Ester (Griego) 4
4
Ginpangayo ni Mardoqueo ang Bulig ni Ester
1Sang mahibaluan ni Mardoqueo ang mga nagkalatabo, gingisi niya ang iya bayu sa daku nga pagpangalisod. Nagbayo sia sing sako, nagbutang sing abo sa iya ulo kag naglibot sa bug-os nga siudad kag sa mabaskog nga tingog nagsiling, “Pagalaglagon ang pungsod nga wala sing sala!” 2Sang pagsampot niya sa ganhaan sang palasyo, wala sia magsulod kay wala ginatugotan nga makasulod ang bisan sin-o man nga nagabayo sing sako kag nagabutang sang abo sa iya ulo. 3Sa tanan nga mga probinsya sa diin ginpahibalo ang sulat sang hari, nagluntad ang matunog nga paglalaw sang mga Judio. Naghinibi sila, nagpanalambiton kag nagbayo sang sako kag nagbutang sang abo sa ila mga ulo.
4Nahibaluan lamang ni Ester paagi sa iya mga suloguon nga babayi kag kapon nga mga tawo ang ginhimo ni Mardoqueo. Natublag gid si Ester kag iya ginpadalhan si Mardoqueo sang mga bayu sa tuyo nga mag-ilis ini sang iya ginasuklob nga sako, pero wala niya ini ginbaton. 5Gani, pinatawag ni Ester ang kapon nga si Hatak, isa sang mga kapon sa palasyo nga gintugyanan sa pag-alagad sa iya. Ginpadala niya ini kay Mardoqueo agod hisayran ang kabug-osan sang mga hitabo.#4:5 Ang iban nga mga manuskrito nagadugang sang bersikulo 6: Si Hatak nagkadto kay Mardoqueo sa plasa sang siudad sa atubangan sang palasyo. 7Ginsaysay ni Mardoqueo sa iya ang tanan kag kon paano nagpanaad si Haman sa paghatag sing 375 ka tonelada nga pilak sa talaguan sang manggad sang hari, lamang nga mapapatay ang tanan nga mga Judio. 8Ginhatagan niya si Hatak sang kopya sang sulat nga ginbalhag sa Susa nga nagamando sa paglaglag sang mga Judio. Ginpangabay ni Mardoqueo si Hatak nga iya ihatag kay Ester ang kopya sang sulat agod nga pangayuon ni Ester sa hari ang pagkaluoy para sa mga Judio. Nagsiling si Mardoqueo “Ihambal sa iya nga dumdomon niya ang mga inadlaw sang indi pa sia rayna kag nagdaku sia sa idalom sang akon pag-atipan. Sa karon kay si Haman nga pangulong ministro sang hari nagpamat-od nga pamatyon kami, dapat sia magpangamuyo sa Ginoo kag magpakighambal sia sa hari natungod sa amon. Kinahanglan nga luwason niya kami sa kamatayon.”
9Gani gintuman ni Hatak ang ginpangabay ni Mardoqueo. 10Ginpabalik ni Ester si Hatak sa kay Mardoqueo nga dala ini nga mensahe: 11“Ang bisan sin-o man, lalaki ukon babayi, nga magakadto sa hari sa nasulod nga bahin sang korte nga wala ginpatawag, ginapamatbatan sing kamatayon luas lamang kon ang hari maghakyaw sang iya bulawan nga setro. Ang tanan sa ginharian nakahibalo sini. Isa na ka bulan ang nagligad nga ginpatawag ako sang hari.”
12Sang mabaton ni Mardoqueo ang sulat ni Ester, 13pinadalhan niya sia sining paandam: “Ester, indi ka maghunahuna nga indi makatalagam ang imo kahimtangan sang sa iban nga mga Judio sa ginharian. 14Kon maghipos ka lamang sa subong nga kahimtangan, ayhan magaabot sa mga Judio ang bulig sa iban nga paagi kag maluwas sila. Pero ikaw pagapatyon kag madula ang linahi sang imo amay. Pero sin-o ang makapakot? Ayhan ginbuhat ka nga rayna para magbulig sa tagsubong sini nga kahigayunan!”
15Si Ester nagpadala kay Mardoqueo sini nga sulat: 16“Lakat ka kag tipuna ang tanan nga mga Judio sa siudad sang Susa. Magpuasa kamo kag magpangamuyo para sa akon. Sa sulod sang tatlo ka adlaw kag tatlo ka gab-i indi kamo magkaon kag mag-inom. Ako kag ang akon mga suloguon nga babayi magahimo man sing subong. Pagkatapos sini magakadto ako sa hari bisan pa nga batok sa kasugoan. Handa ako nga mapatay kon kamatayon ang balos sining akon pagahimuon.”
17Si Mardoqueo naglakat kag iya ginbuhat ang tanan nga ginpanugyan ni Ester.#
Currently Selected:
Ester (Griego) 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012