2 Samuel 3
3
1Ang inaway nagpadayon sing malawig nga tion sa tunga sang panimalay ni Saul kag sang panimalay ni David. Si David nagmabakod pa gid, samtang ang iya mga kasumpong nagluya nga nagluya.
Ang mga Anak ni David
2Amo ini ang anom ka mga anak nga lalaki nga natawo kay David sa Hebron: ang nahauna amo si Amnon nga ang iya iloy amo si Ahinoam nga taga-Jezreel; 3ang ikaduha amo si Quileab nga ang iya iloy amo si Abigail nga balo ni Nabal nga taga-Carmel; ang ikatlo amo si Absalom nga ang iya iloy amo si Maaca nga anak ni Talmai nga hari sa Gesur; 4ang ikaapat amo si Adonias nga ang iya iloy amo si Hagit; ang ikalima amo si Sefatias nga ang iya iloy amo si Abital; kag 5ang ikaanom amo si Itream nga ang iya iloy amo si Egla. Amo ini tanan ang mga anak ni David nga natawo sa Hebron.
Si Abner Nagbuylog kay David
6Samtang nagpadayon ang inaway sa tunga sang mga hangaway ni David kag ni Saul, si Abner nangingamhanan pa gid sa mga sumolunod ni Saul.
7Isa ka adlaw ginsuknaan ni Isboset nga anak ni Saul si Abner, kay si Abner nagpakighilawas sa babayi ni Saul nga si Rizpa nga anak ni Aya. 8Ini nagpaakig gid kay Abner kag nagsiling sia, “Ano ang dumdom mo nga nagtraidor ako sa kay Saul? Nagahunahuna ka bala nga nagaalagad ako sa Juda? Halin pa gid sang una nag-unong ako sa imo amay nga si Saul, sa iya mga utod nga lalaki, kag sa iya mga abyan, kag gin-apinan ko ikaw nga indi malutos ni David; pero karon ginasuknaan mo ako sa pagpakasala sa isa ka babayi! 9-10Ang#1 Sam. 15:28. Ginoo nagsaad kay David nga pagakuhaon niya ang ginharian kay Saul kag sa iya mga kaliwat kag himuon si David nga hari sang Israel kag sang Juda, halin sa isa ka pamusod pakadto sa isa ka pamusod sang pungsod. Karon kabay pa nga patyon ako sang Dios kon indi ko ini pagtumanon!” 11Si Isboset kinulbaan gid sa kay Abner sa bagay nga wala gid sia makahambal bisan isa ka taga.
12Sa sadto nga tion si David didto sa Hebron,#3:12 Ang isa ka dumaan nga pagbadbadsa Hebron; sa Hebreosa diin didto si Abner. kag si Abner nagpadala sing mga mensahero sa iya nga nagasiling, “Sin-o bala ang magadumala sini nga duta? Kon magsugot ka sa akon, buligan ko ikaw sa pagdala sang bug-os nga Israel sa idalom sang imo paggahom.”
13Si David nagsabat, “Sigi, mahimo ako sing kasugtanan sa imo, pero sa isa lang ka kondisyon: dalha si Mikal nga anak ni Saul kon mag-abot ka sa pagpakigkita sa akon.” 14Dayon#1 Sam. 18:27. si David nagpadala sing mga mensahero sa kay Isboset sa pagsiling, “Iuli sa akon ang akon asawa nga si Mikal. Nagbayad ako sing 100 ka napunta nga panit sang kinatawo sang mga Filistinhon sa akon pagpangasawa sa iya.” 15Gani ginpakuha ni Isboset si Mikal gikan sa iya bana nga si Paltiel, anak ni Lais. 16Si Paltiel nagsunod sa iya nga nagahilibion tubtob sa banwa sang Bahurim. Dayon ginsingganan sia ni Abner, “Pauli ka,” kag nagpauli sia.
17Si Abner nagkadto sa mga pangulo sang Israel kag nagsiling sa ila, “Dugay na gid ang handom ninyo nga si David manginhari ninyo. 18Karon ini na ang inyo kahigayunan. Dumdoma ninyo nga ang Ginoo nagsiling, ‘Luwason ko ang akon mga tawo nga Israelinhon sa mga Filistinhon kag sa tanan nila nga mga kaaway paagi sa akon alagad nga si David.’” 19Naghambal man si Abner sa mga tawo sang tribo ni Benjamin, kag nagkadto sia sa Hebron sa pagsugid kay David kon ano ang kasugtanan nga ginhimo sang mga tawo sang Benjamin kag sang Israel.
20Sang si Abner nagkadto kay David sa Hebron upod sa baynte ka mga tawo, si David nagpapunsyon para sa ila. 21Dayon si Abner nagsiling kay David, “Malakat na ako kag dalhon ko ang bug-os nga Israel sa pagbuylog sa imo, Mahal nga Hari. Batunon ka nila subong hari. Dayon matuman mo ang imo handom kag magagahom ka sa bug-os nga duta.” Si David naghatag sing kasigurohan kay Abner nga indi sia maano, kag ginpalakat niya sia.
Si Abner Ginpatay
22Sang ulihi, si Joab kag ang iban nga mga opisyales ni David nag-abot halin sa ila pagpanalakay nga may dala nga madamo nga mga pagkabutang nga inagaw. Pero wala na didto si Abner sa Hebron upod kay David, tungod kay si David nagpalakat sa iya kag nagpasalig nga indi sia maano. 23Sang pag-abot ni Joab kag sang iya mga tinawo, ginsugiran sia nga si Abner nagkadto kay Haring David kag ginpalakat sia kag ginpasalig nga indi sia maano. 24Gani si Joab nagkadto sa hari kag nagsiling, “Ano bala ang imo ginhimo? Si Abner nagkadto sa imo kag ngaa ginpalakat mo sia nga wala pag-anha? 25Nagkadto sia diri sa pagdaya sa imo, kag sa pag-usisa sang tagsa ka lugar nga imo ginakadtuan kag sang tanan nga imo ginahimo. Wala ka bala makahibalo sini?”
26Sang paghalin ni Joab kay David, nagpasugo sia sa pagdakop kay Abner, kag gindala nila sia pabalik halin sa Bubon sang Sira, pero si David wala makahibalo sini. 27Sang pag-abot ni Abner sa Hebron, gindala sia ni Joab nga silahanon lang sa pwerta, nga kuno abi may isekrito sia sa iya, kag ginbuno niya si Abner sa tiyan. Gani si Abner ginpatay tungod kay ginpatay niya si Asael nga utod ni Joab. 28Sang pagkabati ni David nahanungod sini nagsiling sia, “Ang Ginoo nakahibalo nga ako kag ang akon mga sumolunod wala gid sing labot sa pagpatay kay Abner. 29Kabay nga ang silot tungod sini magtupa kay Joab kag sa bug-os niya nga panimalay! Kabay nga sa tagsa ka kaliwatan sang iya panimalay may pila ka mga tawo nga matapikan sing puko ukon sing balatian sa panit nga makalalaton, ukon babayin-on, ukon mapatay sa inaway, ukon magutman!” 30Gani si Joab kag ang iya utod nga si Abisai nagpatay kay Abner tungod kay ginpatay niya ang ila utod nga si Asael sa inaway sa Gabaon.
Ginlubong si Abner
31Dayon si David nagsugo kay Joab kag sa iya mga tinawo sa paggisi sang ila mga bayu, sa pagsuksok sing sako, kag sa paglalaw para kay Abner. Sang paglubong kay Abner, si Haring David mismo nagkumpanyar nga nagasunod gid sa lungon. 32Ginlubong si Abner sa Hebron, kag ang hari naghibi sing tudo sa lulobngan kag amo man ang tanan nga mga tawo. 33Amo ini ang panalambiton ni David nahanungod kay Abner:
“Ngaa bala napatay si Abner kaangay sang isa ka buangbuang?
34Ang iya mga kamot wala magapos,
kag ang iya mga tiil wala magaid,
napatay sia kaangay sang isa ka tawo nga ginpatay sang mga kriminal!”
Kag ang mga tawo naghibi liwat tungod sa iya.
35Ang mga tawo nagtinguha sa pagpakaon kay David sa wala pa magtunod ang adlaw, pero nagpanumpa sia nga nagasiling, “Kabay nga patyon ako sang Dios kon magkaon ako sang bisan ano sa wala pa magtunod ang adlaw!” 36Natalupangdan ini sang mga tawo kag nalipay sila. Kon sa bagay, ang tanan nga mga ginhimo ni David naluyagan nila. 37Ang tanan nga mga tinawo ni David kag ang tanan nga mga tawo sa Israel nakahangop nga ang hari wala sing labot sa pagpatay kay Abner. 38Ang hari nagsiling sa iya mga opisyales, “Wala bala kamo makahibalo nga sa sini nga adlaw isa ka baganihan ang napatay sa Israel? 39Bisan ako nga pinili sang Dios nga hari, naluyahan gid sini nga adlaw. Para sa akon, ini nga mga anak ni Seruya mga mapintas! Kabay ang Ginoo magsilot sini nga mga kriminal suno sa nagakabagay sa ila!”
Currently Selected:
2 Samuel 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
