Ezequiel 41
41
1Dason, gindala ako sang tawo sa kwarto nga yara sa tunga nga amo ang Balaan nga Duog. Gintakos niya ang alagyan pakadto diri kag napulo ka tapak ang kataason sini, 2kag desi-otso ka tapak ang kasangkaron, nga may mga dingding nga walo ka tapak ang kadamulon sa pihak kag pihak. Gintakos niya ang kwarto, kag sesentay otso ka tapak ang kalabaon sini, kag trayntay kwatro ka tapak ang kasangkaron.
3Dayon nagkadto sia sa labing nasulod nga kwarto. Gintakos niya ang alagyan pakadto diri kag tatlo ka tapak ang kataason sini, kag napulo ka tapak ang kasangkaron, nga may mga dingding nga dose ka tapak ang kadamulon sa pihak kag pihak. 4Gintakos niya ang kwarto kag trayntay kwatro ka tapak ini nga kwadrado. Ini nga kwarto nagasunod sa kwarto nga yara sa tunga. Dayon nagsiling sia sa akon, “Amo ini ang Labing Balaan nga Duog.”
Ang mga Kwarto nga Naangot sa mga Pader sang Templo
5Gintakos sang tawo ang kadamulon sang nasulod nga pader sang Templo kag napulo ini ka tapak. Sa sini nga pader, sa bug-os nga palibot sang Templo, may nagaidas nga magamay nga mga kwarto nga ang kasangkaron pito ka tapak. 6Ini nga mga kwarto yara sa tatlo ka panalgan, kag ang tagsa ka panalgan may traynta ka mga kwarto. Ang nagwa nga pader sang Templo mas manipis sang sa tagsa ka panalgan nga yara sa idalom sa bagay nga ang mga kwarto makatungtong sa pader sa baylo nga itapik sa sini. 7Gani ang mga pader sang Templo kon tan-awon sa gwa daw pareho lang ang kadamulon halin sa idalom pakadto sa ibabaw. Sa nagwa nga pader sang Templo, sa gwa sang mga kwarto may duha ka malapad nga mga hagdanan nga nagatapik, sa bagay nga sarang masaka halin sa naidalom nga panalgan pakadto sa natunga kag sa naibabaw nga panalgan. 8-11Ang nagwa nga pader sang sini nga mga kwarto walo ka tapak ang kadamulon. May isa ka pwerta pakadto sa mga kwarto sa aminhan nga bahin sang Templo kag may isa ka kwarto pakadto sa nabagatnan nga bahin. Nakita ko nga may balkon sa bug-os nga palibot sang Templo. Walo ka tapak ang kasangkaron sini kag napulo ka tapak ang kataason kag nagatupong ini sa sadsaran sang mga kwarto sa kilid sang mga pader sang Templo. Sa gintung-an sang balkon kag sang mga balay nga ginapuy-an sang mga pari may bakante nga lugar nga trayntay kwatro ka tapak ang kasangkaron sa bug-os nga palibot sang Templo.
Ang Balay sa Nakatundan
12May isa ka balay nga nagaatubang sa Templo sa nakatundan. Ang iya kasangkaron 116 ka tapak kag ang iya kalabaon 150. Ang iya mga pader siyam ka tapak ang kadamulon sa bug-os nga palibot.
Ang Takos sang Bug-os nga Templo
13Gintakos sang tawo ang nagwa nga bahin sang Templo. Ang kalabaon sini 168 ka tapak. Halin sa likod sang Templo, pakadto sa bakante nga lugar tubtob sa punta nga bahin sang balay sa nakatundan, ang kalayuon 168 man ka tapak. 14Ang kasangkaron sa atubangan sang Templo pakadto sa pihak lakip ang bakante nga lugar sa pihak kag pihak, 168 man ka tapak. 15Gintakos niya ang kalabaon sang balay pakadto sa nakatundan lakip ang iya mga dingding sa tagsa ka kilid kag 168 man ini ka tapak.
Ang iban nga mga Bahin sang Templo
Ang entrada nga kwarto sang Templo, ang Balaan nga Duog, kag ang Labing Balaan nga Duog, 16nahaklapan sing tapi halin sa salog pakadto sa mga bintana. Ini nga mga bintana sarang matabunan. 17Ang mga dingding sa sulod sang Templo halin sa salog tubtob sa ibabaw sang mga pwertahan nahil-ob sing mga dibuho 18nga mga palma kag mga kerubin. Ang dibuho nga palma kag mga kerubin nagabal-utbal-ot sa bug-os nga palibot sang kwarto. Ang tagsa ka kerubin may duha ka guya: 19ang isa ka guya nga iya sang tawo nagaatubang sa palma sa pihak nga kilid, kag ang isa ka guya nga iya sang leon nagaatubang sa kahoy sa pihak nga kilid. Ini tanan palareho sa bug-os nga palibot sang dingding, 20halin sa salog tubtob sa ibabaw sang mga pwertahan. 21Ang mga bakalan sang Balaan nga Duog kwadrado.
Ang Altar nga Kahoy
Sa atubangan sang alagyan sang Labing Balaan nga Duog, may isa ka butang nga kon tan-awon daw 22altar nga kahoy. Ang kataason sini lima ka tapak kag ang kasangkaron apat ka tapak. Ang mga haligi sa pamusod, ang iya sadsaran,#41:22 Ang iban nga dumaan nga mga pagbadbadsadsaran; sa Hebreokalabaon. kag ang iya mga kilid nahimo tanan sa kahoy. Ang tawo nagsiling sa akon, “Amo ini ang lamisa nga nagatindog sa presensya sang Ginoo.”
Ang mga Pwertahan
23May isa ka pwertahan sa punta sang alagyan pakadto sa Balaan nga Duog kag subong man sa punta sang alagyan pakadto sa Labing Balaan nga Duog. 24Ang mga pwertahan nga may doble nga mga sira daw abaniko nga nagaabri sa tunga. 25May mga palma kag mga kerubin nga nadibuho sa mga pwertahan sang Balaan nga Duog, pareho sang sa mga dingding. Kag may tabon nga kahoy nga nahaklap sa nagwa nga bahin sang alagyan sang entrada nga kwarto. 26Sa mga kilid sini nga kwarto may mga bintana, kag ang mga dingding may dibuho nga mga palma.
Currently Selected:
Ezequiel 41: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
