2 Macabeo 8
8
Si Judas Macabeo Nagrebelde
(1 Mac. 3:1-26)
1Si Judas Macabeo kag ang iya mga kaupdanan nagkadto sing tago sa mga kabarangayan kag ila gintipon ang mga Judio nga nagpabilin nga mainunongon sa Judaismo, kag nakatipon sila sing 6,000 ka mga tinawo. 2Nagpanawag sila sa Ginoo nga tamdon man ang iya mga katawhan nga ginapigos sang tanan nga mga pungsod sa ila palibot, kag kaluoyan niya ang Templo nga ginadagtaan sang mga wala nagatuo sa Dios. 3Nagpangamuyo man sila nga kaluoyan ang Jerusalem nga nagakaguba kag daw halos wala na sing nabilin, nag-ampo man sila nga pamatian ang dugo sang mga ginpamatay nga nagapanawag sa iya, 4nga dumdomon man niya ang pagpamatay sang mga kabataan nga wala sing sala, kag sa pagpakita sang kaakig sa kalautan paagi sa pagtimalos sa mga pagyaguta batok sa iya ngalan.
5Sang makatipon si Judas sang isa ka grupo sang mga hangaway napamatud-an niya sa mga Hentil nga indi sia madaog, tungod kay ang kaakig sang Ginoo batok sa Israel ginbayluhan sang kaluoy. 6Nagsalakay sia sing kibot sa mga kabanwahanan kag mga kabarangayan, kag iya ini ginpangsunog. Naagaw niya ang maayo nga mga lugar kag madamo sang mga kaaway ang nagpalalagyo. 7Ginhimo niya ini nga mga pagsalakay sa tion sang kagab-ihon. Ang iya kaisog ginbantog sa malayo nga mga lugar.
Si Tolemeo Nagpadala kay Nicanor sa Pagsalakay kay Judas
(1 Mac. 3:38-41)
8Sang makita ni Felipe nga gobernador sang Jerusalem ang padayon nga pag-uswag ni Judas kag nagasunodsunod lang ang iya nga kadalag-an, nagsulat sia kay Tolemeo, ang gobernador sang Coeli-siria kag Fenicia, sa pagpangayo sing bulig para sa kaayuhan sang ginharian. 9Si Tolemeo nagpili sa gilayon kay Nicanor kag ginpadala sia sa pagpangulo sang 20,000 ka mga soldado nga naghalin sa nagkalainlain nga mga pungsod sa pagpamatay sang tanan nga mga Judio. Si Nicanor anak ni Patroclus, isa sang mga katapo sang nahauna nga Mga Abyan sang Hari. Bilang iya kabulig, iya ginpili si Gorgias, isa ka kinilala nga heneral nga may madamo nga mga inagihan sa inaway. 10Paagi sa pagbaligya sang mga Judio nga binilanggo halin sa inaway, ginapamat-od ni Nicanor nga sia makatipon sing 150,000 ka libra nga pilak para sa buhis nga balayran sang hari sa Roma.
11Gani wala sia mag-uyang sang tion sa pagpangagda sa mga kabanwahanan sa higad sang baybayon agod mag-abot sa pagbakal sang mga ulipon nga Judio nga wala gani sing isa ka libra nga pilak ang tagsa ka Judio. Pero wala gid niya ginpaabot ang paghukom sang Dios nga Makagagahom nga madali na lang mag-abot sa iya.
Nahibaluan ni Judas ang mga Tinutuyo ni Nicanor
(1 Mac. 3:42-54)
12Sang makalambot ang balita kay Judas sang mga pagpanalakay ni Nicanor, iya ginpaandaman ang iya mga tinawo nahanungod sang pagpalapit sang kaaway. 13Sang pagkabati sini sang mga matalaw kag kulang sing pagsalig sa katarungan sang Dios, nagpalalagyo sila. 14Ang iban sa ila nagbaligya sang ila nabilin nga mga pagkabutang, kag nagpangamuyo sa Ginoo nga luwason sila sa sining di-diosnon nga si Nicanor nga nagbaligya sa ila bisan sa wala pa ang inaway. 15Nagapangayo sila nga maluwas bisan indi para sa ila kaugalingon, kundi tungod lang sang kasugtanan nga ginhimo sa ila mga katigulangan, kag tungod sila mismo gintawag paagi sa iya balaan kag mahimayaon nga ngalan. 16Gintipon ni Macabeo ang iya mga tinawo nga nagadamo sing 6,000. Ginlaygayan niya sila nga indi magkahadlok ukon magpakaluya sa kadamuon sang mga kaaway nga Hentil nga nagasalakay nga may malaut nga tinutuyo batok sa ila, kundi mag-away nga may kaisog. 17Dumdomon nila ang ginhimo nga sala sining mga tawo batok sa Templo, kag ang mga pag-antos sining ginmusmos nga siudad, kag ang pagdula sang ila kinaandan nga pagkabuhi. 18Nagsiling sia, “Nagasalig sila sa ila mga hinganiban kag sa ila maisog nga binuhatan, pero ang aton pagsalig yara sa Makagagahom nga Dios, nga bisan sa isa lang ka pagsinyas sarang makalutos sang mga nagasalakay sa aton kag sang bug-os nga kalibutan.”
19Dayon ginpahanumdom sila ni Judas sang mga tinion nga ang ila mga katigulangan nakabaton sang bulig: yadtong tion nga sa paggahom ni Senaquerib, 185,000 ka mga kaaway ang nagkalamatay, 20yadtong tion sa Babilonia nga nag-inaway batok sa mga Galacianhon ang 8,000 ka mga Judio upod ang 4,000 ka mga Macedonianhon, kag sang mapikuta ang mga Macedonianhon, ginpangpapas sang 8,000 ang 120,000 ka mga kaaway tungod sang bulig nga ila nabaton gikan sa Dios, kag sila nakakuha sang madamo nga mga inagaw.
Gindaog ni Judas si Nicanor
(1 Mac. 3:55–4:27)
21Matapos ni Judas mapaisog sila paagi sining mga pulong kag karon nga handa na sila nga mapatay para sa ila mga kasugoan kag para sa ila pungsod, ginpartida niya ang iya mga hangaway sa apat ka grupo. 22Ginhimo niya nga pangulo sa tagsa ka bahin ang iya mga utod nga amo sanday Simon, Jose kag Jonatan, kag gintugyanan ang tagsatagsa sing 1,500 ka mga soldado. 23Dayon#1 Mac. 3:48. ginmanduan niya si Eleazar sa pagbasa sing matunog sang balaan nga libro, kag ginhatagan niya sila sang ila senyas sa inaway: “Bulig gikan sa Dios,” dayon iya ginpangulohan ang nahauna nga grupo kag nagpakig-away batok kay Nicanor.
24Tungod kay kaupod nila ang Makagagahom nga Dios, sobra sa 9,000 ka mga kaaway ang ila napatay. Napilasan kag napangpiang nila ang kadamuan sang mga tinawo ni Nicanor kag ginpanglagas sila. 25Naagaw nila ang kwarta sang mga magabakal kuntani sa ila subong mga ulipon. Matapos ang malawig nila nga paglagas, nagbalik sila tungod kay kulang ang ila panahon. 26Bisperas yadto sang Adlaw nga Inugpahuway, gani wala nila ginpadugay ang ila paglagas. 27Ginpangtipon nila ang mga hinganiban sang mga kaaway kag ginpangkuha ang ila mga inagaw. Dayon ginsaulog nila ang Adlaw nga Inugpahuway nga nagadayaw kag nagapasalamat gid sa Ginoo, tungod kay sia nagluwas sa ila kag naghatag sa ila sang nahauna nga tun-og sang iya kaluoy. 28Sang matapos ang Adlaw nga Inugpahuway, ila ginpanagtag ang ila mga inagaw sa mga ginhingabot subong man sa mga balo kag sa mga ilo; ang nabilin ila ginpartida sa ila kaugalingon kag sa ila mga kabataan. 29Dayon nagbuylog sila sa pagpangamuyo sa Maluloy-on nga Ginoo nga batunon niya sing bug-os ang iya mga alagad.
Ang Paglutos ni Judas kay Timoteo kag kay Baquides
30Ginbatuan man sang mga Judio ang mga hangaway ni Timoteo kag ni Baquides, kag sobra sa 20,000 ang ila ginpamatay, kag naagaw nila ang pila sang mataas nga mga pamakod. Gintunga nila sa duha ka bahin ang ila madamo nga mga inagaw, ang katunga para sa ila, kag ang katunga para sa mga nakaagi sa mga paghingabot, sa mga ilo kag mga balo, kag para sa mga tigulang man. 31Mainamligon nga ginpanipon nila ang mga hinganiban sang mga kaaway kag gintago ini sa nagakaigo nga mga lugar. Ang iban nga mga inagaw ila gindala sa Jerusalem. 32Ginpatay nila ang pangulo nga opisyal sang mga hangaway ni Timoteo, isa sia ka malaut nga tawo nga nagdala sing daku nga halit sa mga Judio. 33Sa tion sang ila pagsaulog sang ila kadalag-an sa Jerusalem ila ginsunog ang mga tawo nga amo man ang nagsunog sang mga pwerta sang Templo, lakip kay Calistenes nga nagpanago sa isa ka diutay nga balay, gani ini sila nakabaton sing nagakaigo nga balos sang ila malaut nga binuhatan.
34Sa sini nga paagi, ang pinakamalaut nga kriminal nga si Nicanor, nga nagdala sang linibo ka mga negosyante sa pagpamakal sang mga Judio, 35ginpukan sa bulig sang Ginoo paagi sa mga tawo nga iya ginpakanubo. Gin-uba niya ang iya bayu sang pagkagamhanan. Nagpanglaktod sia sa mga uma nga nagaisahanon subong sang isa ka nakapalagyo nga ulipon, kag nakalambot sia sa Antioquia. Nagmadinalag-on lamang sia sa pagpapas sang iya bug-os nga hangaway. 36Gani ining tawo nga nagtug-an sa pagbayad sang buhis sa Roma paagi sa pagbaligya sang mga binilanggo nga taga-Jerusalem nagpanaksi nga ang mga Judio may manug-apin, kag bangod sini ang mga Judio indi madaog tungod sang ila pagsunod sang mga kasugoan nga ginmando sina nga manug-apin.
Currently Selected:
2 Macabeo 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012