Baruc 2
2
1“Gani ang Ginoo nagtuman sang iya pamahog nga iya ginhimo batok sa amon kag sa amon mga hukom, amon mga hari, amon mga pangulo kag sa mga taga-Israel kag Juda. 2Ini nga hitabo wala pa mahanabo sa bisan diin nga bahin sang kalibutan kundi sa Jerusalem sang ang Ginoo nagtuman sang iya mga pamahog nga nasulat sa Kasugoan ni Moises. 3Tuman gid kalain ang nagkalatabo sa bagay nga ginkaon namon ang unod sang amon mga kabataan nga lalaki kag babayi. 4Ginpaalaplaag sang Ginoo ang amon mga katawhan kag gintugyan kami sa idalom sang paggahom sang tanan nga mga pungsod sa amon palibot kag ini sila nagpakahuya kag nagkangil-ad sa amon. 5Nakasala kami batok sa Ginoo nga amon Dios kag wala magtuman sa iya. Gani, nalutos ang amon pungsod sa baylo nga magdaog.
6“Ang Ginoo nga amon Dios matarong sa gihapon pero kami kag ang amon mga katigulangan nabug-atan pa sang amon mga sala. 7Bisan pa nga ginsilutan kami sang Ginoo suno sa iya pamahog, 8wala pa kami gihapon nagliso sa iya kag magbiya sang amon malaut nga mga panghunahuna. 9-10Wala kami nagtuman sa iya ukon nagkabuhi suno sa iya matarong nga mga sugo, gani ginpadala sang Ginoo ang tanan nga mga silot nga iya gin-aman para sa amon.
Ang Pangamuyo para sa Kahilwayan
11“Ikaw, O Ginoo, amo ang Dios sang Israel nga nagluwas sang imo mga tawo gikan sa Ehipto paagi sa daku nga gahom, mga tanda, mga milagro kag makatilingala nga mga hitabo. Ginpakita mo ang imo makagagahom nga kusog kag naangkon mo ang mahimayaon nga kabantugan nga ginakilala pa tubtob karon. 12O Ginoo nga amon Dios, nakasala kami, nanginmalalison kami, ginlapas namon ang tanan nimo nga mga sugo. 13Pero sa karon indi ka na magkaakig sa amon. Diutay na lamang kami nga nabilin sa mga pungsod nga sa diin ginpanglapta nimo kami. 14Pamatii ang amon pangamuyo kag pagpakitluoy, O Ginoo, kag luwasa kami tungod lamang sang imo kaugalingon nga kadungganan. Buhata nga mahamut-an kami sang mga tawo nga nagbihag sa amon. 15Dayon ang bug-os nga kalibutan makahibalo nga ikaw ang Ginoo nga amon Dios kag imo ginpili ang pungsod sang Israel nga mangin-imo katawhan.
16“O Ginoo, gikan sa imo balaan nga ilistaran, tamda ang amon makaluluoy nga kahimtangan. Pamatii ang amon pangamuyo. 17Buksi ang imo mga mata kag tamda kami. Ang mga yara sa kalibutan sang mga minatay nga nabawian sang espiritu indi makadayaw sa imo ukon makasugid nga ikaw matarong. 18Ang mga buhi lamang, O Ginoo, ang makadayaw sa imo kag makakilala sang imo pagkamatarong walay sapayan nga ini sila nagaantos sang labi, mga maluya kag nabudlayan, gutom kag mga harapon.
19“O Ginoo nga amon Dios, nagapakitluoy kami, indi tungod sang kon ano man nga maayo nga nabuhat sang amon mga katigulangan kag mga hari. 20Ginpaukpan mo kami sang imo kaakig kag kasingkal, suno sa imo pagpaandam nga pagahimuon nimo sang ang imo mga alagad nga propeta nagsiling sa amon, 21‘Magsaludo#Jer. 7:34; 27:10-12. kamo kag mag-alagad sa hari sang Babilonia, kag makapabilin kamo sa duta nga ginhatag ko sa inyo mga katigulangan. 22Pero kon maglalis kamo sa akon sugo nga mag-alagad sa iya, 23pagatapuson ko ang malipayon nga kahiwatan sa mga banwa sang Juda kag sang Jerusalem. Bisan pa ang pagkinasadya sa punsyon sang kasal indi na mabatian. Ang bug-os nga kadutaan manginmasubo kag wala sing may magaestar.’
24“Pero#Jer. 8:1-2. wala kami nagtuman sang imo sugo sa pag-alagad sa hari sang Babilonia, gani imo gintuman ang imo pamahog nga imo ginbuhat sang naghambal ka sa imo mga alagad nga mga propeta nga ang mga tul-an sang amon mga hari kag mga katigulangan pagakuhaon sa ila mga lulobngan kag pagalaptahon. 25Kag karon yari sila nga nagkalay-ag sa idalom sang init sang adlaw kag sang tugnaw sang kagab-ihon. Nagkalamatay sila sa pag-antos sang kagutom, away kag balatian. 26Kag tungod sa sala sang mga tawo sang Israel kag Juda, ginlaglag nimo ang imo Templo bisan pa tubtob karon.
27“Pero, Ginoo, napun-an ikaw sing pagpaumod para sa amon kag imo gid kami ginkaluoyan, 28suno#Deut. 28:58, 62. sa imo ginsaad kay Moises nga imo alagad sadtong adlaw nga ginmanduan mo sia sa pagsulat sang imo Kasugoan sa atubang sang mga Israelinhon. 29Nagsiling ka, ‘Kon indi kamo magtuman sa akon, mamilagpilag kamo sa mga kapungsoran diin pagalaptahon ko kamo. 30Ako nakahibalo nga indi kamo magtuman sa akon tungod kay balingag kamo nga mga tawo. Pero sa tion nga bihagon kamo, magabalik ang inyo maayo nga panghunahuna. 31Dayon mahibaluan ninyo nga ako amo ang Ginoo nga inyo Dios kag hatagan ko kamo sing handom sa paghibalo kag sang panghunahuna sa paghangop. 32Kag didto sa duta diin kamo ginbihag pagadayawon ninyo ako kag inyo ako madumdoman. 33Untatan ninyo ang inyo pagkabalingag kag ang pagbuhat sang kalautan kay madumdoman ninyo ang natabo sa inyo mga katigulangan sang sila nagpakasala batok sa Ginoo. 34Dayon igabalik ko kamo sa duta nga akon ginsaad sa inyo mga katigulangan, kay Abraham, Isaac kag Jacob, kag inyo panag-iyahan ini liwat. Padamuon ko ang inyo kaliwat kag indi na gid matabo nga mangindiutay kamo nga pungsod. 35Magabuhat#Jer. 32:38-40. ako sa inyo sang isa ka walay katapusan nga kasugtanan, ako mangin-Dios ninyo kag kamo mangin-akon mga katawhan. Kamo nga mga taga-Israel indi ko na liwat pagpahalinon sa duta nga akon ginhatag sa inyo.’
Currently Selected:
Baruc 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012