Ezequiel 6
6
Ginpakamalaut sang Ginoo ang Pagsimba sa mga Diosdios
1Ang Ginoo nagsiling sa akon, 2“Tawo nga mamalatyon, tan-awa ang mga bukid sang Israel kag ihatag sa ila ang akon mensahe. 3Singgana ang mga kabukiran sang Israel sa pagpamati sa pulong sang Ginoo nga Gamhanan—sa pagpamati sa ginasiling ko, ang Ginoo nga Gamhanan, sa mga kabukiran, sa mga kabakuloran, sa mga iligan sang tubig, kag sa mga kapatagan: ako magapadala sing espada sa paglaglag sang mga lugar sa diin ang mga tawo nagasimba sa mga diosdios. 4Ang mga altar pagagub-on kag ang mga ginasunogan sang insyenso pagabuk-on. Ang tanan nga mga tawo didto pagapatyon sa atubangan sang ila mga diosdios. 5Pagalaptahon ko ang mga bangkay sang mga tawo sang Israel, pagalaptahon ko ang ila mga tul-an sa palibot sang mga altar. 6Ang tanan nga mga siudad sang Israel pagagub-on, agod ang tanan nila nga mga altar kag mga diosdios pagadugmokon, ang ila mga altar nga ginasunogan sang insyenso pagabuk-on, kag ang tanan nila nga ginhimo mawala. 7Ang mga tawo pamatyon bisan diin, kag ang mga nabilin nga buhi magakilala nga ako amo ang Ginoo.
8“Tugotan ko nga ang iban makapalagyo gikan sa pagpamatay kag magaalaplaag sa mga kapungsoran, 9sa diin magaestar sila subong mga bihag. Didto magadumdom sila sa akon, kag mahibal-an nila nga ako nagsilot sa ila kag nagpakahuya sa ila#6:9 Ang iban nga dumaan nga mga pagbadbadnagpakahuya sa ila; sa Hebreonahuy-an ako. tungod kay ang ila di-matinuohon nga mga tagipusoon nagsikway sa akon, kag ginpasulabi nila ang mga diosdios sang sa akon. Kag pagabasulon nila ang ila kaugalingon tungod sang malaut kag makahuloya nga mga butang nga ila ginhimo. 10Magakilala sila nga ako amo ang Ginoo, kag ang akon mga paandam indi mga pamahog lamang.”
11Ang Ginoo nga Gamhanan nagsiling, “Lubaga ang imo mga kamot! Ipudagpudag ang imo mga tiil! Panalambiton ka sa kasubo tungod sang tanan nga mga kalautan kag mga kangil-aran nga ginhimo sang mga Israelinhon. Magakalamatay sila sa inaway, sa gutom, kag sa balatian. 12Ang yadto sa malayo magamalasakit kag magakalamatay. Ang yari sa malapit magakalamatay sa inaway. Ang mabilin nga buhi magakalamatay sa gutom. Mabatyagan nila ang gahom sang akon kaakig. 13Ang mga bangkay magalalapta upod sa mga diosdios sa palibot sang mga altar, sa tagsa ka mataas nga bakulod, sa ibabaw sang tagsa ka bukid, sa idalom sang tagsa ka madabong nga kahoy, sa tagsa ka daku nga kahoy nga terebinto, kag sa tagsa ka lugar sa diin nagasunog sila sing mga halad sa ila mga diosdios. Dayon ang tagsatagsa magakilala nga ako amo ang Ginoo. 14Lambuton ko gid sila kag laglagon ang ila pungsod. Ang ila duta manginlamgod halin sa nabagatnan nga desierto tubtob sa siudad sang Ribla sa aminhan. Wala sing lugar nga ginaestaran sang mga Israelinhon nga indi malakip sini. Dayon ang tagsatagsa magakilala nga ako amo ang Ginoo.”
Currently Selected:
Ezequiel 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
