2 Samuel 23
23
Ang mga Pamilinbilin ni David
1Si David nga anak ni Jesse amo ang tawo nga ginhimo sang Dios nga gamhanan, nga ginpili sang Dios ni Jacob nga manginhari, kag manugkumposo sang matahom nga mga ambahanon para sa Israel. Amo ini ang katapusan nga mga pulong ni David:
2Ang Espiritu sang Ginoo naghambal paagi sa akon,
ang iya mga pulong yara sa akon mga bibig.
3Ang Dios sang Israel naghambal,
ang mangangapin sang Israel nagsiling sa akon:
“Ang hari nga nagagahom sing matarong,
nagagahom sia nga nagatuman sa Dios,
4kaangay sang adlaw nga nagasilak sa kaagahon nga wala sing gal-om,
ang adlaw nga nagapaigpat sa hilamon sa tapos sang ulan.”
5Kag amo ini ang pagbendisyon sang Dios sa akon mga kaliwat,
tungod kay naghimo sia sa akon sing kasugtanan nga wala sing katapusan,
nga isa ka kasugtanan nga indi maguba,
isa ka saad nga indi na mabayluhan.
Amo ina ang akon handom,
amo ina ang akon kadalag-an,
kag ang Dios magatuman gid sini.
6Pero ang di-diosnon nga mga tawo kaangay sang mga tunok nga ginahaboy;
wala sing kamot nga makatandog sa ila.
7Kinahanglan gamitan mo sila sing salsalon ukon isa ka bangkaw,
pagasunogon gid sila sing bug-os.
Ang Isganan nga mga Soldado ni David
(1 Cron. 11:10-41)
8Amo ini ang mga ngalan sang isganan nga mga soldado ni David: ang nahauna amo si Joseb-basevet nga taga-Taquemon kag pangulo sang “Ang Tatlo”;#23:8 Ang isa ka dumaan nga pagbadbad “Ang Tatlo”; sa Hebreoang ikatlo. nagpakig-away sia nga ang iya hinganiban bangkaw batok sa 800 ka mga tawo kag ginpamatay sila tanan sa isa lang ka inaway.
9Ang ikaduha sa tatlo nga bantog amo si Eleazar nga anak ni Dodo kag halin sia sa barangay ni Ahohi. Sang isa ka tion, sia kag si David naghangkat sa mga Filistinhon nga nagtipon sa pagpakig-away. Ang mga Israelinhon nag-ilisol, 10pero wala sia mag-isol kundi nagpakig-away sia sa mga Filistinhon tubtob ang iya kamot naunay sa iya espada. Ang Ginoo nagdaog sa isa ka daku nga inaway sina nga adlaw. Sa tapos sini, ang mga Israelinhon nagbalik kay Eleazar sa pagpanguha sang mga hinganiban sa mga nagkalamatay.
11Ang ikatlo sa tatlo nga bantog amo si Sama, nga anak ni Age nga taga-Harar. Ang mga Filistinhon nagtipon sa Lehi, sa diin may isa ka uma sang lentihas. Ang mga Israelinhon nagpalagyo sa mga Filistinhon, 12pero si Sama wala maghalin sa iya ginatindugan sa latagon, gin-apinan ini, kag ginpamatay ang mga Filistinhon. Ang Ginoo nagdaog sa isa ka daku nga inaway sina nga adlaw.
13Sang madali na lang ang tig-alani, ang tatlo sang “Katluan” nagdulhog sa Kweba sang Adulam, sa diin didto si David, samtang ang isa ka guban sang mga Filistinhon didto nagpatindog sang ila kampo sa Kapatagan sang Refaim. 14Sa sadto nga tion si David didto sa iya napamakuran nga bakulod, kag ang isa ka grupo sang mga Filistinhon nag-agaw sang Betlehem. 15Si David nga nauhaw gid nagsiling, “Abaw, maayo kuntani kon may magdala sa akon sang tubig gikan sa bubon nga malapit sa pwerta sang Betlehem!” 16Ang tatlo ka bantog nga mga soldado nagsulod sa kampo sang mga Filistinhon, nagkuha sing tubig sa bubon kag gindala ini kay David. Pero si David wala mag-inom sini, kundi iya ini gin-ula subong halad sa Ginoo, 17kag nagsiling, “O Ginoo, indi gid ako makainom sini! Kaangay lang ini nga ginainom ko ang dugo sini nga mga tawo nga nagtaya sang ila kabuhi!” Gani wala sia mag-inom sini.
Amo ini ang maisog nga mga binuhatan sang tatlo ka isganan nga mga soldado.
18Si Abisai nga utod ni Joab, ang ila iloy amo si Seruya, amo ang pangulo sang “Isganan nga Katluan.” Nag-away sia nga ang iya hinganiban bangkaw batok sa 300 ka mga tawo kag ginpamatay sila, kag nanginbantog sia sa “Sa Katluan.”#23:18 Ang isa ka dumaan nga pagbadbad “Sa Katluan”; sa Hebreo “Ang Tatlo”. 19Sia ang pinakabantog sa “Sa Katluan,”#23:19 “Sa Katluan”: Sa Hebreo “Ang Tatlo”. kag nanginpangulo sia nila, pero wala sia makatupong sang pagkaisog sang “Ang Tatlo.”
20Si Benaya nga anak ni Joiada nga taga-Kabzeel, isa man ka isganan nga soldado. Sia man nakahimo sang tumalagsahon nga mga binuhatan. Nakapatay sia sang duha ka bantog nga mga hangaway sang Moab. Nagpanaog man sia sa isa ka buho sang nagaulan ang yelo kag nagpatay sang isa ka leon. 21Ginpatay man niya ang isa ka Ehiptohanon, isa ka daku nga tawo nga nagauyat sang iya bangkaw. Ginsalakay sia ni Benaya sang iya inuglampos, gin-agaw ang bangkaw sa kamot sang Ehiptohanon kag ginbuno ini sa iya. 22Amo ini ang tumalagsahon nga mga binuhatan ni Benaya nga isa sang “Sa Katluan.” 23Sia amo ang pinakabantog sa ila, pero indi sia makatupong sa kaisog sang “Ang Tatlo.” Ginhimo sia ni David nga pangulo sang iya gwardya.
24-39Ang iban nga mga katapo sang “Katluan” amo ang masunod:
si Asael nga utod ni Joab
si Elhanan nga anak ni Dodo nga taga-Betlehem
si Sama kag si Elica nga taga-Harod
si Helez nga taga-Pelet
si Ira nga anak ni Iquez nga taga-Tekoa
si Abieser nga taga-Anatot
si Mebunai nga taga-Husa
si Zalmon nga taga-Aho
si Maharai nga taga-Netofa
si Heleb nga anak ni Baana nga taga-Netofa
si Itai nga anak ni Ribai nga taga-Gebeat sang Benjamin
si Benaya nga taga-Pirathon
si Hidai nga taga-kapatagan malapit sa Gaas
si Abialbon nga taga-Araba
si Azmavet nga taga-Bahurim
si Eliaba nga taga-Saalbon
ang mga anak ni Jasen
si Jonatan
si Sama nga taga-Harar
si Ahiam nga anak ni Sarar nga taga-Harar
si Elifelet nga anak ni Ahasbai nga taga-Maaca
si Eliam nga anak ni Ahitofel nga taga-Gilo
si Hezro nga taga-Carmel
si Paarai nga taga-Arba
si Igal nga anak ni Natan nga taga-Soba
si Bani nga taga-Gad
si Selec nga taga-Amon
si Naharai nga taga-Beerot, ang manugdala sing hinganiban ni Joab nga ang iya iloy amo si Seruya
si Ira kag si Gareb nga taga-Hatir
si Urias nga Hethanon.
Sila tanan trayntay siete ka isganan nga mga soldado.
Currently Selected:
2 Samuel 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
