Mga Taga-Efeso 5
5
Ang Pagkabuhi sa Kapawa
1Tungod kay pinalangga kamo nga mga anak sang Dios, dapat tinguhaan ninyo nga magmanginkaangay kamo sa iya. 2Magkabuhi#Exo. 29:18; Sal. 40:6. kamo nga ginagamhan sang gugma, subong nga si Cristo naghigugma sa aton kag naghatag sang iya kaugalingon nga kabuhi para sa aton, subong isa ka mahamot nga dulot kag halad nga nahamut-an sang Dios.
3Tungod kay mga tumoluo kamo, indi nagakabagay nga hambalon kamo sang mga tawo nga may pagpakighilawas, kahigkuan, ukon kahakog sa tunga ninyo. 4Kag indi man angay nga maggamit kamo sing mga binastos, binuang kag mahigko nga mga pulong. Sa baylo, magpasalamat kamo sa Dios. 5Dapat ninyo mahibal-an nga wala sing makihilawason, mahigko, kag mahakog nga tawo (kay ang pagkahakog isa ka sahi sang pagsimba sa mga diosdios) nga makapanubli sang Ginharian ni Cristo kag sang Dios.
6Indi kamo magpainto sa bisan kay sin-o paagi sa ila binuang nga mga pulong, kay tungod sini nga mga butang ang kaakig sang Dios magaabot sa mga tawo nga wala nagatuman sa iya. 7Gani indi kamo magpahilabot sa ila. 8Kamo anay yara man sa kadudulman, pero karon kay iya na kamo mga katawhan sang Ginoo, yara na kamo sa kapawa. Gani dapat magkabuhi kamo subong nga mga anak sang kapawa. 9Kay ang kapawa#5:9 ang kapawa: ang iban nga mga manuskrito mayang Espiritu. nagapatubas sing bugana sang tanan nga sahi sang kaayo, pagkamatarong, kag kamatuoran. 10Tinguhai ninyo ang paghibalo kon ano ang nahamut-an sang Ginoo. 11Indi kamo magpakigbahin sa mga wala sing pulos nga mga butang nga ginahimo sang mga tawo, ang mga butang nga iya sang kadudulman. Sa baylo, ipakilala sa ila nga malain ini. 12Makahuloya gid bisan hambalon lang ang mga likom nga mga butang nga ginahimo nila. 13Kag kon ang tanan nga mga butang madala sa kapawa, dayon ang matuod nila nga kinaugali mapahayag sing maathag. 14Kay ang bisan ano nga butang nga ginapahayag sing maathag manginkapawa,#5:14 ang bisan ano…manginkapawa: ukonang kapawa nagapahayag sang maathag sang tanan nga mga butang. gani ginsiling:
“Magmata ka, palatulog,
kag bangon halin sa mga minatay,
kag si Cristo magasilak sa imo.”
15Gani magkabuhi kamo sing mainandamon. Indi kamo magkabuhi subong sang ignorante nga mga tawo kundi magkabuhi kamo subong sang maalam nga mga tawo. 16Himusli#Col. 4:5. ninyo ang tanan nga kahigayunan, tungod kay malaut ini nga mga inadlaw. 17Gani indi kamo magpakabuang, kundi tinguhai ninyo ang paghibalo kon ano ang kabubot-on sang Ginoo.
18Indi kamo magpahubog sang bino nga magalaglag lamang sa inyo. Sa baylo, pun-a ninyo ang inyo kaugalingon sang Espiritu. 19Sa#Col. 3:16-17. inyo paghambalanay sa isa kag isa gamita ninyo ang mga pulong sang mga salmo, mga ambahanon, kag balaan nga mga kalantahon. Mag-amba kamo sang mga kalantahon kag mga salmo sa Ginoo nga may pagdayaw sa inyo mga tagipusoon. 20Sa tanan nga butang magpasalamat gid kamo pirme sa Dios nga Amay, sa ngalan sang aton Ginoong Jesu-Cristo.
Mga Asawa kag mga Bana
21Magpasakop kamo sa isa kag isa, tungod sang inyo pagtahod kay Cristo.
22Mga#Col. 3:18; 1 Ped. 3:1. asawa, magpasakop kamo sa inyo mga bana, subong nga sa Ginoo. 23Kay ang bana may awtoridad sa iya asawa, subong nga si Cristo may awtoridad sa iglesia, kag si Cristo gid mismo amo ang Manluluwas sang iglesia nga iya lawas. 24Gani ang mga asawa dapat magpasakop sang ila mga kaugalingon sing bug-os sa ila mga bana, subong nga ang iglesia nagapasakop kay Cristo.
25Mga#Col. 3:19; 1 Ped. 3:7. bana, higugmaa ninyo ang inyo mga asawa, subong nga si Cristo naghigugma sang iglesia kag naghatag sang iya kabuhi tungod sa iya. 26Ginhimo niya ini sa paghalad sang iglesia sa Dios paagi sa iya pulong, sa tapos matinluan ini paagi sa paghugas sa tubig, 27agod nga iya mapaatubang sa iya kaugalingon ang iglesia nga matahom—putli kag wala sing kasawayan, wala sing dagta ukon ukot, ukon iban pa nga kakulangan. 28Ang mga bana dapat gid maghigugma sang ila mga asawa, subong sang ila paghigugma sang ila kaugalingon nga mga lawas. Ang nagahigugma sang iya asawa nagahigugma sang iya kaugalingon. 29Wala sing tawo nga nagadumot sang iya kaugalingon nga lawas, kundi iya ini ginasagod kag ginaatipan subong sang ginahimo ni Cristo sa iglesia, 30kay kita mga bahin sang iya lawas. 31Ang#Gen. 2:24. kasulatan nagasiling, “Sa sini nga kabangdanan, ang lalaki magabiya sang iya amay kag iloy, kag magahiusa sa iya asawa, kag sila nga duha mangin-isa.” 32May isa ka daku nga kamatuoran nga napahayag sa sini nga kasulatan, kag sa akon paghangop nahanungod ini kay Cristo kag sa iglesia. 33Pero ini para man sa inyo: ang tagsa ka bana dapat maghigugma sang iya asawa subong sang iya kaugalingon, kag ang tagsa ka asawa dapat magtahod sa iya bana.
Currently Selected:
Mga Taga-Efeso 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
