Ezequiel 40
40
ANG PALANAN-AWON NAHANUNGOD SANG PALAABUTON NGA TEMPLO
(40:1–48:35)
Si Ezequiel Gindala sa Jerusalem
1Ika-10 nga adlaw sadto sang bag-o nga tuig nga amo man ang ika-25 nga tuig sa tapos kami mabihag kag ika-14 nga tuig sa tapos ang Jerusalem maagaw. Sa amo gid nga adlaw nabatyagan ko ang gamhanan nga presensya sang Ginoo kag gindala niya ako. 2Sa#Bug. 21:10. palanan-awon gindala ako sang Dios sa duta sang Israel kag ginpahamtang niya ako sa isa ka mataas nga bukid. Nakita ko sa akon atubang#40:2 Ang isa ka dumaan nga pagbadbadsa akon atubang; sa Hebreosa bagatnan. ang madamo nga mga balay nga daw isa ka siudad. 3Gindala#Bug. 11:1; 21:15. niya ako palapit, kag nakita ko ang isa ka tawo nga nagaidlak kaangay sang bronsi. Nagauyat sia sang inugtakos nga lubid nga nahimo sa lino kag isa ka inugtakos nga lipak, kag nagatindog sia sa tupad sang pwerta.
4Nagsiling sia sa akon, “Tawo nga mamalatyon, magbantay ka. Pamatii sing maayo, kag talupangda sing maayo ang tagsa ka butang nga ipakita ko sa imo, kay tungod sini gindala ikaw diri. Isugid mo sa mga tawo sang Israel ang tanan nga imo makita.”
Ang Nasidlangan nga Pwerta
5Ang#1 Hari 6:1-38; 2 Cron. 3:1-9. nakita ko amo ang isa ka Templo, kag may pader ini sa palibot. Ang tawo nagkuha sang iya inugtakos nga lipak nga ang iya kalabaon napulo ka tapak, kag gintakos niya ang pader. Ang iya kataason napulo ka tapak kag ang iya kadamulon napulo man ka tapak. 6Dayon nagkadto sia sa pwertahan nga nagaatubang sa sidlangan. Nagsaka sia sa hagdan, kag halin sa ibabaw gintakos niya ang alagyan, kag napulo ini ka tapak sang kataason. 7Madason sini, may alagyan nga sa magtimbang nga kilid may tagtatlo ka kwarto nga gwardyahan. Ang tagsa ka kwarto kwadrado, napulo ka tapak ang tagsa ka kilid, kag ang mga pader sa ulot nila walo ka tapak ang kadamulon. Madason sa mga kwarto nga gwardyahan may isa ka alagyan nga napulo ka tapak ang kalabaon nga nagapadulong sa entrada nga kwarto nga nagaatubang sa Templo. 8-9Gintakos niya ini nga kwarto, kag nasapwan niya nga katorse ka tapak ang kadalumon sini. Amo ini ang punta nga alagyan malapit sa Templo, kag sa punta gid sini ang mga pader mga apat ka tapak ang kadamulon. 10Ining mga kwarto nga gwardyahan sa magtimbang nga kilid sang alagyan palareho ang kadakuon, kag ang mga pader sa ulot nila palareho man ang kadamulon.
11Dason, gintakos sang tawo ang kasangkaron sang alagyan pakadto sa pwerta, kag ang kasangkaron sini tanan baynte dos ka tapak, kag ang lugar sang bukas nga pwerta desi-sais ka tapak. 12Sa atubangan sang tagsa ka kwarto nga gwardyahan may manubo nga pader nga baynte ka pulgada ang iya kataason kag baynte ka pulgada ang iya kadamulon. Ang mga kwarto napulo ka tapak nga kwadrado. 13Dayon gintakos niya ang kalayuon sang pader sa likod#40:13 pader sa likod: Sa Hebreoatop. sang isa ka kwarto pakadto sa pader sa likod sang isa ka kwarto sa tabok sang alagyan, kag kwarentay dos ka tapak ang kalayuon sini. 14Ang kwarto sa punta nagapadulong sa pasiyuhan. Gintakos niya ini, kag trayntay kwatro ka tapak ang kasangkaron sini. 15Ang bug-os nga kalabaon sang alagyan halin sa nagwa nga pader sang pwerta pakadto sa punta sang katapusan nga kwarto otsentay kwatro ka tapak. 16May magamay nga mga bintana sa nagwa nga mga pader sang tanan nga mga kwarto kag subong man sa nasulod nga mga pader sa ulot sang mga kwarto. May dibuho nga mga palma nga natigib sa nasulod nga mga pader nga nagaatubang sa alagyan.
Ang Nagwa nga Pasiyuhan
17Gindala ako sang tawo pakadto sa pwerta nga nagapadulong sa pasiyuhan. May traynta ka mga kwarto nga nagatapik sa nagwa nga pader, kag sa atubangan nila sini ginhimuan sang dalan nga bato, 18nga nagalambot sa palibot sang pasiyuhan. Ang nagwa nga pasiyuhan manubo sang sa nasulod nga pasiyuhan.
19May isa ka pwerta sa naibabaw nga pasiyuhan pakadto sa nasulod nga pasiyuhan. Gintakos sang tawo ang antad sang duha ka pwerta kag 168 ini ka tapak.
Ang Naaminhan nga Pwerta
20Dayon gintakos sang tawo ang pwerta sa naaminhan nga bahin nga nagapadulong sa nagwa nga pasiyuhan. 21Ang tatlo ka mga kwarto nga gwardyahan sa magtimbang nga bahin sang alagyan, ang mga pader sa ulot nila, kag ang entrada nga kwarto pareho ang takos nila sang didto sa nasidlangan nga pwerta. Ang bug-os nga kalabaon sang alagyan otsentay kwatro ka tapak kag ang kasangkaron kwarentay dos ka tapak. 22Ang entrada nga kwarto, ang mga bintana, kag ang gindibuho nga mga palma kaangay sang didto sa nasidlangan nga pwerta. May pito ini ka mga halintang pasaka sa pwerta nga alagyan, kag ang entrada nga kwarto yara sa punta nga nagaatubang sa pasiyuhan. 23Sa pihak sang pasiyuhan halin sa naaminhan nga pwerta may isa ka pwerta padulong sa nasulod nga pasiyuhan, subong sang sa nasidlangan nga bahin. Gintakos sang tawo ang antad sing duha ka pwerta kag 168 ini ka tapak.
Ang Nabagatnan nga Pwerta
24Dason, gindala ako sang tawo sa nabagatnan nga bahin, kag didto nakita namon ang isa pa gid ka pwerta. Gintakos niya ang nasulod nga mga pader sini kag ang entrada nga kwarto kag pareho man ini sang sa iban nga mga pwerta. 25May mga bintana sa mga kwarto sini nga pwerta, subong sang sa iban nga mga pwerta. Ang bug-os nga kalabaon sang pwerta otsentay kwatro ka tapak, kag ang kasangkaron kwarentay dos ka tapak. 26May pito ka mga halintang ini pasaka kag ang iya entrada nga kwarto yara man sa punta nga nagaatubang sa pasiyuhan. May dibuho nga mga palma nga natigib sa nasulod nga mga pader nga nagaatubang sa alagyan. 27May alagyan man diri nga nagapadulong sa nasulod nga pasiyuhan. Gintakos sang tawo ang kalayuon pakadto sa ikaduha nga alagyan kag 168 ini ka tapak.
Ang Nasulod nga Pasiyuhan: Ang Nabagatnan nga Pwerta
28Gindala ako sang tawo sa nabagatnan nga alagyan pakadto sa nasulod nga pasiyuhan. Gintakos niya ang alagyan, kag pareho man ini kadako sang iban nga mga alagyan sa nagwa nga pader. 29-30Ang mga kwarto nga gwardyahan, ang entrada nga kwarto, kag ang nasulod nga mga pader pareho man sang sa iban nga mga pwerta. May mga bintana man sa mga kwarto sini nga alagyan. Ang bug-os nga kalabaon sini otsentay kwatro ka tapak, kag ang kasangkaron sini kwarentay dos ka tapak. 31Ang entrada nga kwarto sini nagaatubang sa nagwa nga pasiyuhan. May mga palma nga gindibuho sa mga pader sa alagyan. May walo ka mga halintang pasaka sa sini nga pwerta.
Ang Nasulod nga Pasiyuhan: Ang Nasidlangan nga Pwerta
32Gindala ako sang tawo sa nasidlangan nga alagyan pakadto sa nasulod nga pasiyuhan. Gintakos niya ang alagyan kag pareho man ini kadako sang iban nga mga alagyan. 33Ang mga kwarto nga gwardyahan, ang entrada nga kwarto, kag ang nasulod nga mga pader pareho man ang takos sang sa iban nga mga pwerta. May mga bintana sa palibot, kag subong man sa entrada nga kwarto. Ang bug-os nga kalabaon sini otsentay kwatro ka tapak, kag ang kasangkaron sini kwarentay dos ka tapak. 34Ang entrada nga kwarto nagaatubang sa nagwa nga pasiyuhan. May mga palma nga gindibuho sa mga pader sa alagyan. May walo man ka mga halintang pasaka sa sini nga pwerta.
Ang Nasulod nga Pasiyuhan: Ang Naaminhan nga Pwerta
35Dayon gindala ako sang tawo sa naaminhan nga alagyan. Gintakos niya ini kag pareho man ini sang sa iban nga mga alagyan. 36Pareho sang iban, may mga kwarto man ini nga gwardyahan, may mga dibuho sa nasulod nga mga pader, may isa ka entrada nga kwarto, kag may mga bintana sa bug-os nga palibot. Ang bug-os nga kalabaon sini otsentay kwatro ka tapak, kag ang iya kasangkaron sini kwarentay dos ka tapak. 37Ang entrada nga kwarto#40:37 Ang iban nga dumaan nga mga pagbadbadentrada nga kwarto; sa Hebreonasulod nga pader. nagaatubang sa nagwa nga pasiyuhan. May mga palma nga gindibuho sa mga pader sa alagyan. May walo man ka mga halintang pasaka sa sini nga pwerta.
Ang mga Balay nga Malapit sa Naaminhan nga Pwerta
38Sa nagwa nga pasiyuhan may isa ka kwarto nga gindugang kag nagaangot sa nasulod nga alagyan sa naaminhan nga kilid, nga nagaabri pakadto sa entrada nga kwarto nga nagaatubang sa pasiyuhan. Diri nila ginahugasan ang ginpatay nga mga sapat nga pagasunogon sing bug-os subong mga halad. 39Sa sining entrada nga kwarto may apat ka mga lamisa, duha sa tagsa ka kilid sang kwarto. Sa sini nga mga lamisa ginaihaw nila ang mga sapat nga pagaidulot subong mga halad nga pagasunogon sing bug-os, ukon mga halad tungod sa sala ukon paglapas. 40Sa gwa sang kwarto may apat man ka mga lamisa, duha sa tagsa ka kilid sang entrada sang naaminhan nga pwerta. 41Gani may apat ka mga lamisa sa sulod sang kwarto kag apat man sa gwa, kag walo tanan ang mga lamisa nga ginaihawan sang mga sapat nga pagaihalad. 42Ang apat ka mga lamisa sa diin ginahanda ang mga halad nga pagasunogon sing bug-os, binasbasan nga bato. Ang ila kataason baynte ka pulgada kag ang ila kalaparon traynta ka pulgada kwadrado. Ang tanan nga gamit nga ginagamit sa pag-ihaw sang mga sapat nga ginahalad nabutang sa sini nga mga lamisa. 43May mga molding nga tatlo ka pulgada ang kalaparon sa palibot sang mga lamisa. Ang tanan nga karne nga pagaihalad ginbutang sa mga lamisa.
44Dayon gindala niya ako sa nasulod nga pasiyuhan. May duha ka mga kwarto sa nasulod nga pasiyuhan, ang isa nagaatubang sa nabagatnan sa kilid sang naaminhan nga pwerta nga alagyan kag ang isa nagaatubang sa naaminhan sa kilid sang nabagatnan nga pwerta nga alagyan. 45Ginsugiran ako sang tawo nga ang kwarto nga nagaatubang sa bagatnan para sa mga pari nga nagaalagad sa Templo, 46kag ang kwarto nga nagaatubang sa aminhan para sa mga pari nga nagaalagad sa altar. Ang tanan nga mga pari mga kaliwat ni Sadoc. Sila lamang ang mga katapo sang tribo ni Levi nga ginatugotan sa pagsulod sa presensya sang Ginoo sa pag-alagad sa iya.
Ang Nasulod nga Pasiyuhan kag ang Templo
47Gintakos sang tawo ang nasulod nga pasiyuhan, kag 168 ka tapak ini nga kwadrado. Ang Templo yara sa nakatundan nga bahin kag sa atubangan sini may altar. 48Dayon gindala niya ako sa kwarto nga alagyan pakadto sa sulod sang Templo. Gintakos niya ang kwarto nga alagyan kag siyam ka tapak ang kalabaon sini kag baynte kwatro ka tapak ang kasangkaron nga may mga dingding nga lima ka tapak ang kadamulon sa pihak kag pihak. 49Ang mga halintang pasaka sa entrada nga kwarto trayntay kwatro ka tapak ang kasangkaron kag baynte ka tapak#40:49 Ang isa ka dumaan nga pagbadbadbaynte ka tapak; sa Hebreodesi-otso ka tapak. ang kataason. May duha ka mga haligi sa pihak kag pihak sang alagyan.
Currently Selected:
Ezequiel 40: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
