo. Ang mga pari wala sing sarang matudlo sa mga tawo, kag ang mga katigulangan wala sing sarang malaygay. 27Ang hari magapangalisod, ang prinsipe madulaan sing paglaom, kag ang mga tawo magakurog sa kahadlok. Silutan ko kamo tungod sang tanan nga inyo ginhimo, kag hukman ko kamo subong sang inyo paghukom sa iban. Ini magapakilala sa inyo nga ako amo ang Ginoo.”
Currently Selected:
Ezequiel 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
