Ezequiel 30
30
Ang Ginoo Magasilot sang Ehipto
1Ang Ginoo naghambal sa akon liwat, 2“Tawo nga mamalatyon, magtagna ka kag isugid ang akon ginasiling, ako, ang Ginoo nga Gamhanan. Pagaisinggit nimo ini nga mga pulong:
Magaabot ang makakulogmat nga adlaw!
3Madali na lang ang adlaw, ang adlaw nga ang Ginoo magahukom,
isa ka adlaw nga magal-om kag magamo para sa mga kapungsoran.
4May gira sa Ehipto
kag may daku nga pag-antos sa Etiopia.
Madamo ang magakalamatay sa Ehipto.
Ang pungsod pagakuhaan sang mga pagkabutang
kag bayaan nga nalaglag.
5“Sa sini nga gira magakalamatay man ang mga soldado nga ginsuholan halin sa Etiopia, Libya, Lidya, Arabia, Kub, kag bisan pa halin sa akon kaugalingon nga mga tawo.”
6Ang Ginoo nagasiling, “Halin sa Migdol sa aminhan pakadto sa Syene sa bagatnan, ang tanan nga nagaapin sa Ehipto magakalamatay sa inaway. Ang bugalon nga mga hangaway sang Ehipto malaglag. Ako, ang Ginoo nga Gamhanan, amo ang naghambal sini. 7Ini nga duta manginlabing mamingaw sa kalibutan, kag ang iya mga siudad malaglag sing bug-os. 8Kon sunogon ko ang Ehipto kag ang tanan nga mga nagaapin sa iya magakalamatay, dayon makilala nila nga ako, amo ang Ginoo.
9“Kon mag-abot ina nga adlaw, kag ang Ehipto malaglag, magapadala ako sing mga mensahero nga nagasakay sa mga sakayan sa pagpaandam sang nagapabuyanbuyan nga Etiopia, kag magakahadlok sila. Ina nga adlaw magaabot!”
10Ang Ginoo nga Gamhanan nagasiling, “Gamiton ko si Haring Nabucodonosor sang Babilonia sa pagkuha sang manggad sang Ehipto. 11Sia kag ang iya mapintas nga mga hangaway magaabot sa paglaglag sang duta. Salakayon nila ang Ehipto paagi sa mga espada, kag bisan diin lang sa duta may mga patay. 12Pamalahon ko ang Suba sang Nilo, kag ihatag ang Ehipto sa gahom sang malaut nga mga tawo. Ang mga dumoluong magalaglag sang bug-os nga duta. Ako, ang Ginoo, amo ang naghambal sini.”
13Ang Ginoo nga Gamhanan nagasiling, “Laglagon ko ang mga diosdios kag ang di-matuod nga mga dios sa Memfis. Wala sing isa nga magagahom sa Ehipto, kag pahadlukon ko ang tanan nga mga tawo. 14Himuon ko nga ang nabagatnan nga bahin sang Ehipto mamingaw, kag sunogon ko ang siudad sang Zoan sa aminhan. Silutan ko ang kapital nga siudad sang Tebes. 15Patilawon ko ang siudad sang Pelusyum, ang daku nga pamakod sang Ehipto, sang akon nagabalingaso nga kaakig. Laglagon ko ang manggad sang Tebes. 16Sunogon ko ang Ehipto, kag ang Pelusyum magaantos. Ang mga pader sang Tebes marumpag, kag ang siudad magabaha. 17Ang pamatan-on nga mga lalaki sang mga siudad sang Heliopolis kag Bubastis magkalamatay sa inaway, kag ang iban nga mga tawo pagabihagon. 18Magadulom sa Tapanes kon gub-on ko ang gahom sang Ehipto, kag laglagon ko ang kusog nga ila ginapabugal. Ang gal-om magalikop sa Ehipto kag ang mga tawo sa tanan nga mga siudad didto pagabihagon. 19Kon silutan ko ang Ehipto sa sini nga paagi, makilala nila nga ako amo ang Ginoo.”
Ang Nadula nga Gahom sang Hari sang Ehipto
20Sa ikapito nga adlaw sang nahauna nga bulan sang ika-11 nga tuig nga kami ginbihag, ang Ginoo naghambal sa akon, 21“Tawo nga mamalatyon, ginbali ko ang butkon sang hari sang Ehipto. Wala sing isa nga nagbugkos ukon naglakilaki sini agod mag-ayo kag magbakod liwat sa pag-uyat sang espada. 22Gani karon, amo ini ang akon ginasiling, ako, ang Ginoo nga Gamhanan: Ako ang kaaway sang hari sang Ehipto. Balion ko ang duha niya ka mga butkon, ang maayo kag ang bali na nga daan, kag ang espada mahulog gikan sa iya kamot. 23Paalaplaagon ko ang mga Ehiptohanon sa bug-os nga kalibutan. 24Dayon pabakuron ko ang mga butkon sang hari sang Babilonia kag ibutang ko ang akon espada sa iya mga kamot. Pero balion ko ang mga butkon sang hari sang Ehipto, kag magaugayong sia kag mapatay sa atubang sang iya kaaway. 25Paluyahon ko sia, kag pabakuron ang hari sang Babilonia. Kon ihatag ko sa iya ang akon espada kag ipuntariya niya ini sa Ehipto, ang tanan magakilala nga ako, amo ang Ginoo. 26Paalaplaagon ko ang mga Ehiptohanon sa bug-os nga kalibutan. Dayon magakilala sila nga ako, amo ang Ginoo.”
Currently Selected:
Ezequiel 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
