Ezequiel 38
38
Ang Gog subong nga Galamiton sang Dios
1Ang Ginoo naghambal sa akon, 2“Tawo#Bug. 20:8. nga mamalatyon, karon pakamalauta ang Gog, sa duta sang Magog. Sia amo ang pangulo nga manuggahom sang mga kapungsoran sang Mesec kag Tubal. Pakamalauta sia, 3kag singgana sia nga ako, ang Ginoo nga Gamhanan, amo ang iya kaaway. 4Palisuon ko sia, kag butangan ko sing mga kaw-it ang iya mga sag-ang, kag guyoron ko sia kag ang tanan niya nga mga kaaway palayo. Tama kadamo ang iya mga hangaway, upod ang iya mga kabayo kag ang mga nagasakay nga nagauniporme, kag ang tagsa ka soldado may taming kag espada. 5Ang mga tawo sang Persia, Etiopia, kag Libya kaupod niya, kag tanan sila may mga taming kag mga helmet. 6Ang tanan nga mga hangaway sang kadutaan sang Gomer kag sang Bet-togarma sa malayo nga aminhan kaupod niya, kag subong man ang mga tawo sang madamo nga mga kapungsoran. 7Singgana sia nga maghanda kag ang iya bug-os nga mga hangaway sa idalom sang iya gahom. 8Sa tapos sang madamo nga mga tinuig magaabot ang tion nga manduan ko sia sa pagsalakay sang isa ka pungsod sa diin ang mga tawo nagbalik sing tingob halin sa madamo nga mga kapungsoran kag nag-estar sila nga wala sing kahadlok sa inaway. Salakayon niya ang mga kabukiran sang Israel, nga nanginmamingaw kag wala sing pumoluyo sa malawig nga tion, pero karon ang tanan nga mga tawo nagaestar sing malinong. 9Sia kag ang iya mga hangaway kag ang madamo nga mga kapungsoran kaupod niya magasalakay kaangay sang bagyo kag magalikop sang bug-os nga duta kaangay sang panganod.”
10Amo ini ang ginasiling sang Ginoo nga Gamhanan sa Gog: “Kon mag-abot ina nga tion, magasugod ikaw sa paghunahuna sang malaut nga plano. 11Magapamat-od ka sa paggubat sang isa ka pungsod nga wala sing depensa sa diin ang mga tawo nagaestar nga may kalinong kag kahilwayan sa mga banwa nga wala sing pader. 12Gin-agawan mo sing mga pagkabutang ang mga tawo nga nagaestar sa mga siudad nga sang una nalaglag. Ini sila gintipon halin sa mga kapungsoran, kag karon may mga kasapatan na sila kag mga pagkabutang kag nagaestar sa sentro sang kalibutan. 13Ang mga tawo sang Seba kag Dedan kag ang mga negosyante sang mga banwa sang España magapamangkot sa imo, ‘Gintipon mo bala ang imo mga hangaway sa pagsalakay agod sa pag-agaw sang mga pagkabutang? Ginatuyo mo bala ang pagkuha sang pilak kag bulawan, mga kahayupan kag mga pagkabutang, kag magpauli nga may madamo nga mga inagaw?’”
14Gani ang Ginoo nga Gamhanan nagpadala sa akon sa pagsiling sa Gog sang luyag niya isiling sa iya: “Karon, samtang ang akon mga tawo nga Israelinhon nagaestar sing malinong, magalakat ka,#38:14 Ang isa ka dumaan nga pagbadbadmagalakat ka; sa Hebreomakahibalo ka. 15halin sa imo lugar sa malayo nga aminhan. Magaabot ka nga nagapangulo sang isa ka daku kag gamhanan nga mga hangaway halin sa madamo nga mga kapungsoran, tanan sila nagasakay sa kabayo. 16Salakayon mo ang akon mga tawo nga Israelinhon kaangay sang bagyo nga nagalaslas sa duta. Kon mag-abot ina nga tion, ipadala ko ikaw sa paggubat sang akon duta sa pagpakita sa mga pungsod kon sin-o ako, sa pagpakita sang akon pagkabalaan nga akon pagahimuon paagi sa imo. 17Ikaw ang akon buot silingon halin pa sang una sang paghambal ko paagi sa akon mga alagad, nga mga propeta sang Israel, nga sa ulihi nga mga inadlaw paabuton ko ang isa nga magasalakay sang Israel.” Ang Ginoo nga Gamhanan amo ang naghambal sini.
Ang Silot sang Dios sa Gog
18Ang Ginoo nga Gamhanan nagasiling, “Sa adlaw nga ang Gog magagubat sa Israel, magabalingaso ako sa kaakig. 19Nagasumpa ako sa akon nagabalingaso nga kaakig nga sa sina nga adlaw magalinog sing mabaskog sa duta sang Israel. 20Ang tagsa ka isda kag pispis, ang tagsa ka sapat dalagku kag magamay, kag ang tagsa ka tawo sa bug-os nga duta magakurog sa kahadlok tungod sa akon. Ang mga kabukiran mapukan, ang mga pil-as matiphag, kag ang tagsatagsa ka pader matumba. 21Pakugmaton ko ang Gog sang tanan nga mga kahalitan. Ako, ang Ginoo nga Gamhanan, amo ang naghambal sini. Ang iya mga tinawo magapatyanay paagi sa espada. 22Silutan ko sia sing mga pamalatian kag pinatyanay. Padalhan ko sia, ang iya mga hangaway, kag ang madamo nga mga pungsod nga nagaapin sa iya sing madamol nga ulan, mga yelo nga daw bato, kalayo, kag mga asupre. 23Sa sini nga paagi ipakita ko sa tanan nga mga kapungsoran ang akon pagkagamhanan kag pagkabalaan. Dayon makilala nila nga ako amo ang Ginoo.”
Currently Selected:
Ezequiel 38: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
