Deuteronomio 16
16
Ang Pascua
(Exo. 12:1-20)
1“Pasidunggi#Exo. 12:1-20; Lev. 23:5-8; Num. 28:16-25. ang Ginoo nga inyo Dios paagi sa pagsaulog sang Pascua sa bulan sang Abib, kay sang isa ka gab-i sina nga bulan ginluwas kamo sang Ginoo sa Ehipto. 2Kadto sa isa ka lugar nga ginasimbahan kag ihawa didto ang isa sang inyo mga karnero ukon mga baka para sa panihapon sang Pascua sa pagpasidungog sa Ginoo nga inyo Dios. 3Kon magkaon kamo sini, indi kamo magkaon sang tinapay nga may lebadora. Sa sulod sang pito ka adlaw magkaon kamo sang tinapay nga wala sing lebadora, subong sang inyo ginhimo sang naggwa kamo sing dalidali sa Ehipto. Magkaon kamo sining tinapay sa pagpahanumdom sa inyo sang inyo mga kabudlayan, agod nga sa nagakabuhi kamo madumdoman ninyo ang adlaw sang inyo paggwa sa Ehipto. 4Sa sulod sang pito ka adlaw wala sing isa sa inyo duta nga magtago sing lebadora sa iya balay, kag ang karne sang sapat nga gin-ihaw sa gab-i sang nahauna nga adlaw kinahanglan kaunon sa amo man nga gab-i.
5“Indi pag-ihawa ang palascuahan nga mga sapat sa bisan diin nga mga banwa nga ihatag sa inyo sang Ginoo nga inyo Dios. 6Ihawa ini sa isa lang ka lugar nga ginasimbahan, kag himua ini sa pagtunod sang adlaw, ang tion sang adlaw sang inyo paggwa sa Ehipto. 7Lagaa ini kag kauna sa lugar nga ginasimbahan, kag pagkaaga pauli kamo. 8Sa sulod sang anom ka adlaw magkaon kamo sing tinapay nga wala sing lebadora, pero sa ikapito nga adlaw magtilipon kamo sa pagsimba sa Ginoo nga inyo Dios, kag indi kamo mag-obra sa sina nga adlaw.
Ang Piesta sang Pag-ani
(Exo. 34:22; Lev. 23:15-21)
9“Mag-isip#Lev. 23:15-21; Num. 28:26-31. kamo sing pito ka simana halin sa tion sang pagsugod sang ani, 10dayon sauloga ang Piesta sa Pag-ani sa pagpasidungog sa Ginoo nga inyo Dios paagi sa pagdala sang halad nga kinabubot-on sa iya suno sa kaayuhan nga iya ginhatag sa inyo. 11Magkalipay kamo sa atubang sang Ginoo upod sa inyo mga kabataan, sa inyo mga alagad, kag sa mga Levita, sa mga dumoluong, sa mga ilo, kag sa mga balo nga nagaestar sa imo mga banwa. Himua ini sa lugar nga ginasimbahan. 12Dumdoma nga ulipon man kamo anay sa Ehipto, gani tumana gid ini nga mga sugo.
Ang Piesta sang mga Palasilungan
(Lev. 23:33-43)
13“Sa#Lev. 23:33-36, 39-43; Num. 29:12-38. tapos malinas ninyo ang inyo trigo kag mapuga ang mga ubas, sauloga ang Piesta sang mga Palasilungan sa sulod sing pito ka adlaw. 14Magkalipay kamo upod sa inyo mga kabataan, sa inyo mga alagad, kag sa mga Levita, sa mga dumoluong, sa mga ilo, kag sa mga balo nga nagaestar sa inyo mga banwa. 15Pasidunggi ang Ginoo nga inyo Dios paagi sa pagsaulog sini nga piesta sa sulod sang pito ka adlaw sa lugar nga ginasimbahan. Magkalipay kamo, tungod kay ang Ginoo nagpakamaayo sang inyo patubas kag pagpangabudlay.
16“Ang tanan nga mga lalaki sang inyo pungsod mag-abot sa pagsimba sa Ginoo sing makatlo sa isa ka tuig sa lugar nga ginasimbahan: sa Pascua, sa Piesta sang Pag-ani, kag sa Piesta sang mga Palasilungan. Ang tagsa ka tawo magdala sang isa ka dulot 17suno sa iya masarangan, suno sa mga kaayuhan nga ginhatag sa iya sang Ginoo nga iya Dios.
Ang Matarong nga Pagdumala
18“Sa tagsa ka tribo magpili kamo sing mga manughukom kag iban nga mga opisyales nga yara sa tagsa ka banwa nga pagaihatag sa inyo sang Ginoo nga inyo Dios. Ini sila dapat maghukom nga wala sing pinilian. 19Indi#Exo. 23:6-8; Lev. 19:15. sila maghukom sang di-matarong ukon magpabor sa bisan kay sin-o, kag indi sila magbaton sing mga regalo, kay ang hamham nagapabulag bisan sang maalam kag matarong nga tawo, kag amo ini ang kabangdanan nga nagahatag sila sing sayop nga paghukom. 20Ang katarungan lamang amo ang sundon ninyo kag magmatarong kamo sa gihapon, agod mapanag-iyahan ninyo ang duta nga ginahatag sang Ginoo nga inyo Dios kag makapadayon kamo sa pag-estar didto.
21“Kon#Exo. 34:13. maghimo kamo sing altar para sa Ginoo nga inyo Dios, indi kamo magpatindog sa kilid sini sang bisan ano nga haligi sang diosa nga si Asera. 22Kag#Lev. 26:1. indi kamo magpatindog sang haligi nga bato nga sa diin pagasimbahon ang mga diosdios, kay ginakangil-aran ini sang Ginoo.
Currently Selected:
Deuteronomio 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
