Exodo 8

Ang mga Paka

1Karon ang Ginoo nagsiling kay Moises, “Kadtoi ang hari kag singgana sia, ‘Amo ini ang ginasiling sang Ginoo: Palakta ang akon mga tawo, agod makasimba sila sa akon. 2Kon indi mo sila pagpalakton, halitan ko ang bug-os mo nga pungsod paagi sa pagpadagsa sing mga paka. 3Ang Suba sang Nilo mapuno sing mga paka, magahalin sila sa suba kag magasulod sa imo palasyo, sa imo kwarto, sa imo katre, sa mga balay sang imo mga opisyales kag sang imo mga tawo, kag bisan pa sa imo mga dapog kag sa imo mga lamasan sang harina. 4Magalumpat sila sa imo, sa imo mga tawo, kag sa imo tanan nga mga opisyales.’”

5Ang Ginoo nagsiling kay Moises, “Singgani si Aaron, ‘Ibayaw ang imo sungkod sa mga suba, sa mga kanal, sa mga punong, kag patakasa ang mga paka sa duta sang Ehipto.’” 6Gani ginbayaw ni Aaron ang sungkod sa ibabaw sang tanan nga tubig, kag ang mga paka nagtakas kag nagpuno sang bug-os nga duta. 7Pero ang mga madyikero paagi sa ila mga madyik nagpatakas man sang mga paka sa duta.

8Ginpatawag sang hari si Moises kag si Aaron nga nagasiling, “Pangamuyo kamo sa Ginoo nga iya kuhaon ang mga paka sa akon, kag sa akon mga tawo, kag akon palakton ang inyo mga katawhan agod makadulot sing mga halad sa Ginoo.”

9Nagsiling si Moises sa hari, “Suno sa tion nga luyag mo singgana lang ako, kon san-o ako mangamuyo tungod sa imo, sa imo mga opisyales, kag sa imo mga tawo, agod ang mga paka makuha sa imo kag sa imo mga balay kag wala na gid sang may mabilin luas lamang sa Suba sang Nilo.”

10Nagsabat ang hari, “Pangamuyo ka para sa akon buas.”

Si Moises nagsiling, “Matuman suno sa imo ginsiling, agod imo mahibaluan nga wala na sing iban nga dios, kaangay sa Ginoo nga amon Dios. 11Ang mga paka makuha sa imo, sa imo mga balay, sa imo nga opisyales, kag sa imo mga tawo, kag didto lamang makita sila sa Suba sang Nilo.” 12Dayon ginbayaan ni Moises kag ni Aaron ang hari, kag nagpangamuyo si Moises sa Ginoo nga kuhaon ang mga paka nga iya ginpadala sa hari. 13Ang Ginoo naghimo suno sa ginpangayo ni Moises, kag ang mga paka sa sulod sang mga balay, sa mga ugsaran, kag sa mga latagon nagkalamatay. 14Gintipon ini sang mga Ehiptohanon sa dalagku nga mga tinumpukan, kag ang bug-os nga duta nagbaho tungod sa mga paka. 15Pero sang makita sang hari nga nagkalamatay na ang mga paka, nagpatig-a sia liwat sang iya tagipusoon, kag indi sia magpamati kay Moises kag kay Aaron, subong sang ginsiling sang Ginoo.

Ang mga Lamok

16Ang Ginoo nagsiling kay Moises, “Singgana si Aaron, ‘Hampaka sang imo sungkod ang duta, kag ang yab-ok mahimo nga mga lamok sa bug-os nga duta sang Ehipto.’” 17Gani gintuman nila ini. Ginbayaw ni Aaron ang iya sungkod, kag ginhampak ang duta. Ang yab-ok nahimo nga mga lamok kag nagpangutot sa mga tawo kag sa mga kahayupan. Ang tanan nga mga yab-ok sa Ehipto nahimo nga mga lamok. 18Sa amo man nga bagay ang mga madyikero nagtinguha sa pagpatuhaw sang mga lamok paagi sa ila mga madyik, pero indi sila makahimo sini. Gani may mga lamok nga nagapangutot sa mga tawo kag mga kahayupan. 19Ang#Luc. 11:20. mga madyikero nagsiling sa hari, “Ginhimo ini sang Dios!” Pero nagpatig-a ang hari sang iya tagipusoon, kag indi magpamati kay Moises kag kay Aaron, subong sang ginsiling sang Ginoo.

Ang mga Langaw

20Ang Ginoo nagsiling kay Moises, “Lakat ka sing aga pa gid buas kag pakigkitai ang hari samtang nagapakadto sia sa suba kag singgana sia, ‘Amo ini ang ginsiling sang Ginoo: Palakta ang akon mga tawo, agod makasimba sila sa akon. 21Kon indi mo sila pagpalakton, ginapaandaman ko ikaw nga magapadala ako sing mga langaw sa imo, sa imo mga opisyales, sa imo mga tawo, kag sa imo mga balay. Mapuno sing mga langaw ang mga balay sang mga Ehiptohanon, kag bisan pa ang duta nga ila ginatindugan. 22Pero sa sina nga adlaw, indi ko pagpadalhan sing mga langaw ang duta sang Gosen, sa diin didto nagaestar ang akon mga tawo, agod nga wala sing mga langaw didto kag imo mahibaluan nga ako, ang Ginoo amo ang nagagahom sa sini nga duta. 23Butangan ko sing kinatuhay#8:23 Ang iban nga dumaan nga mga pagbadbadkinatuhay; sa Hebreokaluwasan. sa tunga sang akon mga tawo, kag sa imo mga tawo. Ini nga milagro mahanabo buas.’” 24Ginhimo ini sang Ginoo, kag ang nagadulom nga mga langaw nag-abot sa palasyo sang hari, sa mga balay sang iya mga opisyales, kag sa bug-os nga duta sang Ehipto. Ang bug-os nga pungsod ginhalitan sang mga langaw.

25Dayon ginpatawag sang hari si Moises kag si Aaron, kag nagsiling sa ila, “Lakat kamo sa pagdulot sing mga halad sa inyo Dios sa sini nga duta.”

26Nagsabat si Moises, “Indi nagakaigo nga himuon ina diri, tungod kay ang mga Ehiptohanon magakaakig gid sa amon tungod sang amon paghalad sing mga hayop sa Ginoo nga amon Dios. Kon maghalad kami sing mga hayop nga ginakangil-aran nila, kag makita nila kami, batuhon nila kami tubtob mapatay. 27Malakat kami sing tatlo ka adlaw sa desierto sa pagdulot sing mga halad sa Ginoo nga amon Dios, suno sa iya ginsugo sa amon.”

28Ang hari nagsiling, “Tugotan ko kamo sa paglakat agod maghalad sa Ginoo nga inyo Dios didto sa desierto, pero indi gid kamo magpalayo. Pangamuyoi ninyo ako.”

29Si Moises nagsabat, “Kon makalakat na ako, magapangamuyo ako sa Ginoo nga buas gid nga daan ang mga langaw magahalin sa imo, sa imo mga opisyales, kag sang imo mga tawo. Pero indi mo kami pagdayaan liwat, kag indi mo pagpunggan ang mga tawo sa paglakat agod magdulot sing mga halad sa Ginoo.”

30Ginbayaan ni Moises ang hari, kag nagpangamuyo sa Ginoo, 31kag ang Ginoo naghimo suno sa ginpangayo ni Moises. Ginkuha niya ang mga langaw sa hari, sa iya mga opisyales, sa iya nga mga tawo kag wala gid sang bisan isa nga nabilin. 32Pero bisan sa sini nga tion, ang hari nagpatig-a pa gid sang iya tagipusoon, kag liwat, wala magtugot sa mga tawo sa paglakat.

Currently Selected:

Exodo 8: MBBHIL12

Highlight

Copy