2 Samuel 22
22
Ang Kalantahon ni David sang Pagdaog
(Sal. 18)
1Amo ini ang ambahanon nga ginkanta ni David sa Ginoo sang pagluwas sang Ginoo sa iya sa kay Saul kag sa iban niya nga mga kaaway:
2Ang Ginoo amo ang akon mangangapin,
sia amo ang akon malig-on nga pamakod.
3Ang Dios amo ang akon mangangapin,
kag upod sa iya indi ako maano.
Sia amo ang akon taming,
ginaapinan niya ako agod indi ako maano.
Sia ang akon manluluwas,
ginaapinan niya ako kag ginaluwas sa mga kinagamo.
4Nagapanawag ako sa Ginoo,
kag iya ako ginaluwas sa akon mga kaaway.
Dayawon ang Ginoo!
5Ang mga balod sang kamatayon nagalikop sa akon,
ang mga balod sang kalaglagan naglambas sa akon.
6Ang lubid sang kamatayon nagsambod sing hugot sa akon,
kag ang lulobngan naghanda sang iya tugalbong para sa akon.
7Nagpanawag ako sa Ginoo sa akon kalisdanan,
nagpanawag ako sa akon Dios agod buligan.
Sa iya templo nabatian niya ang akon tingog,
ginpamatian niya ang akon pagpangayo sing bulig.
8Dayon ang duta naglinog kag nagkurog,
ang mga sadsaran sang langit nag-uyog kag nagtay-og
tungod kay ang Dios nangakig!
9Nagtub-ok ang aso sa iya ilong,
naggwa sa iya baba ang nagaharahara nga kalayo kag nagadabdab nga mga baga.
10Gin-abrihan niya ang langit, kag nagpanaog sia,
nga may gal-om sa idalom sang iya mga tiil.
11Naglupad sia sing madasig nga nagasakay sa kerubin,#22:11 KERUBIN: Tan-awa ang Lista sang mga Pulong.
nagasakay sia sa mga pakpak sang hangin.
12Gintabunan niya ang iya kaugalingon sang kadudulman,
ang madamol nga gal-om nga puno sing tubig nagalibot sa iya,
13ang nagabaga nga uling nagdabdab gikan sa mga kilat sa atubang niya.
14Dayon ang Ginoo nagdaguob gikan sa langit,
kag nabatian ang tingog sang Dios nga Labing Mataas.
15Ginpalupad niya ang mga baslay, kag nag-alaplaag ang iya mga kaaway;
ginpakirab niya ang kilat, kag sila nagbuloblag.
16Nakit-an ang kadadalman sang kadagatan,
kag ang mga sadsaran sang duta nabuksan
sang pagsaway sang Ginoo sang iya mga kaaway
kag sang pagdaguob niya sa ila sa iya kaakig.
17Gikan sa langit gindab-ot ako sang Ginoo,
iya ako ginbatak gikan sa tubig nga madalom.
18Ginluwas niya ako sa akon gamhanan nga mga kaaway,
kag sa tanan nga nagadumot sa akon—
tama sila ka kusog para sa akon.
19Sang yara ako sa kalalat-an, ila ako ginsalakay,
pero gin-apinan ako sang Ginoo.
20Ginbuligan niya ako sa katalagman,
ginluwas niya ako tungod kay iya ako nahamut-an.
21Ang Ginoo naghatag sa akon sing balos tungod kay ginahimo ko ang matarong,
ginbendisyunan niya ako, tungod kay wala ako sing sala.
22Gintuman ko ang kasugoan sang Ginoo,
wala ako magbiya sa akon Dios.
23Gintuman ko ang tanan niya nga mga kasugoan,
wala ko ginlapas ang iya mga sugo.
24Nakahibalo sia nga wala ako sing kasaypanan,
nga ang malaut akon ginalikawan.
25Gani, ginhatagan niya ako sing balos tungod kay ako matarong,
kag nakahibalo sia nga wala ako sing sala.
26Matutom ka, O Ginoo, sa mga matutom sa imo,
kag maayo gid sa ila nga mga himpit.
27Putli ka sa mga putli,
pero ginadumtan mo ang mga malaut.
28Ginaluwas mo ang mga mapainuboson,
pero ginasumpo mo ang mga bugalon.
29Ikaw, O Ginoo, ang akon kapawa,
ginatabog mo ang kadudulman nga yara sa akon.
30Ginhatagan mo ako sing kusog sa pagsalakay sa akon mga kaaway,
kag sing gahom sa pagdaog sang ila mga pamakod.
31Daw ano ka himpit sang mga binuhatan sini nga Dios,
daw ano ka masaligan ang iya mga pulong!
Kaangay sia sang isa ka taming
sa tanan nga nagadangop sa iya.
32Ang Ginoo lamang amo ang Dios,
ang Dios lamang amo ang aton mangangapin.
33Ini nga Dios amo ang akon malig-on nga dalangpan,
sia nagaapin nga indi ako maano sa akon dalanon.
34Ginapalig-on#Hab. 3:19. niya ang akon mga tikang subong sang usa,
ginabantayan niya ako sa mga kabukiran.
35Ginahanas niya ako sa inaway,
agod mabingat ko ang akon pana nga bronsi.
36Ikaw, O Ginoo, nagaapin kag nagaluwas sa akon,
nangingamhanan ako sa imo bulig.
37Tungod sa imo wala ako madakpi,
kag wala mahulog sa kamot sang kaaway.
38Ginalagas ko ang akon mga kaaway kag ginalutos ko sila,
wala ako nagauntat tubtob malutos sila.
39Ginalampusan ko sila, kag indi na sila makatindog,
napukan sila sa akon tiilan.
40Ginahatagan mo ako sing kusog sa pagpakig-away,
kag kadalag-an sa akon mga kaaway.
41Ginapapalagyo mo ang akon mga kasumpong,
ginalaglag ko ang mga nagadumot sa akon.
42Nagapangayo sila sing bulig, pero wala sing may makaluwas sa ila,
nagapanawag sila sa Ginoo, pero wala niya sila pagsabta.
43Ginabukbok ko sila, kag nahimo sila kaangay sang yab-ok,
ginatasak ko sila kaangay sang lunang sa mga dalan.
44Ginluwas mo ako sa akon mabinatuon nga mga tawo
kag ginhimo mo ako nga pangulo sa mga pungsod,
ang mga tawo nga wala ko makilala akon na karon mga ginsakpan.
45Ang mga dumoluong nagapaidalom sa akon,
kon mabatian nila ako, nagatuman sila gilayon.
46Nadulaan sila sing kaisog,
kag gikan sa ila pamakod naggwa sila nga nagakurog.
47Buhi ang Ginoo! Dayawon ang akon mangangapin!
Ang Dios amo ang akon manluluwas! Isugid ang iya pagkagamhanan!
48Ginapadaog niya ako batok sa akon mga kaaway,
iya ginapasakop ang mga tawo sa akon gahom,
49kag iya ako ginaluwas sa akon mga kasumpong.
Ikaw, O Ginoo, nagapadaog sa akon batok sa akon mga kaaway,
kag ginaapinan mo ako sa mabangis nga mga tawo.
50Gani,#Rom. 15:9. O Ginoo, sa tunga sang mga kapungsoran, nagadayaw ako sa imo,
nagaamba ako sing mga pagdayaw sa imo.
51Dalagku nga mga pagdaog ang ginahatag sang Dios sa iya hari,
ginapakita niya ang iya malig-on nga gugma sa iya pinili,
sa kay David kag sa iya mga kaliwat sa gihapon.
Currently Selected:
2 Samuel 22: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
