Ezequiel 34
34
Ang mga Manugbantay sang Israel
1Ang Ginoo naghambal sa akon, 2“Tawo nga mamalatyon, pakamalauta ang mga pangulo sang Israel. Magtagna ka sa ila kag singgana sila nga ako, ang Ginoo nga Gamhanan nagasiling: Tapos gid kamo, kamo nga mga manugbantay sang Israel! Ginatatap ninyo ang inyo kaugalingon, pero wala gid ninyo ginatatapa ang mga karnero. 3Nagainom kamo sang ila gatas, ang inyo mga bayu halin sa ila mga bulbol, nagaihaw kag nagakaon kamo sang pinatambok nga karnero, pero wala gid ninyo ginatatapa ang mga karnero. 4Wala ninyo pagtatapa ang mga maluya, wala ninyo ginbulong ang mga nagamasakit, wala ninyo ginbugkosi ang mga nabali, wala ninyo pagpabalika ang mga nagtalang, ukon ginpangita ang mga nadula. Sa baylo, ginpintasan ninyo sila. 5Tungod#Num. 27:17; 1 Hari 22:17; Mat. 9:36; Mar. 6:34. kay ang mga karnero wala sing manugbantay, nag-alaplaag sila, kag ang mapintas nga mga sapat nagpatay kag nagkaon sa ila. 6Gani ang akon mga karnero nagtalangtalang sa mataas nga mga kabakuloran kag mga kabukiran. Nag-alaplaag sila sa bug-os nga duta, kag wala sing may nagpangita sa ila.
7“Gani, kamo nga mga manugbantay, magpamati kamo sa akon ginasiling, ako, ang Ginoo. 8Samtang ako amo ang Dios nga buhi, kinahanglan magpamati kamo sa akon. Ang akon mga karnero ginsalakay sang mapintas nga mga sapat nga nagpamatay kag nagkaon sa ila, tungod kay wala sila sing manugbantay. Ang akon mga manugbantay wala magpangita sang akon mga karnero. Wala nila gintatap ang akon mga karnero kundi ang ila lamang kaugalingon. 9Gani, kamo nga mga manugbantay, magpamati sa akon. 10Ako, ang Ginoo nga Gamhanan, amo ang inyo kaaway. Bawion ko ang akon mga karnero sa inyo, kag indi na gid kamo liwat mangin-ila mga manugbantay kag indi na gid ako magtugot nga ang inyo lamang kaugalingon ang inyo pagatatapon. Luwason ko ang akon mga karnero sa inyo, kag indi ko na sila pag-ipakaon sa inyo.
Ang Maayo nga Manugbantay sang Karnero
11“Ako, ang Ginoo nga Gamhanan, nagasiling sa inyo nga ako gid ang magausisa kag magatatap sang akon mga karnero 12subong sang pagtatap sang manugbantay sang iya mga karnero nga nag-alaplaag kag gintipon liwat. Pabalikon ko sila halin sa tanan nga mga lugar sa diin sila nag-alaplaag sa sadtong madulom kag makatalagam nga adlaw. 13Kuhaon ko sila sa iban nga mga kapungsoran, tipunon ko sila sing tingob, kag pabalikon ko sila sa ila kaugalingon nga duta. Pahalbon ko sila sa mga kabukiran sang Israel, sa tupad sang mga sapa, kag sa tagsa ka lugar sa diin ang mga tawo nagaestar. 14Pahalbon ko sila nga wala sing katalagman sa mga kabukiran nga madamol ang hilamon kag sa mga kapatagan kag sa tanan nga lugar nga madamol ang halalbon sa duta sang Israel. 15Ako gid ang magabantay sang akon mga karnero, kag pangitaan ko sila sing lugar nga palahuwayan. Ako, ang Ginoo nga Gamhanan, amo ang naghambal sini.
16“Pangitaon ko ang mga nagkaladula, pabalikon ko ang mga nagtalang, bugkosan ko ang mga may bali, ayuhon ko ang mga nagamasakit, kag laglagon ko ang mga matambok kag mga mabakod, tungod kay ako amo ang manugbantay nga nagahimo sing matarong.
17“Gani karon, akon panong, ako, ang Ginoo nga Gamhanan, nagasiling sa inyo nga hukman ko ang tagsatagsa sa inyo, kag painon ko ang maayo sa malain, ang mga karnero sa mga kanding. 18Ang iban sa inyo indi pa ayawan sa paghalab sang maayo nga halalban, kundi ginatasak pa ang wala ninyo mahalab! Ginainom ninyo ang matin-aw nga tubig, kag ginapalubog ang wala ninyo mainom! 19Ang iban ko nga mga karnero nagahalab na lang sang halalban nga inyo ginatasak kag nagainom sang tubig nga inyo ginpalubog.
20“Gani karon, ako, ang Ginoo nga Gamhanan, nagasiling sa inyo, nga ako magahukom sa tunga ninyo, kamo nga matambok kag maniwang nga mga karnero. 21Ginadis-og ninyo pa higad ang mga maluya kag ginadusdos ninyo sila palayo sa panong. 22Pero luwason ko ang akon mga karnero, kag indi ko na pagtugotan nga pintasan sila liwat. Hukman ko ang kada-isa sang akon mga karnero kag painon ko ang maayo sa malain. 23Hatagan ko sila sang hari nga kaangay sang akon alagad nga si David nga mangin-ila isa ka manugbantay, kag sia magatatap sa ila. 24Ako, ang Ginoo, mangin-ila Dios, kag ang hari nga kaangay sang akon alagad nga si David mangin-ila pangulo. Ako amo ang naghambal sini. 25Magahimo ako sing kasugtanan sa ila nga magahatag sa ila sing kasigurohan. Kuhaon ko ang mapintas nga mga sapat sa duta, agod ang akon mga karnero wala sing katalagman sa ila pag-estar sa latagon kag sa ila pagtulog sa mga kagulangan.
26“Bendisyunan ko sila kag akon sila paestaron sa palibot sang akon balaan nga bukid.#34:26 BALAAN NGA BUKID: Tan-awa ang 20:40. Hatagan ko sila sing ulan sa nagakaigo nga panahon nga magadala sa ila sing kaayuhan. 27Ang mga kahoy magapamunga, ang mga uma magapatubas, kag ang kada-isa magakabuhi nga may kalinong sa iya kaugalingon nga duta. Kon hilwayon ko ang akon mga tawo sa mga nag-ulipon sa ila, kag bugrason ko ang ila mga kadena, dayon makilala nila nga ako amo ang Ginoo. 28Indi na sila pagkuhaan sang mga pagkabutang sang mga kapungsoran, kag ang mapintas nga mga sapat indi na magpamatay kag magkaon sa ila. Magakabuhi sila nga may kalinong kag wala na sing may magapahadlok sa ila. 29Hatagan ko sila sing mapatubason nga kaumhan kag dulaon ko ang gutom sa duta. Ang iban nga mga kapungsoran indi na magyaguta sa ila. 30Ang tagsatagsa makahibalo nga ginaapinan ko ang Israel kag sila akon mga tawo. Ako, ang Ginoo nga Gamhanan, amo ang naghambal sini.
31“Kamo, akon mga karnero, ang panong nga akon ginapahalab, akon mga tawo, kag ako amo ang inyo Dios,” siling sang Ginoo nga Gamhanan.
Currently Selected:
Ezequiel 34: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
