2 Samuel 4
4
Si Isboset Ginpatay
1Sang pagkabati ni Isboset nga anak ni Saul nga si Abner ginpatay sa Hebron, hinadlukan sia, kag ang tanan nga mga tawo sang Israel natublag. 2Si Isboset may duha ka mga opisyales nga nagpangulo sa pagsalakay, nga amo sanday Baana kag Recab, mga anak ni Rimon nga taga-Beerot nga nagikan sa tribo ni Benjamin. (Ang Beerot sakop sang Benjamin. 3Ang mga tumandok nga nagaestar didto nagpalagyo sa Gitaim sa diin nag-estar sila subong mga dumoluong sini nga adlaw).
4Si#2 Sam. 9:3. Jonatan nga anak ni Saul may anak nga ginahingalanan kay Mefiboset. Nagaedad sia sing lima ka tuig sang si Saul kag si Jonatan napatay. Sang nag-abot ang balita nahanungod sang ila kamatayon halin sa Jezreel, ang iya yaya naghakwat sa iya kag nagpalagyo pero sa iya pagdalidali nabuy-an niya sia kag napiang.
5Si Recab kag si Baana nagkadto sa balay ni Isboset, kag nag-abot didto sila sang udto samtang nagapahuway si Isboset. 6Ang babayi nga yara sa pwerta gintuyo samtang nagapahangin sia sang trigo kag natulogan sia, gani si Recab kag si Baana nagsulod nga wala mahibaloi.#4:6 Ang bersikulo 6 nagasunod sang isa ka dumaan nga pagbadbad; sa HebreoNagsulod sila sa balay nga nagadala sing trigo kag ginbuno sia sa tiyan. Dayon si Recab kag ang iya utod nga si Baana nagpalagyo. 7Sang didto na sila sa sulod nagkadto sila sa kwarto ni Isboset, sa diin nagakatulog sia sing mahamuok kag ginpatay sia. Dayon ginpugotan nila sia, gindala nila ang iya ulo, kag naglakat sila sa bug-os nga gab-i paagi sa Kapatagan sang Jordan. 8Ginhatag nila ang ulo kay Haring David didto sa Hebron kag nagsiling sa iya, “Yari ang ulo ni Isboset nga anak sang imo kaaway nga si Saul nga nagtinguha sa pagpatay sa imo. Karon Mahal nga Hari, ang Ginoo nagtimalos sa kay Saul kag sa iya mga kaliwat tungod sa imo.”
9Si David nagsabat sa ila, “Ginasumpa ko sa Ginoo nga buhi, nga nagluwas sa akon sa tanan nga mga katalagman! 10Ang#2 Sam. 1:1-16. tawo nga nagkadto sa akon sa Ziklag kag nagsugid sa akon sang pagkapatay ni Saul naghunahuna nga nagdala sia sang maayo nga balita. Ginpadakop ko sia kag ginpapatay. Amo yadto ang balos nga ginhatag ko sa iya tungod sang balita! 11Daw ano pa gid ayhan kalain ang madangatan sang malaut nga mga nagpatay sang isa ka tawo nga wala sing sala kag nagakatulog sa iya kaugalingon nga balay! Karon magatimalos ako sa inyo tungod sang pagpatay sa iya kag dulaon ko kamo sa duta!” 12Nagsugo si David sa iya mga soldado sa pagpatay kay Recab kag kay Baana, kag gin-utod ang ila mga kamot kag mga tiil, nga ila ginpakabit malapit sa punong sa Hebron. Ginkuha nila ang ulo ni Isboset kag ginlubong ini sa lulobngan ni Abner didto sa Hebron.
Currently Selected:
2 Samuel 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
