Ezequiel 29
29
Ang Tagna batok sa Ehipto
1Sa#Isa. 19:1-25; Jer. 46:2-26. ika-12 nga adlaw sang ika-10 nga bulan sang ika-10 nga tuig sang kami ginbihag, ang Ginoo naghambal sa akon, 2“Tawo nga mamalatyon, pakamalauta ang hari sang Ehipto. Sugiri sia nga pagasilutan sia kag ang bug-os nga duta sang Ehipto. 3Singgana sia nga amo ini ang ginasiling sang Ginoo nga Gamhanan sa hari sang Ehipto: Ako ang imo kaaway, ikaw nga daku nga buaya nga nagahukmong sa suba. Nagasiling ka nga ang Nilo imo, kag ikaw ang nagtuga sini.#29:3 Ang iban nga dumaan nga mga pagbadbadikaw ang nagtuga sini; sa Hebreoikaw ang nagtuga sang imo kaugalingon. 4Kaw-itan ko sing taga ang imo sag-ang kag patapikon ko sa imo ang mga isda sa imo suba. Dayon batakon ko ikaw gikan sa Nilo upod sa mga isda nga nagatapik sa imo. 5Ihaboy ko ikaw sa desierto lakip yadtong tanan nga mga isda sa suba. Matupa ikaw sa duta kag wala sing may magalubong sa imo. Ihatag ko ang imo lawas nga kalan-on sang mga pispis kag mga kasapatan. 6Dayon#Isa. 36:6. ang tanan nga pumoluyo sang Ehipto magakilala nga ako amo ang Ginoo.”
Ang Ginoo nagasiling, “Ang mga Israelinhon nagsalig sang bulig ninyo nga mga Ehiptohanon, pero ang inyo bulig pareho lang sang isa ka maluya nga tabun-ak. 7Sang pagsandig nila sa imo, nabali ka, napilas ang ila mga ilok kag naglubag ang ila mga likod.#29:7 Ang isa ka dumaan nga pagbadbadnaglubag ang ila mga likod; sa Hebreonagpatindog sang ila mga likod. 8Gani karon, ako, ang Ginoo nga Gamhanan nagasiling sa imo nga ipasalakay ko ikaw sa mga tawo paagi sa mga espada, kag pamatyon nila ang imo mga pumoluyo kag mga kasapatan. 9Ang Ehipto mangin-isa ka desierto kag dayon makilala mo nga ako amo ang Ginoo.
“Tungod kay nagsiling ikaw nga ang Nilo imo kag ikaw ang naghimo sini, 10ako ang imo kaaway kag kaaway man sang imo Nilo. Himuon ko nga desierto ang bug-os nga Ehipto halin sa siudad sang Migdol sa aminhan tubtob sa siudad sang Syene sa bagatnan, kag tubtob sa dulonan sang Etiopia. 11Wala sing tawo ukon sapat nga makaagi sa sini. Sa sulod sang kwarenta ka tuig wala sing may magaestar didto. 12Himuon ko ang Ehipto nga labing mamingaw nga pungsod sa bug-os nga kalibutan. Sa sulod sang kwarenta ka tuig ang mga siudad sang Ehipto magapabilin nga guba labaw pa sang sa iban nga mga siudad. Ipabihag ko ang mga Ehiptohanon. Magapalagyo sila sa tagsa ka pungsod, kag magaestar sila upod sa iban nga mga katawhan.”
13Ang Ginoo nga Gamhanan nagasiling, “Sa tapos ang kwarenta ka tuig tipunon ko ang mga Ehiptohanon halin sa mga kapungsoran sa diin ginpaalaplaag ko sila, 14kag akon sila paestaron sa nabagatnan nga bahin sang Ehipto, ang ila nahauna nga puloy-an. Didto manginmaluya sila nga ginharian, 15ang pinakamaluya sa tanan nga mga ginharian, kag indi na gid sila maggahom sa iban nga mga kapungsoran. Himuon ko sila nga kubos nga pungsod agod indi na sila makagahom sa iban nga mga pungsod. 16Ang Israel indi na gid magsalig liwat sang ila bulig. Ang dinangatan sang Ehipto magapahanumdom sa Israel sang ila sayop sa pagsalig sa bulig sang Ehipto. Dayon ang Israel magakilala nga ako, amo ang Ginoo nga Gamhanan.”
Si Haring Nabucodonosor Magalutos sang Ehipto
17Sa nahauna nga adlaw sang nahauna nga bulan sang ika-27 ka tuig sang kami ginbihag, ang Ginoo naghambal sa akon, 18“Tawo nga mamalatyon, si Haring Nabucodonosor sang Babilonia nagsalakay sang Tiro. Ginpaobra niya sing tudo ang iya mga soldado tubtob nagkalbo ang ila mga ulo kag nadul-ak ang ila mga abaga, pero ang hari kag ang iya mga hangaway wala sing nakuha sa tanan nila nga pagpangabudlay. 19Gani, karon, amo ini ang ginasiling ko sa imo, ako, ang Ginoo nga Gamhanan: Ginatugyan ko ang duta sang Ehipto sa kay Haring Nabucodonosor. Pagaagawon niya ang mga pagkabutang kag panguhaon ang tanan nga manggad sang Ehipto subong suhol sang mga hangaway. 20Ihatag ko sa iya ang Ehipto subong bayad sang iya mga pag-alagad, tungod kay ang iya mga hangaway nag-alagad sa akon. Ako, ang Ginoo nga Gamhanan, amo ang naghambal sini.
21“Kon matabo ini, pabakuron ko ang mga tawo sang Israel, kag ikaw, Ezequiel, pahambalon ko sa diin ang tanan makabati sa imo, agod makilala nila nga ako amo ang Ginoo.”
Currently Selected:
Ezequiel 29: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
