Exodo 7
7
1Ang Ginoo nagsiling kay Moises, “Tan-awa bala, himuon ko ikaw nga daw Dios sa hari, kag si Aaron nga imo utod magahambal sa iya subong imo propeta. 2Sugiri si Aaron sang tanan nga ginsugo ko sa imo, kag sia magasiling sa hari nga tugotan niya ang mga Israelinhon sa paggwa sa iya pungsod. 3Pero patig-ahon ko ang tagipusoon sang hari, kag bisan magahimo ako sing madamo nga mga milagro kag makatilingala nga mga buhat sa Ehipto, 4indi sia magpamati sa inyo. Dayon halitan ko ang duta sang Ehipto, silutan ko sila sing tudotudo, kag pangulohan ko ang mga tribo sang akon katawhan nga mga Israelinhon pagwa sa Ehipto. 5Ang mga Ehiptohanon magakilala nga ako amo ang Ginoo, kon bayawon ko ang akon kamot batok sa ila, kag pagwaon ko ang mga Israelinhon sa ila pungsod.” 6Gintuman ni Moises kag ni Aaron ang ginsugo sang Ginoo sa ila. 7Ang edad ni Moises otsenta ka tuig, kag ang edad ni Aaron otsentay tres ka tuig, sang maghambal sila sa hari.
Ang Sungkod ni Aaron
8Ang Ginoo nagsiling kay Moises kag kay Aaron, 9“Kon ang hari magsiling sa inyo, ‘Pamatud-i ninyo ini paagi sa paghimo sing milagro,’ singgana si Aaron, ‘Kuhaa ang imo sungkod kag ihaboy sa atubang sang hari, kag mahimo ini nga man-og.’” 10Gani si Moises kag si Aaron nagkadto sa hari, kag gintuman ang tanan nga ginsugo sang Ginoo sa ila. Ginhaboy ni Aaron ang iya sungkod sa atubang sang hari kag sang iya mga opisyales, kag nahimo ini nga man-og. 11Dayon gintawag sang hari ang iya mga mangin-alamon nga mga tawo kag mga madyikero, kag paagi sa ila mga madyik naghimo sila sing amo man. 12Ginhaboy nila ang ila mga sungkod sa duta kag nahimo ini nga mga man-og. Pero ang sungkod nga iya ni Aaron naghalunhon sang ila mga sungkod. 13Pero ang hari nagpatig-a sang iya tagipusoon, kag indi sia magpamati sa ila, subong sang ginsiling sang Ginoo.
Ang mga Kalalat-an nga Ginpadala sa Ehipto
Ang Dugo
14Karon#Klm. Sol. 11:6-8. ang Ginoo nagsiling kay Moises, “Matig-a ang tagipusoon sang hari, kag indi gid niya pagpalakton ang mga tawo. 15Gani lakat ka kag pakigkitai ang hari pagkaaga, sa iya pagkadto sa Suba sang Nilo. Hulata sia sa pangpang sang suba. Dalha man ang sungkod nga nahimo nga man-og. 16Dayon singgana ang hari, ‘Ang Ginoo, ang Dios sang mga Hebreo, nagpadala sa akon sa pagsiling sa imo: Palakta ang akon mga tawo, agod makasimba sila sa akon sa desierto. Pero tubtob karon indi ikaw magpamati. 17Karon,#Bug. 16:4. Mahal nga Hari amo ini ang ginasiling sang Ginoo: Makakilala ikaw nga ako amo ang Ginoo paagi sa akon pagahimuon. Tan-awa bala, paagi sini nga sungkod hampakon ko ang tubig sang suba, kag mahimo ini nga dugo. 18Ang mga isda magakalamatay, kag ang suba magabaho gid sa bagay nga ang mga Ehiptohanon indi makainom sang iya sini tubig.’”
19Ang Ginoo nagsiling kay Moises, “Singgana si Aaron nga kuhaon niya ang iya sungkod kag ibayaw ini sa ibabaw sang tanan nga tubig sa Ehipto, sa mga suba, sa mga kanal, kag sa mga punong. Ang tubig mahimo nga dugo, kag sa bug-os nga duta may dugo bisan pa sa mga sulodlan nga kahoy kag mga sulodlan nga bato.”
20Gintuman ni Moises kag ni Aaron ang ginsugo sang Ginoo sa ila. Sa atubang sang hari kag sang iya mga opisyales, ginbayaw ni Aaron ang iya sungkod kag ginhampak ang tubig sa suba, kag ang tanan nga tubig sini nahimo nga dugo. 21Ang mga isda sa suba nagkalamatay, kag nagbaho gid ini sa bagay nga ang mga Ehiptohanon indi makainom sa tubig sang suba. Kag may dugo sa bug-os nga Ehipto. 22Dayon ang mga madyikero sang Ehipto naghimo man sini paagi sa ila mga madyik, kag ang hari nagpatig-a pa gid sang iya tagipusoon. Indi sia magpamati kay Moises kag kay Aaron, subong sang ginsiling sang Ginoo. 23Sa baylo ginbayaan sila sang hari kag nagbalik sia sa iya palasyo nga wala nagasapak sini. 24Ang tanan nga mga Ehiptohanon nagkutkot sa higad sang pangpang sang suba agod makainom, tungod kay indi sila makainom sang tubig sa suba.
25Nagligad ang pito ka adlaw sa tapos nga ginhampak sang Ginoo ang suba.
Currently Selected:
Exodo 7: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
